07/07/2023
ရန်ကုန်တက္ကသိုလ်ထဲမှာ ကျောင်းသားပေါင်းရာနဲ့ချီအသတ်ခံခဲ့ရတဲ့သမိုင်း (သို့မဟုတ်) ဆဲဗင်းဂျူလိုင် ကျောင်းသားအရေးတော်ပုံ
ရန်ကုန်တက္ကသိုလ်ထဲမှာ ကျောင်းသားပေါင်းရာနဲ့ချီပြီးအသတ်ခံခဲ့ရတဲ့ သမိုင်းဖြစ်ရပ်တခု ၁၉၆၂ ခုနှစ် ဇူလိုင်လ ၇ ရက်နေ့မှာ ဖြစ်ပွားခဲ့ပါတယ်။ ဆဲဗင်းဂျူလိုင်လို့ လူသိများတဲ့အဲ့ဒီအရေးတော်ပုံဟာ ဗိုလ်နေဝင်းစစ်တပ်ရဲ့ စစ်အာဏာသိမ်းခြင်းကို ပထမဆုံးဆန့်ကျင်ခဲ့တဲ့ ကျောင်းသားလှုပ်ရှားမှုတခု ဖြစ်သလို စစ်အုပ်စုရဲ့ မင်းသားမျက်နှာဖုံးကိုခွာချပြလိုက်တဲ့ အရေးတော်ပုံလည်း ဖြစ်ပါတယ်။
လွန်ခဲ့သော နှစ်ပေါင်း ၅၀ ကျော်၊ ၁၉၆၂ ခု၊ ဇူလိုင်လ ၇ရက်၊ ထိုနေ့က နေဝင်းဦးဆောင်တဲ့ စစ်မိစ္ဆာတွေဟာ ရန်ကုန်တက္ကသိုလ်ထဲမှာ ရာကျော်တဲ့ကျောင်းသားတွေကို ရက်ရက်စက်စက် မတရားသတ်ဖြတ်ခဲ့ကြတယ်။ နောက်တနေ့နံနက် ၈ ရက်နေ့ အရုဏ်ဦးအချိန်မှာလည်း သမိုင်းအစဉ်အလာကြီးမားလှတဲ့ တကသအဆောက်အအုံကြီးကို ဗုံးခွဲဖျက်ဆီးပစ်ခဲ့ကြတယ်။
၁၉၆၂ မတ်လ ၂ ရက်နေ့မှာ နေဝင်း ဦးဆောင်တဲ့ စစ်တပ်ဟာ ဒုတိယအကြိမ်အာဏာသိမ်းခဲ့တယ်။
ဗိုလ်နေဝင်းခေါင်းဆောင်တဲ့ တော်လှန်ရေးကောင်စီအမည်ခံ အာဏာသိမ်းမှုကိုကန့်ကွက်ကြောင်း တကသ၊ ရကသ၊ ဗကသတို့က ၁၉၆၂ ခုနှစ် မတ်လ ၄ ရက်နေ့မှာပူးတွဲကြေညာချက်ထုတ်ပြန်ခဲ့ပါတယ်။ သို့သော် မတ်လ ၆ ရက်နေ့မှာ ဗကသခေါင်းဆောင် ကိုခင်မောင်အုန်းက တော်လှန်ရေးကောင်စီကိုထောက်ခံကြောင်း လက်မှတ်ရေးထိုးကြေညာခဲ့ပါတယ်။ အဲ့ဒါကြောင့် ဗကသများအဖွဲ့ချုပ်က အမှုဆောင်အစည်းအဝေးခေါ်ပြီး ကိုခင်မောင်အုန်းကို ထုတ်ပယ်ကာ ဒု-ဥက္ကဋ္ဌ ကိုသက်ကို ဥက္ကဋ္ဌတင်မြှောက်ခဲ့ကြပါတယ်။ မတ်လ ၉ ရက်နေ့မှာတော့ ရန်ကုန်တက္ကသိုလ်နဲ့ မန္တလေးတက္ကသိုလ်အက်ဥပဒေကို တော်လှန်ရေးကောင်စီက ဖျက်သိမ်းလိုက်ပါတယ်။ အဲ့ဒီနောက်မှာတော့ တော်လှန်ရေးကောင်စီက တက္ကသိုလ်ကောင်စီကို အလိုတော်ရိများနဲ့ပြန်လည်ဖွဲ့စည်းခဲ့ပြီး မတရားကျောင်းဆောင်စည်းကမ်းများထုတ်ပြန်ကာ ကျောင်းသားထုကို စတင်ဖိနှိပ်လာပါတော့တယ်။ ဒါကြောင့် ကျောင်းသားထုကြားမှာ တော်လှန်ရေးကောင်စီအပေါ် မကျေနပ်မှုတွေ တစတစ တိုးပွားလာခဲ့ပါတယ်။
