01/09/2026
ကချင်ပြည်နယ် ဩဂုတ်လ တတိယအပတ်နဲ့ စတုတ္ထပတ်အတွင်း လူ့အခွင့်အရေးချိုးဖောက်မှု နဲ့ အခြားထူးခြားဖြစ်စဉ်
ကချင်ပြည်နယ်။ ၁၊စက်တင်ဘာလ၊၂၀၂၆
ကချင်ပြည်နယ် ဩဂုတ်လ တတိယအပတ် နဲ့ စတုတ္ထပတ်အတွင်း စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် အရပ်သား ၈ ဦးထိခိုက်ဒဏ်ရာရရှိခဲ့သည့်အပြင် အရပ်သားတစ်ဦး သေနတ်ဖြင့် ပစ်သတ်ခံရပြီး ၊ ၆ ဦးဖမ်းဆီးခံခဲ့ရပါတယ်။
ဩဂုတ်လ ၂၀ ရက်နေ့ ညနေ ၄ နာရီခွဲခန့် ရွှေကူမြို့ မော်လမြိုင်အမှတ် (၂)ရပ်ကွက်ရှိ လူနေအိမ်များတွင် စစ်ကောင်စီတပ်က ဂျက်ဖိုက်တာဖြင့် ဗုံးကျဲချမှုကြောင့် ကိုယ်ဝန်ဆောင်မိခင် တစ်ဦးအပါ အရပ်သား ၇ ဦးထိခိုက်ဒဏ်ရာရရှိခဲ့ပြီး လူနေအိမ် ၃ အိမ် ထိခိုက်ဖျက်ဆီးသွားခဲ့ပါတယ်။
ထို့နောက် ဩဂုတ် ၁၉ရက်နေ့ ရွှေကူမြို့နယ်တွင် တိုက်ပွဲဖြစ်ပွားခြင်းမရှိဘဲ စစ်ရှောင်ပြည်သူ အများအပြားခိုလှုံနေသည့် မြို့ကုန်းကျေးရွာကို စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ပြီး ဆေးရုံထိခိုက်ပျက်စီးခဲ့ကြောင်းကို လူမှုကွန်ယက်စာမျက်နှာတွင်ဖော်ပြထားပါတယ်။
ဖားကန့်မြို့၊ မရှီကထောင်ရပ်ကွက်တွင် ဩဂုတ် ၁၇ ရက်နေ့က အရပ်သားတစ်ဦး ပစ်သတ်ခံခဲ့ရပြီး ၎င်းအရပ်သားပစ်သတ်ခံရသည့် ဒေသတွင် လက်ရှိ စစ်ကောင်စီနဲ့ ပြည်သူ့စစ်တပ် ထိန်းချုပ်ထားတဲ့ နေရာ ဖြစ်ပါတယ်။
သြဂုတ်လ ၁၄ ရက်နေ့တွင်လည်း နန်းမာမြို့ ဒေါက်တာသူဇာနွယ် ဆေးခန်းမှ ဆရာဝန်နှစ်ဦး နဲ့ ဆေး သူနာပြုအကူ ၄ ဦးကို စစ်ကောင်စီ တပ်မှ ဖမ်းဆီးခေါ်ဆောင်သွားခဲ့ပါတယ်။
ဩဂုတ် တတိယပတ်အတွင်း မိုးကောင်းမြို့နယ် အင်ကြင်းကုန်းရွာတွင် KIA၊ PDF ပူးပေါင်းတပ် နဲ့ စစ်ကောင်စီ၊SNA ပူးပေါင်းတပ်တို့ကြားတိုက်ပွဲဖြစ်ပွားခဲ့ပြီး SNA ဘက်က ထိခိုက်သေဆုံးမှုတွေရှိခဲ့ကာ KIAဘက်မှ လက်နက်ခဲယမ်းအချို့ကို သိမ်းပိုက်ရရှိခဲ့ပါတယ်။
ဩဂုတ် ၃၀ ရက်နေ့တွင် ရွှေကူမြို့ဘက်သို့ ဆန်တက်လာတဲ့ စစ်သင်္ဘာတစ်စီး KIA၊ PDF ပူးပေါင်းတပ်ဖွဲ့ တိုက်ခိုက်သိမ်းပိုက်နိုင်ခဲ့ပါတယ်။
မန္တလေးမှ ရွှေကူမြို့သို့ ဆန်တက်လာတဲ့ စစ်သင်္ဘာကို KIAနဲ့ PDFပူးပေါင်းတပ်တို့က ကြားဖြတ်တိုက်ခိုက်ခဲ့ပြီး စစ်သင်္ဘာတစ်စင်း မီးလောင်ပျက်စီးကာ စစ်တပ်ဘက်မှ စစ်ဘေးရှောင်တွေ ခိုလှုံနေတဲ့ မံစီမြို့ နယ် ဟန်ထက်ကျေးရွာကို လေကြောင်းဖြင့် ဗုံးကျဲတိုက်ခိုက်ခဲ့ပါတယ်။ ၎င်းဗုံးကျဲချမှုကြောင့် အရပ်သားတစ်ဦး ထိခိုက်ဒဏ်ရာရှိခဲ့ပါတယ်။
ပြီးခဲ့တဲ့ ၂၀၂၅ ဇူလိုင်လ ဖားကန့်မြို့ မှော်ဝမ်းလေးရွာဘက် စစ်ကောင်စီနဲ့ ပြည်သူစစ်ပူးပေါင်းတပ်တို့ စစ်ကြောင်းထိုးလာတဲ့အချိန်က စပြီး ရွာသားများဘေးလွှတ်ရာသို့ ရွှေးပြောင်းနေထိုင်ခဲ့ပြီး ၁ နှစ်ကျော်အကြာ ၂၀၂၆ ဩဂုတ်လ ၂၄ ရက်နေ့တွင် စစ်ကောင်စီနဲ့ ပြည်သူ့စစ်ပူပေါင်းတပ်တို့က ရွာသားများကို ပြန်လည်နေထိုင်ခွင့်ပြုခဲ့ပြီး ရွာသားများက ရွာသန့်ရှင်းရေးလုပ်ရင်းနဲ့ အလောင်း ၂၅ လောင်းကို တူးဖော်ရရှိခဲ့ပါတယ်။ အလောင်းများ ပုပ်ပွဖျက်စီးနေပြီး မည်သူမည်ဝါဖြစ်ကြောင်းကို အတည်ပြုနိုင်ခြင်းမရှိသေးကြောင်း ဒေသခံများကပြောပါတယ်။
မိုးညှင်းမြို့နယ် SNA ပူးပေါင်းတပ်တွေက အင်းတော်ကြီးဒေသမှ လုံးတုံ၊ မိုင်းနောင်နဲ့ မမုံကိုင်ကျေးရွာတွေမှာ တပ်သားသစ်စုဆောင်းမှုကို လမ်းပေါ်မှာ ဖမ်းဆီးတာအပြင် နေအိမ်ထဲအထိ ဝင်ရောက်ပြီး ဖမ်းဆီးစုဆောင်းနေတာကြောင့် လူငယ်နဲ့ လူလတ်ပိုင်းတွေ ဘေးလွတ်ရာကို တိမ်းရှောင်နေရတယ်လို့ ဒေသခံတွေက ပြောပါတယ်။
အခြားထူးခြားဖြစ်စဉ်များအနေဖြင့် လက်ရှိတွင် မြစ်ကြီးနား-မန္တလေးကားလမ်းပိုင်းကို စစ်ရေးအခြေအနေကြောင့် ပိတ်ဆို့ထားမှုရှိနေပြီး ကုန်ကားများ ရက်ရှည်ပိတ်မိနေသည့်အပြင် ခရီးသည် တစ်ဦးသေဆုံးသွားခဲ့ပါတယ်။ မြစ်ကြီးနား-ဝိုင်းမော်ကို ဆက်သွယ်ထားသော ဗလမင်းထင်တံတားတွင် ကုန်ပစ္စည်း သယ်ဆောင်မှုကို တားမြစ်ထားတာကြောင့် ကုန်ပစ္စည်းပြတ်လတ်မှု နဲ့ ကုန်ဈေးနှုန်းအဆမတန်မြင့်မားနေမှုကို ကချင်ပြည်နယ် ပြည်သူ/သားများ ကြုံတွေ့ခံစားနေရပါတယ်။
်ဂျီ
http://www.youtube.com/-x9y
https://t.me/W_iNNrnH7JQyMDI1
https://t.me/langJinews/3
www.kachinhumanrightsinsight.org
