29/05/2026
ဆယ်နှစ်အတွင်း ဘာတွေ လုပ်ဆောင်ခဲ့သလဲ…
🔻🔻🔻🔻🔻🔻🔻🔻🔻🔻🔻🔻🔻🔻
အသင်းကြီး ဆယ်နှစ်တာကာလအတွင်း ဘာတွေလုပ်ဆောင်ခဲ့သလဲ.. ဘယ်လောက် အကျိုးများခဲ့သလဲ ဆိုတာ အနှစ်ချုပ်လေး တင်ပြချင်ပါတယ်။
1. ထောက်ပံ့အလှူငွေ ပေးအပ်ခြင်း
—————————————————-
အသင်းကြီးအနေဖြင့် ယခုအချိန်ထိ ဆယ်နှစ်တာကာလအတွင်းမှာ ထောက်ပံ့အလှူငွေ ပေးအပ်မှုပေါင်း အကြိမ် (၁၀၀) တိတိ ရှိခဲ့ပါတယ်။ ဆေးရုံတက်ရောက်ချိန်မှာ ကူညီခဲ့တာ ရှိသလို နာရေးဖြစ်သွားတဲ့အခါမှာလည်း ကူညီခဲ့တာ ရှိပါသည်။
2. နာရေးကူညီမှု အထောက်အပံ့များ လှူဒါန်းခြင်း
————————————————————-
ကျေးရွာတွင်း အခြေခံလိုအပ်ချက်ဖြစ်သော နာရေးကူညီမှုများအတွက် လှူဒါန်းခဲ့ပါသည်။
- နိဗ္ဗာန်ယာဉ် (၂၀၁၇ တွင် လှူဒါန်းသည်)
- တလုံးထိုးအင်ဂျင်မီးစက် (နာရေးအိမ်များတွင် မီးထွန်းရန်)
- အအေးခေါင်းနှင့် sound proof မီးစက် တွဲလျက် (၂၀၂၀ တွင် လှူဒါန်းသည်)
- နိဗ္ဗာန်စံအိမ် အဆောက်အဦး (၂၀၂၀)
- သုဿာန် စားကျက်မြေနေရာများ ရှင်းလင်းခြင်း
3. အထက ချောင်းဝ စာသင်ကျောင်း
—————————————————-
- တက္ကသိုလ်ဝင်တန်းအောင်မြင်သော ကလေးများအား ဆုချီးမြှင့်ခြင်း (၂၀၁၅-၂၀၁၆, ၂၀၁၆-၂၀၁၇, ၂၀၁၇-၂၀၁၈)
- သင်ထောက်ကူပစ္စည်းများအဖြစ် Projector, Printer. 200Ah Battery, Laptop Computer တို့ကို လှူဒါန်းခဲ့ပါသည်။
- ထို့အပြင် အခြားအထွေထွေသုံးစွဲနိုင်ရန် ငွေသား ငါးသိန်းစီ လှူဖြစ်တာတွေလည်း ရှိပါသည်။
- စိန်ရတုပွဲတော်နှင့် ဆရာကန်တော့ပွဲအောင်မြင်စွာ ကျင်းပနိုင်ရေးမှာလည်း အလှူငွေရှာဖွေရေးအပါအဝင် ဦးဆောင် အခန်းကဏ္ဍမှ ပါဝင်လှုပ်ရှားခဲ့ပါသည်။
4. အာယုသုခအသင်း
—————————————————-
ကျေးရွာ၏ ကျန်းမာရေးကို စောင့်ရှောက်ပေးနေသော အဖွဲ့သို့ အင်အားဖြည့်ပေးသည့် အနေဖြင့် ငါးသိန်းစီ သုံးကြိမ် လှူဒါန်းခဲ့ပါသည်။
5. Covid ကာလ အလှူ
—————————————————-
ခက်ခဲလှသော ကိုဗစ်ကာလအတွင်းမှာလည်း အသင်းကြီးအနေဖြင့် တတ်စွမ်းသမျှ လှုပ်ရှားခဲ့ပါသည်။
- နိုင်ငံတော်အတွက် အလှူငွေ ငါးသိန်းကျပ်ကို We Love Yangon မှ တဆင့် လှူဒါန်းခဲ့ပါသည်။
- Oxygen Concentrator သုံးလုံးဝယ်ယူ၍ အသင်းသားများ၏ ကျန်းမာရေးကို အလေးထား စောင့်ရှောက်ခဲ့ပါသည်။ (တချို့ကို အသက်ကယ်နိုင်ခဲ့ပါသည်။ )
- ကိုဗစ်ကာကွယ်ရေးပစ္စည်းများ အလွန်ရှားပါးနေချိန် infrared Thermometer, Mask , Hand Gel, Coverall စသည်တို့ကို မရရအောင် ရှာဝယ်ပြီး ကျေးရွာသို့ ပေးပို့ လှူဒါန်းခဲ့ပါသည်။
- ကိုဗစ်ကာလခက်ခဲနေသူ (၁၆) ဦးကိုလည်း Amount တခု သတ်မှတ်ပြီး စီစဉ်လှူဒါန်းပေးခဲ့ပါသည်။
6. ဘဝအလင်းရောင်စာကြည့်တိုက်
—————————————————-
စာကြည့်တိုက်လည်ပတ်နိုင်ရေးအတွက် ၂၀၁၇ က အလှူငွေ နှစ်သိန်းကျပ် လှူဒါန်းခဲ့ပါသည်။
7. တံတားတည်ဆောက်ရေး