၁၉၆၂ မေလ၁၄ရက်နေ့တွင်တက္ကသိုလ်ကောင်စီကို အသစ်ပြန်လည်ဖွဲ့စည်းခဲ့ပြီးထိုကောင်စီတွင် ဗိုလ်ချုပ်သန်းဖေ,ဗိုလ်ချုပ်စန်းယု,ဗိုလ်မှူကြီးသန်းစိန်,ဗိုလ်မှူကြီးတင်စိုး,ပါမောက္ခချုပ်ဦးကာတို့ဖြင့် ဖွဲ့စည်းခဲ့သည်။ကျောင်းစည်းကမ်းများကိုလည်း တင်းကြပ်စွာပြဌာန်းလိုက်သည်။ ထို့နောက် မေလ ၉ ရက်နေ့မှာ တက္ကသိုလ်အက်ဥပဒေကို ဖျက်သိမ်းခဲ့ပြီး မေလ ၁၀ရက်နေ့မှာ တက္ကသိုလ်ကောင်စီကိုဖျက်သိမ်းခဲ့တယ်။ မေလ ၁၁ရက်မှာတော့ ရန်ကုန်တက္ကသိုလ် ပါမောက္ခချုပ် ဒေါက်တာသာလှ နှုတ်ထွက်ခဲ့တယ်။ မြန်မာစာပါမောက္ခ ဦးဧမောင်လဲ အငြိမ်းစားယူခဲ့ပြီး ဆရာမင်းသုဝဏ် ဌာနပြောင်းခဲ့တယ်။ မေလ ၁၇ ရက်မှာ ပါမောက္ခချုပ်နေရာမှာ အိမ်စောင့်အစိုးရလက်ထက် ပညာရေးဝန်ကြီးဟောင်း ဦးကာကိုခန့်အပ်ခဲ့ပြီး တက္ကသိုလ်ကောင်စီကို စစ်အစိုးရအလိုကျ ပြန်လည်ဖွဲ့စည်းခဲ့တယ်။
ဇွန်လ ၁၈ရက်နေ့မှာ မတရားဖိနိပ် ချုပ်ချယ်သော အဆောင်စည်းကမ်း(၁၇) ချက်ကို ထုတ်ပြန်ခဲ့ပါသည်။ အဆိုပါစည်းကမ်းများတွင် အဆောင်ဝင်ချိန်၊ ထွက်ချိန် ကန့်သတ်တဲ့အချက်တွေ၊ ည၈ နာရီကျော်လျှင် အဆောင်အပြင်မထွက်ရ အခန်းမကူးရ ဆိုတဲ့အချက်တွေ၊ ထမင်းစားချိန်ကန့်ကွတ်တဲ့ အချက်တွေပါဝင်ခဲ့ပြီး ကျောင်းသားတွေကိူ ထိန်းချုပ်ဖို့ကြိုးစားခဲ့ပါတယ်။
ဇူလှိုင်လ ၂ ရက်နေ့မှာ အာဏာပိုင်တွေက ရန်ကုန်ခရိုင်တန်းမြင့်ကျောင်းထွက်စာမေးပွဲကို အတိအလင်းဖျက်သိမ်းခဲ့ပြန်ပါတယ်။ ထို့သို့ဖျက်သိမ်းမှုကို ကန့်ကွတ်တဲ့ အနေနဲ့ ဇူလိုင်လ ၃ ရက်နေ့မှာ ရန်ကုန်ခရိုင်ကျောင်းသားများသမဂ္ဂ (ရရက) က ဦးဆောင်ပြီး ရန်ကုန်တက္ကသိုလ် အတွင်းထဲ၌ ဆန္ဒပြခဲ့ကြပါတယ်။ ဒီဆန္ဒပြပွဲမှာ စာမေးပွဲအောင်စာရင်းထုတ်ပေးရေး၊ ကမောက်ကမ ပညာရေးစနစ်ဖြတ်သိမ်းရေးစသဖြင့် တောင်းဆိုချက်တွေအပါအဝင် တစ်ခြားတောင်းဆိုချက်တွေပါ တောင်းဆို ဆန္ဒပြခဲ့ကြပါတယ်။
