25/03/2024
ကြံ့ကြံ့ခံနိုင်ရည်စွမ်းကို တည်ဆောက်ခြင်း 💪
လူတွေဟာ နေ့စဉ်နဲ့အမျှ ကြုံတွေ့ရတဲ့ စိန်ခေါ်မှုတွေနဲ့ စိတ်ဖိစီးစရာ အခြေအနေတွေကို မိမိတို့ရဲ့ရှိသမျှ အင်အားတွေနဲ့ တွန်းလှန်ရင်ဆိုင်နေကြရပါတယ်။ တကယ်လို့ အတိတ်ကဖြစ်ခဲ့တဲ့ စိတ်အဆင်မပြေမှုတွေ၊ ငယ်ဘဝရဲ့ ခက်ခဲတဲ့အတွေ့အကြုံတွေနဲ့ ပြင်းထန်တဲ့ စိတ်ဖိစီးစရာဖြစ်ရပ်ဆိုးတွေက အခုအချိန်ထိ စိတ်ထဲမှာကျန်နေရင် (ဒါမှမဟုတ်) ဒီလိုဖြစ်ရပ်ဆိုးတွေကို လက်ရှိကြုံတွေ့ရရင် အပေါ်ကပြောခဲ့တဲ့ တွန်းလှန်ရင်ဆိုင်နိုင်တဲ့ ကိုယ့်ရဲ့ အင်အားဟာ နေ့စဉ်ကြုံရတာထက်ပိုတဲ့ဖိအားကို ထမ်းဆောင်ရပါတယ်။ လူတစ်ဦးနဲ့တစ်ဦး ကြုံတွေ့ရင်ဆိုင်ရတဲ့ ဘဝအခြေအနေ ကွာတာကြောင့် စိတ်ပိုင်းဆိုင်ရာ သက်သောင့်သက်သာဖြစ်မှုနဲ့ အခက်အခဲကို ရင်ဆိုင်ကိုင်တွယ်နိုင်မှုတွေက လူတစ်ဦးနဲ့တစ်ဦးကြား ကွဲပြားမှုရှိနေတာ ဖြစ်ပါတယ်။
“မျှော်မှန်းထားသလို မဖြစ်လာတတ်တဲ့ ဘဝ”ဆိုတဲ့အတိုင်းဘဲ သတင်းဆိုးတွေ၊ ခွဲခွါရခြင်းတွေ၊ ဆုံးရှုံးမှုတွေဟာ ဘယ်အချိန်မှာရောက်လာမလဲဆိုတာကို ကြိုတင်တွက်ဆထားလို့မရတာ အမှန်ပါပဲ။ ဒါပေမယ့် ဒီအရာတွေကိုရင်ဆိုင်နိုင်ဖို့အတွက် အင်အားတွေကိုတော့ ကြိုတင်ပြင်ဆင်ပြီး တည်ဆောက်ထားလို့ရတာ သေချာပါတယ်။
🧘 ကြံ့ကြံ့ခံနိုင်ရည်စွမ်းဆိုတာ ဘာလဲ ?
ကြံ့ကြံ့ခံနိုင်ရည်စွမ်းဆိုတာ အခက်အခဲကြားမှာ ကောင်းစွာပြန်လည်ရင်ဆိုင်နိုင်တဲ့ အင်အားစနစ်တစ်ခုဖြစ်ပြီး ပြင်းထန်တဲ့ ဖြစ်ရပ်ဆိုးတွေကို ကြုံတွေ့ ကြားသိရတဲ့အခါ၊ မိမိတန်ဖိုးထားရတဲ့အရာတွေကို ဆုံးရှုံးရတဲ့အခါ၊ မျှော်မှန်းထားသလိုဖြစ်မလာရတဲ့အခါ (ဒါမှမဟုတ်) စိတ်ပိုင်းဆိုင်ရာ ထိခိုက်ခံစားရတဲ့အခါ ဒီအခက်အခဲတွေကြားမှာ ကောင်းစွာရင်ဆိုင်ကိုင်တွယ်နိုင်ဖို့ ရေရှည်တည်ဆောက်ထားရတဲ့ အခြေအနေတစ်ခုလည်းဖြစ်ပါတယ်။ ကြံ့ကြံ့ခံနိုင်ရည်စွမ်းဟာ အခက်အခဲတွေကြား ပြန်လည်ရင်ဆိုင်နိုင်စွမ်း၊ ရှင်သန်ရပ်တည်နိုင်စွမ်းသာဖြစ်ပြီး အခက်အခဲကြား ပျော်ရွှင်နိုင်ခြင်း၊ မတုန်မလှုပ်ရှိနေခြင်း စတဲ့အရာတွေ (လုံးဝ) မဟုတ်ပါဘူး။
စိတ်ပညာရှင်များကတော့ ကြံ့ကြံ့ခံနိုင်ရည်စွမ်းကို ရုပ်ပိုင်းဆိုင်ရာ (ဒါမှမဟုတ်) စိတ်ပိုင်းဆိုင်ရာ အခြေအနေဆိုးတွေကြား ကောင်းစွာရှင်သန်နိုင်စွမ်းလို့ အဓိပ္ပာယ်ဖွင့်ဆိုကြပါတယ်။
🧘 ဘယ်လိုတည်ဆောက်ကြမလဲ ?