—————————————————-
ဂိုဒေါင်တံတားပြန်လည်တည်ဆောက်ရေး၊ အောက်သောင်တံတားပြန်လည်တည်ဆောက်ရေးလုပ်ငန်းများတွင် အလှူငွေများ ဝိုင်ဝန်းရှာဖွေ လှူဒါန်းခဲ့ပါသည်။ ဂိုဒေါင်တံတားတည်ဆောက်ရေးအတွက် သိန်း (၆၀) ဝန်းကျင်၊ အောက်သောင်တံတားတည်ဆောက်ရေးအတွက် သိန်း (၁၀၀) ဝန်းကျင် လှူဒါန်းနိုင်ခဲ့ပါသည်။
8. ဘုန်းကြီးကျောင်းများ
—————————————————-
ကျေးရွာဘုန်းကြီးကျောင်းများသို့လည်း များများစားစား မဟုတ်ပေမယ့် တသိန်း၊ နှစ်သိန်း စသည်ဖြင့် အခွင်းသင့်သလို လှူဒါန်းခဲ့ပါသည်။
9. အသင်းကြီး ခရီးစဉ်များ
—————————————————-
ရွာသူရွာသားများ စိတ်လက်အပန်းဖြေစေရန်၊ တစုတစည်းတည်း ပျော်ပျော်ပါးပါး ခရီးသွားလာနိုင်ရန် ရည်ရွယ်ပြီး အသင်းကြီး ခရီးစဉ်များကို ဆယ်နှစ်အတွင်း ခုနှစ်ကြိမ် စီစဉ်နိုင်ခဲ့ပါသည်။
- မော်တင်စွန်း-ချောင်းဝ-ကျောက်ကလပ် ခရီးစဉ် (၂၀၁၇)
- ကျိုက်ထီးရိုး-ပဲခူးဘုရားစုံ ခရီးစဉ် (၂၀၁၈)
- ပုဂံ-ညောင်ဦး-ပုပ္ပါး-ပခုက္ကူ ခရီးစဉ် (၂၀၁၉)
- ထားဝယ် ရှင်ကိုးရှင် ခရီးစဉ် (၂၀၂၀)
- ဇလွန်ပြည်တော်ပြန်ဘုရားဖူး ခရီးစဉ် (၂၀၂၄)
- ချောင်းဝ-မော်တင်-ကျောက်ကလပ်ခရီးစဉ် (အောက်သောင်တံတားဖွင့်ပွဲ)(၂၀၂၅)
- ပုဂံ-ညောင်ဦး ခရီးစဉ် (၂၀၂၆)
10. အသင်းသားအားလုံးတွေ့ဆုံပွဲ
—————————————————-
အသင်းသားအားလုံးတွေ့ဆုံပွဲကို (၃၂) ကြိမ်တိုင်တိုင် နေ့လည်စာများဖြင့် ဧည့်ခံပြီး စည်စည်ကားကား ကျင်းပနိုင်ခဲ့ပါသည်။
နိဂုံးချုပ်
ကျနော်တို့ အသင်းကြီး ဘာတွေလုပ်ခဲ့လဲ ဆိုတာ အမှုမဲ့၊ အမှတ်မဲ့ဆို အားလုံးပြည့်စုံအောင် မှတ်မိဖို့ မလွယ်ပါဘူး။ ဒါ့ကြောင့် အခုလို အနှစ်ချုပ်လေး ဝေမျှပေးရတာဖြစ်ပါတယ်။ အခုတော့ အားလုံး မှတ်မိသွားပြီ။ ဖတ်နေရင်း တွေးကြည့်ရင်း ပီတိတွေ ဖြစ်နေရပြီ ဟု ယုံကြည်ပါသည်။ (ကျနော်ဆို ရေးနေရင်းနဲ့ကို ကျေနပ်ပီတိဖြစ်နေမိတာပါ။ )
အခုလို အောင်အောင်မြင်မြင်ဆောင်ရွက်နိုင်ခဲ့တာတွေဟာ အသင်းသားများအားလုံးရဲ့ စဉ်ဆက်မပြတ်ထောက်ပံ့ခဲ့တဲ့ အထောက်အပံ့ကောင်းတွေကြောင့် ဖြစ်ပါတယ်။
အဝေးရောက်၊ အနီးရှိ ရွာသူ ရွာသားများရဲ့ စဉ်ဆက်မပြတ်လှူဒါန်းခဲ့တဲ့ မတည်အလှူငွေတွေကြောင့် ဖြစ်ပါတယ်။
နောက်ဆုံးအနေနဲ့ ကျနော်တို့ အသင်းကြီး အခုလို အောင်အောင်မြင်မြင်လည်ပတ်နေတာကတော့ အသင်းဝင်များရဲ့ စဉ်ဆက်မပြတ်ထည့်ဝင်ပေးနေသော လစဉ်ကြေးများကြောင့် ဖြစ်ပါတယ်။
အသင်းကြီး လုပ်သမျှ၊ လှူသမျှအားလုံးဟာ အသင်းသားများရဲ့အလှူ အများကောင်းမှု ဖြစ်ပါတယ်။
ကျေးဇူးတင်စွာဖြင့် တင်ပြအပ်ပါသည်။
သိန်းနိုင်စိုး
ချောင်းဝအသင်း-ရန်ကုန်
———————————————————
Note:
မှတ်တမ်း ဓါတ်ပုံတချို့ကို ပီတိဖြစ်စေရန် ထည့်ပေးထားပါသည်။
ထောက်ပံ့အလှူငွေ ပေးအပ်သော ပုံများ ရှိပေမယ့် ကာယကံရှင်များအား စာနာသောအားဖြင့် မထည့်ပေးတော့ပါ။