ရွှေဘိုဆောင်အစည်းအဝေးမှာ ကန့်ကွက်တယ်လို့ဆုံးဖြတ်ရုံတင်မကတော့ဘဲ ကြွေးကြော်သံတွေ အော်ဟစ်ပြီး အဆောင်အပြင်ထွက်ကာ လှည့်လည်ဆန္ဒပြကြပါတော့တယ်။
ဇူလိုင် ၆ ရက်နေ့ မှာ စစ်တပ်က ဆီးနိတ်နဲ့ ကျောင်းဆောင်ကော်မတီကို ပြင်ဆင်ဖွဲ့စည်းပြန်တယ်။ အဲ့ဒီမှာ အစည်းအဝေးနဲ့ ကန့်ကွက်ရုံ မကတော့ပဲ
ညပိုင်းရောက်တဲ့အခါမှာတော့ အဆောင်တဆောင်က အဆောင်နေကျောင်းသားတွေဟာ အဆောင်တံခါးတွေကို လူအင်အားနဲ့တွန်းဖွင့်ပြီး အဆောင်ပြင်ပမှာ စုဝေးခဲ့ကြတယ်။ အဆောင်မှူးတွေက တံခါးဖွင့်ပေးဖို့ငြင်းဆန်ခဲ့ကြတဲ့အတွက် အဆောင်တံခါးတွေကို လူအားနဲ့ဖွင့်ပြီးထွက်ခဲ့ကြတာဖြစ်ပါတယ်။ ထိုအချိန်မှာ ကျောင်းသားခေါင်းဆောင်တွေဟာ အဆောင်အပြင်မှာစုဝေးနေတဲ့ ကျောင်းသားတွေကိုဦးဆောင်ကာ ကြွေးကြော်သံတွေကြွေးကြော်ကာ ကျောင်းဝင်းထဲ ဆက်လက်လှည့်လည် ချီတက်ခဲ့ကြတယ်။ အဲ့ဒီလိုလှည့်လည်ချီတက်နေရင်းနဲ့ပဲ အဲ့ဒီညမှာ ဆန္ဒပြကျောင်းသားထုကကျောင်းသားတွေပါ ချီတက်ပွဲထဲ ပူးပေါင်းပါဝင်ခဲ့ကြတယ်။ဒီလိုချီတက်ကြရင်းနဲ့ ၇ ရက်နေ့၊ မနက် ၃ နာရီမှာ လူစုခွဲပြီး ကိုယ့်သက်ဆိုင်ရာအဆောင်တွေကို ပြန်ခဲ့ကြပါတယ်။
ဇူလိုင်လ ၇ ရက်နေ့ နေ့လယ် ၁၁ နာရီ တကသအဆောက်အဦးမှာ သမဂ္ဂအဆောက်အဦအစည်းအဝေးခန်းမမှာ ကျောင်းသား၂ ထောင်ခန့် တက်ရောက်ခဲ့ကြတဲ့ကျောင်းသားထုအစည်းအဝေးတရပ် ကျင်းပခဲ့တယ်။ ထိုအစည်းအဝေးမှာ ဗမာနိုင်ငံလုံးဆိုင်ရာကျောင်းသားသမဂ္ဂများအဖွဲ့ချုပ်(ဗကသ) ဥက္ကဋ္ဌ ကိုသက်က သဘာပတိအဖြစ်နဲ့ ဗကသ အထွေထွေအတွင်းရေးမှူး ကိုတင်ထွန်းက အခမ်းအနားမှူးအဖြစ် ဆောင်ရွက်ခဲ့ပြီး ရန်ကုန်တက္ကသိုလ်ကျောင်းသားများသမဂ္ဂ(တကသ) ဥက္ကဋ္ဌ ကိုဗဆွေလေးက မိန့်ခွန်းပြောခဲ့တယ်။ ကိုဗဆွေလေးမိန့်ခွန်းမှာ ပညာရေးစနစ်ပြောင်းလဲလိုကြောင်း၊ စည်းကမ်းချမှတ်တဲ့အခါ အုပ်ချုပ်သူနဲ့ လိုက်နာရမယ့်သူ ၂ ဦး ၂ ဖက် ပါဝင်ရေးဆွဲမှသာ တကယ်လိုက်နာနိုင်မယ့် သဘာဝကျတဲ့စည်းကမ်းဖြစ်နိုင်မယ့် အကြောင်း၊ တိုးတက်တဲ့နိုင်ငံတွေမှာ အဆောင်တွေကို ကိုယ်ပိုင်အုပ်ချုပ်ခွင့်ပေးနေချိန်မှာ အခုလိုစည်းကမ်းတွေတင်းကြပ်တယ်ဆိုတာ ခေတ်နောက်ပြန်ဆွဲနေတာဖြစ်ကြောင်း၊ လက်ရှိစည်းကမ်းတွေဟာဖိနှိပ်ဖို့ ချမှတ်ထားတဲ့စည်းကမ်းတွေဖြစ်ကြောင်းတွေ ပြောကြားခဲ့ပါတယ်။ အစည်းအဝေးကိုမွန်းလွဲ ၂ နာရီမှာ အဆုံးသတ်ခဲ့တယ်။ အစည်းအဝေးအပြီးမှာတော့ ကျောင်းသားထုဟာ သမဂ္ဂအဆောက်အဦရှေ့က စတင်ကာ ကျောင်းဝန်းထဲ လှည့်လည်ကြွေးကြော်ဆန္ဒပြခဲ့ကြပါတယ်။ ကျောင်းသားတွေဟာ ဆန္ဒပြပွဲအပြီး ဘွဲ့နှင်းသဘင်ရှေ့မှာ ငြိမ်းချမ်းစွာ လူစုခွဲလိုက်ပါတယ်။ နေ့လယ် ၂ နာရီမှာ ရဲကား ၂ စီး တကသထဲဝင်လာပြီး တကသဥက္ကဋ္ဌ ကိုဗဆွေလေး၊ ဗကသ ဥက္ကဋ္ဌကိုသက်၊ ရကသ အတွင်းရေးမှူး ကိုဉာဏ်ဝင်းအပါအဝင် ကျောင်းသားခေါင်းဆောင်တွေကို ဝင်ရောက်ဖမ်းဆီးလိုက်ပါတယ်။ ရဲကားတွေဟာ ချက်ချင်းပြန်ထွက်သွားပြီး ကျန်ခဲ့တဲ့ရဲတွေကလည်း တကသကိုဝင်စီးလိုက်ပါတယ်။ ကျောင်းသားခေါင်းဆောင်တွေကို ရုတ်တရက်ဖမ်းဆီးလိုက်တာကြောင့် ကျောင်းသားထုဟာ လှုပ်လှုပ်ရှားရှားဖြစ်သွားရပါတယ်။ အဲ့ဒီနောက်မှာတော့ ကျောင်းသားတွေဟာ ရန်ကုန်တက္ကသိုလ်ဝင်းတံခါးကို သော့ခတ်ပြီး ပိတ်လိုက်ပြီး တကသဝင်းထဲဝင်ဖို့ကြိုးစားကြပါတော့တယ်။ ဒိုင်းကိုယ်စီကိုင်ထားတဲ့ ရဲတွေက ဝိုင်းဝန်းပိတ်ဆို့ပြီး နံပတ်တုတ်နဲ့ရိုက်သူကရိုက်ကာ မျက်ရည်ယိုဗုံးတွေနဲ့ စတင်ပစ်ခတ်ဖြိုခွင်းခဲ့ပါတယ်။ ကျောင်းသားတွေသွေးသံတရဲရဲဖြစ်လာပြီး ရဲများကလည်း မျက်ရည်ယိုဗုံးတွေနဲ့အဆက်မပြတ်ဖြိုခွင်းခဲ့ပါတယ်။ ကျောင်းသားတွေက အဓိပတိလမ်း တံခါးနဲ့ သထုံဆောင်တံခါးကို သော့ခတ်ပိတ်လိုက်တယ်။ ကျောင်းသားတွေက တကသကို ပြန်လုကြတယ်။ ဒိုင်းတွေနဲ့ ရဲတွေက နံပတ်တုတ်နဲ့ရိုက်တယ်၊ မျက်ရည်ယိုဗုံးသေနပ်နဲ့ ချိန်ပစ်လို့ လဲကျသူတွေရှိတယ်။ ဒဏ်ရာရသူတွေကို ပြန်ဆွဲယူပြီး တုတ်၊ ခဲများနဲ့ ပြန်တိုက်ကြတော့တယ်။
ဒဏ်ရာရ ကျောင်းသားများကို အဆောင်ပြန်ကြတော့ အဆောင်မှာ ကျန်နေတဲ့ ကျောင်းသားတွေပါ သွေးဆူကုန်ပြီး အကုန်ဆင်းခုခံကြတတော့တယ်။
ဒါပေမယ့်ကျောင်းသားထုဟာ တစတစများပြားလာခဲ့တာကြောင့် နောက်ဆုံး အဓိပဓိဂိတ် လူဝင်တံခါးကနေ ရဲတွေ ထွက်ပြေးသွားကြတော့တယ်။တက္ကသိုလ်ဝင်းထဲကပြန်လည်ထွက်ခွာသွားရပါတယ်။
ကျောင်းသားများ အောင်ပွဲခံနေတုန်း မကြာပါဘူး၊ အသင့်စောင့်နေတဲ့ တပ်ရင်း(၄)စစ်ကား ၂စီးက ဆေးရုံနဲ့ ဓမ္မာရုံဖက်ကနေ ပိတ်ဆို့ထားလိုက်တယ်။ တပ်ရင်း(၄)ဟာ ဗိုလ်နေဝင်းရဲ့ ဘော်ဒီဂတ်တပ် ဖြစ်တယ်။ ဒုဗိုလ်မှူးကြီး လှမြင့်နဲ့ ဒဗိုလ်မှူးကြီး စိန်လွင်တို့ပါတယ်။
ကျောင်းသားတွေက ဓမ္မာရုံရှေ့တည့်တည့်က အမရာဆောင်တံခါးကို ပိတ်လိုက်တယ်။ ကြားမှာ ခြံစည်းရိုးသံတိုင်တွေသာ ခြားတော့တယ်။
အခြေအနေက ပြန်ငြိမ်သက်သွားပြီး ကျောင်းသားများဟာ မြက်ခင်းမှာ ဝိုင်းဖွဲ့စကားပြောတာ၊ ထိုင်နေတာ၊ ဝရန်တာက ထွက်ကြည့်နေတာ ပုံစံအမျိုးမျိုးနဲ့ ရှိနေတယ်။
ညနေ၄နာရီအချိန်တွင် ဒုဗိုလ်မှူးကြီးစိန်လွင်ရောက်ရှိလာပြီး ကျောင်းသားကိုယ်စာလှယ်ကိုခေါ်ကာဆူပူမှူရပ်နားပါက မိမိတို့တပ်ဖွဲ့နောက်ဆုတ်ပေးမည် ဟုပြောဆိုခဲ့တယ်။ကျောင်းသားများကဒုဗိုလ်မှူကြီးစိန်လွင်ရဲ့ စကားကိုမယုံကြည်သဖြင့်ဆက်လက်စွာကြွေးကြော်ဆန္ဒပြခဲ့သည်။
ဒုမှူးဗိုလ်ကြီးစိန်လွင်သည် ရဲတပ်ဖွဲ့များကိုပြန်တပ်ဆုတ်ခိုင်းပြီး တပ်ရင်း၄မှစစ်သားများကိုအစောင့်ချလိုက်သည်။ယင်းအစောင့်တပ်သားများကိုင်စောင်ထားသောသေနတ်မှာ G3,G4မောင်းပြန်ရိုက်ဖယ်များဖြစ်သည်။