ဒီနေရာမှာ အရင်ဦးဆုံးသိထားသင့်တဲ့ အချက်ကတော့ ဘဝမှာ မိမိအနေနဲ့ ကြိုတင်ထိန်းချုပ်လို့ရတဲ့ အရာတွေရှိသလို ထိန်းချုပ်ထားလို့မရနိုင်တဲ့ အရာများစွာလည်း ရှိနေတယ်ဆိုတာပါပဲ။ တချို့အနေအထားများမှာ ကိုယ့်ဘက်က ရွေးချယ်ပိုင်ခွင့်နဲ့ ထိန်းချုပ်
ပိုင်ခွင့်တွေမရှိတာကို သိထားသင့်ပါတယ်။
ကြံ့ကြံ့ခံနိုင်ရည်စွမ်းဟာ ရေရှည်ထိန်းသိမ်းထားသင့်တဲ့ အခြေအနေတစ်ရပ်ဖြစ်ပြီး ကိုယ့်မှာရှိနေတဲ့ ဒီစွမ်းရည်ကိုပိုမိုတိုးတက်လာဖို့ဆိုရင် အောက်ပါ အချက်တွေကို ဖတ်ရှုလိုက်နာကြည့်ပါ။
☘ (၁) ဆက်ဆံရေးတွေကို အလေးထားပါ - မိမိတစ်ဦးတည်းမဟုတ်ကြောင်း သတိရပါ။ စိတ်ပိုင်းဆိုင်ရာ အားရှိဖို့ မိသားစု (ဒါမှမဟုတ်) ကိုယ်ယုံကြည်ရတဲ့သူတွေ၊ မိတ်ဆွေသူငယ်ချင်းတွေနဲ့ အဆက်အသွယ်မပြတ်အောင်နေပါ။
☘ (၂) စိတ်အေးချမ်းမှုကို လေ့ကျင့်ယူပါ - မိမိစိတ်ကို အေးချမ်းစေမယ့် နည်းလမ်းတွေနဲ့ ရင်းနှီးကျွမ်းဝင်နေအောင် လေ့ကျင့်ထားတာက အခက်အခဲအတွင်းမှာ တည်ငြိမ်မှုရှိစေပြီး ဆုံးဖြတ်ချက်တွေကလည်း ပြတ်သားလာနိုင်ပါတယ်။ ဥပမာ - စာအုပ်ထဲမှာရေးမှတ်ခြင်း၊ တရားထိုင်ခြင်း၊ ယောဂကျင့်ခြင်း။
☘ (၃) ကိုယ်ခန္ဓာကို ဂရုစိုက်ပါ - အိပ်စက်ခြင်း၊ အစားစားခြင်း၊ အနားယူခြင်းနဲ့ ကိုယ်လက်လှုပ်ရှားမှု ပြုလုပ်ခြင်းတို့ကို အချိန်မှန်ပြုလုပ်နိုင်တာက ရုပ်ပိုင်းဆိုင်ရာကျန်းမာရေးကိုရော စိတ်ပိုင်းဆိုင်ရာကိုပါ အင်အားတိုးစေပါတယ်။ မိမိအတွက် ဆိုးကျိုးဖြစ်စေတဲ့အကျင့်တွေရှိရင် ပြင်ဆင်ဖို့ ကြိုးစားကြည့်ပါ။
☘ (၄) ရည်မှန်းချက်ပန်းတိုင် သတ်မှတ်ပါ - သေးငယ်တဲ့ ပန်းတိုင်ပဲဖြစ်ပါစေ ချမှတ်ပြီး အကောင်အထည်ဖော်နိုင်ဖို့ အမြဲကြိုးစားနေဖို့လိုပါတယ်။ ကိုယ့်ရဲ့လုပ်နိုင်စွမ်းတွေကိုလည်း အသိအမှတ်ပြုပါ။ ရည်မှန်းချက်ကြီးကြီးကို အောင်မြင်သည်အထိ မလုပ်နိုင်သေးဘူးဆိုရင်တောင် နီးစပ်တဲ့ ဖြစ်နိုင်ခြေတွေ စဥ်းစားဆောင်ရွက်လို့ရပါတယ်။
☘ (၅) မတူညီတဲ့ရှုထောင့်အမြင်တွေကို အလေးထားသုံးသပ်ပါ - မိမိကိုယ်တိုင် ဖြစ်ရပ်တစ်ခုကို ရှုထောင့်အမျိုးမျိုးကနေ သတိထားလေ့လာသင့်ပြီး အခြားသော မတူညီမှုများကိုလည်း အလေးထား သုံးသပ်သင့်ပါတယ်။
☘ (၆) အကူအညီ - လိုအပ်ရင် အကူအညီရယူပါ။ မိမိကူညီနိုင်သမျှကိုလည်း ကူညီပါ။ မိမိအားအကူအညီပေးသူကိုလည်း အလေးထားပါ။ မိမိကိုယ်တိုင်
လည်း တစ်ပါးသူကိုကူညီနိုင်တဲ့အခါ မည်မျှပင်သေးငယ်ပါစေ မိမိကိုယ်ကို အသိအမှတ်ပြုပါ။
ကြံ့ကြံ့ခံနိုင်ရည်စွမ်းတည်ဆောက်ရာမှာ အရေးပါတဲ့ နံပါတ် (၂) နဲ့ နံပါတ် (၃) အချက်များကို လက်တွေ့ကျင့်သုံးလို့ရအောင် စိတ်ပိုင်းဆိုင်ရာ၊ ရုပ်ပိုင်းဆိုင်ရာ အကျိုးရှိစေတဲ့ လေ့ကျင့်ခန်းများကို ဖော်ပြထားပြီးဖြစ်ပါတယ်။ အောက်ပါ လင့်ခ်တွေမှာ ရှာဖွေလေ့လာလို့ရပါတယ်။
👉 https://tinyurl.com/treeexercise1
👉 https://tinyurl.com/origamiexercise
👉 https://tinyurl.com/breathingexercise3
#စိတ်ကျန်းမာရေး