ဗိုလ်မှူးကြီးသိန်းစိန် ရောက်လာပြီး ဗိုလ်မှူးကြီးတွေနဲ့ ခဏတာ စကားပြောပြီး ပြန်ထွက်သွားတယ်။ မကြာမီ ဗိုလ်မှူးမင်းသိန်း ဂျစ်ကားနဲ့ ရောက်လာပြီး စိန်လွင့်လက်ထဲ အမိန့်စာ ထည့်သွားပြီး ပြန်ထွက်သွားတာနဲ့ မန္တလေးဆောင်၊ ရာမညဆောင်နဲ့ အဓိပတိလမ်းပေါ်က
မထင်မှတ်ထားလို့ မင်သက်မိသွားတဲ့ ကျောင်းသားတွေ
လုံးဝအသုံးပြုခြင်းမရှိသေးသော အသစ်ချက်ချွတ် G3 များဖြင့် အလစ်အငိုက် ပစ်ခတ်သဖြင့် ကျောင်းသားထုမှာ ထိုင်ရာနေရာထရာနေရာမှာတင် အကျအဆုံး များကုန်တယ်။ သတိဝင်လာပြီး ထွက်ပြေးကြရင်းမှာပင် လမ်းပေါ်တင် ကျဆုံးကုန်တယ်။ နီးစပ်ရာ အဆောင်တွေပေါ်ကို တက်ပြေးကြရင်းက လှေကားရင်းတွေမှာ အလောင်းချင်း ထပ်ကုန်ကြတယ်။ ဘေးဖက် စာကြည့်တိုက်ဝင်းထဲက ရပ်ကြည့်သူတွေကိုပါ ပစ်ခဲ့တာကြောင့် စာကြည့်တိုက်ဝင်းထဲတင် အယောက် ၄၀ ကျော် ရှိတယ်။
ကျန်ကျောင်းသားတွေက ဒဏ်ရာရသူတွေကို သယ်ပြီး ကျောင်းသားသမ္မဂ္ဂထဲ ဝင်ပြေးကြတယ်။ ရင်ပြင်ရှေ့က ကျောင်းသားတွေကို ပစ်အပြီးမှာ ကျောင်းဆောင်ထဲဝင်ပြီး တခန်းချင်း လိုက်ပစ်ကြပြန်ပါတယ်။ ဒါပေမယ့် ကျောင်းသား သမ္မဂ္ဂအဆောက်ဦကျတော့ တံခါးတွေ အကုန်ပိတ်လိုက်တာကြောင့် ဝင်ပစ်လို့ မရဘူး ဖြစ်နေတယ်။
ကျောင်းသားတွေကို နှိမ်နင်းဖို့ လုံခြုံရေးကော်မတီကို ဗိုလ်နေဝင်းက ဖွဲ့ခဲ့တာဖြစ်တယ်။ ဗိုလ်မှူးကြီး လှဟန်၊ စောမြင့်၊ သိန်းစိန်၊ ဒုရဲချုပ် ဘအေးတို့ ပါဝင်တယ်။ အဝေးကြီးမဟုတ်ဘူး၊ အသံလွှင့်ရုံထဲကနေ ရုံးထိုင်ကွက်ကဲတာ။ ညဖက်မှာ ကျောင်းသားသတ်ပွဲကြီးအတွက် နန်ကင်းဟိုတယ်က အစားအသောက်တွေနဲ့ အောင်ပွဲခံခဲ့ကြသေးတယ်။
အဲ့အချိန်မှာ ကျောင်းသားတွေကို လက်နနက်များ ထောက်ပံ့ထားကြောင်း၊ ကွန်မြူနစ်တွေရဲ့ ဌာနချုပ်ဟာ ကျောင်းသားသမ္မဂ္ဂ အဆောက်ဦး ဖြစ်ကြောင်း မတရားသတင်း လွှင့်ထားပြီးပြီ။ (အဲ့အကြောင်းကို 8-7-98 VoA အင်တာဗျူးမှာ ဗိုလ်အောင်ကြီး ဖြေခဲ့ဖူးတယ်)။
၁၉၆၂ ဇူလိုင် ၈ရက် မနက် ၃နာရီ ခန့်မှာ ကျောင်းသားသမ္မဂ္ဂ အဆောက်ဦးကြီးကို ဒိုင်းနမိုက်တွေနဲ့ ဖောက်ခွဲပစ်လိုက်ပါတော့တယ်။
ည ၇နာရီ သတင်းမှာ ဗိုလ်နေဝင်းက "၎င်းတိုင်းပြည်တာဝန်ယူစဥ် တက္ကသိုလ်ကျောင်းသားများ စည်းမဲ့ကမ်းမဲ့ ဘဝကို ပြုပြင်ရမည့် တာဝန်ကျရောက်နေသောကြောင့် တပ်မတော်၏ အင်အား တစိတ်ဒတေသ သုံး၍ ဖြေရှင်းလိုက်သည်"လို့ ကြေငြာပါတယ်။ "နိုင်ငံရေးပရောဂပါကြောင်း၊ ၎င်းတို့အလုပ်ကို နှောင့်ယှက်ပါက ဘာမှ ထပ်မပြောလိုကြောင်း၊ ဓားဓားချင်း၊ လှံလှံချင်း တုံ့ပြန်မည်"လို့ စိန်ခေါ်လိုက်ပါတယ်။
ပစ်ခတ်မှုအပြီးကျဆုံးသွားသော ကျောင်းသားအလောင်းတွေသာမက သေလုမြောပါးဒဏ်ရာရထားတဲ့ ကျောင်းသားတွေကိုစစ်ကားနဲ့ သယ်ဆောင်သွားပြီး ကျောင်းကို အကန့်အသတ်မရှိပိတ်သိမ်းလိုက်ပါသည်။
၁၉၆၃ ဇူလိုင်လ ကျောင်းတွေပြန်ဖွင့်တဲ့အချိန် သမဂ္ဂအဆောက်အဦနေရာမှာ ယာယီသမဂ္ဂတဲကို တည်ဆောက်ခဲ့ကြပါတယ်။ သမဂ္ဂခြံဝန်းထဲက ဗိုလ်အောင်ကျော်ကျောက်တိုင်အနီးမှာ ဆဲဗင်းဂျူလိုင်မှာ ကျဆုံးခဲ့တဲ့ ကျောင်းသားပေါင်းရာကျော်ကို ရည်စူးပြီးကျောက်တိုင်တခုပြုလုပ်ကာ "ရာကျော်ကျောက်တိုင်" လို့ အမည်တွင်စေခဲ့ပါတယ်။ "ရာကျော်ကျောက်တိုင်" ဖွင့်ပွဲမှာ ဆရာကြီး သခင်ကိုယ်တော်မှိုင်းက “သမဂ္ဂအဆောက်အဦကိုသာ ဖြိုလို့ရမယ်၊ အမောင်တို့ရင်ထဲက သမဂ္ဂစိတ်ဓာတ်ကို တော့ ဘယ်သူမှဖြိုလို့ မရပါဘူး” လို့ မိန့်ကြားခဲ့ပါတယ်။ ဒါပေမယ့် ပြည်တွင်းငြိမ်းချမ်းရေးဆွေးနွေးပွဲပျက်ပြားအပြီးမှာ "ရာကျော်ကျောက်တိုင်" နဲ့အတူ သမဂ္ဂတဲတို့ ဖြိုဖျက်ခံခဲ့ရပါတယ်။
သခင်ကိုယ်တော်မှိုင်းပြောခဲ့သလို
" သမဂ္ဂအဆောက်အဦးကိုသာဖြိုလိုရမယ်။အမောင်တို့ရင်ထဲသမဂ္ဂစိတ်ဓါတ်ကိုတော့ ဘယ်သူ့မှ ဖျောက်ဖျက်လို့မရပါဘူး”ဆိုတဲ့စကားအတိုင်းပဲ ကျနော်တို့ရဲ့ သမဂ္ဂစိတ်ဓာတ်က ခေတ်အဆက်ဆက်ရှင်သန်နေဆဲပါ။
ဗကသအဓွန့်ရှည်ပါစေ။
၇-၇-၂၀၂၃
ဗကသ(သဃက)
