10/03/2026
"နိုင်ငံကြီးတွေမှာ ....
ဗုဒ္ဓဘာသာလည်း မဟုတ်ဘူး ။ 📌!
တစ်ချို့များ သူဌေးကြီးတွေ တစ်နေ့သုံးလိုက်တဲ့ အသုံးစရိတ်ဟာ ဒီမြန်မာနိုင်ငံက သူဌေးတွေရဲ့ တစ်သက်သုံးစာလောက် ဖြစ်နေတယ်တဲ့။
မြန်မာနိုင်ငံက ပစ္စည်းရှိတဲ့သူတွေရဲ့ တစ်သက်လုံး သုံးလောက်တဲ့ စည်းစိမ်ကို သူတို့က တစ်နေ့တည်း သုံးပစ်လိုက်တာပဲတဲ့ ။ ဒီလောက်ပေါတယ်တဲ့ ။ ဒါ ဗုဒ္ဓဘာသာ မဟုတ်ဘူးတဲ့ ။ ပြီးတော့ ဗုဒ္ဓဘာသာနိုင်ငံဟာ အညံ့ဆုံးဖြစ်နေတယ်တဲ့။
သီဟိုဠ်တို့ ၊ လာအိုတို့ ၊ ကမ္ဗောဒီးယားတို့ ၊ ယိုးဒယားတို့၊ မြန်မာနိုင်ငံတို့ ။ ဒီဗုဒ္ဓဘာသာနိုင်ငံကလေးတွေက လူတွေဟာ အညံ့ဆုံး ဖြစ်နေကြတယ်တဲ့ ။
ဒါ ဘယ်နှယ့်
အဓိပ်ပါယ်တုန်းတဲ့။
ဒါဟုတ်တယ် ။ စိတ်ထဲ ဇဝေဇဝါ ဖြစ်စရာ ။ ဘုန်းကြီးက ပြောချင်လိုက်တာ ။ ဘုရားအလောင်းပါရမီဖြည့်စဉ်တုန်းက ဗုဒ္ဓဘာသာဘဝနှင့် ဘယ်နှစ်ဘဝများ ရှိခဲ့ဖူးတုန်း ။ ကဲ ဇာတ်ကြီး (၁၀) ဘွဲ့ကို အကြမ်းစား စဉ်းစားကြစို့ ။ တေမိမင်း ။ ဗုဒ္ဓဘာသာဘဝမဟုတ်ဘူး ။ ဘုန်းကြီးမရှိဘူး ။ မဟာဇနကမင်း ။ ဗုဒ္ဓဘာသာမဟုတ်ဘူး ။ သူတို့ ကုသိုလ်တွေ သူတို့ ပြုသွားတာပဲ ။ မဟာဇနကမင်းကလည်း သူ့ဖာသာ ကုသိုလ်တွေ ပြုသွားတာပဲ ။ တေမိမင်းကလည်း ကုသိုလ်တွေပြု ၊ တောတွေထွက် ၊ တရားတွေကျင့် ၊ ဈာန်ရ ။ ဗုဒ္ဓဘာသာ မဟုတ်ဘူး ။ သုဝဏ္ဏသျှံ တောထဲမှာ မေတ္တာနှင့် နေရှာတာ ။ ဗုဒ္ဓဘာသာ မဟုတ်ဘူး ။ မိဘလည်း ဗုဒ္ဓဘာသာ မဟုတ်ဘူး။
နေမိမင်းကြီး ။ နာရဒ ဗြဟ္မာမင်းကြီး ။ ဗုဒ္ဓဘာသာ မဟုတ်ဘူး ။ ဝေဿန္တရာမင်းကြည့်ပါလား ။ ဗုဒ္ဓဘာသာ ဟုတ်ရဲ့လား ။ ဘယ်ဘုန်းကြီးက တရားဟောတုန်း ။ သူက ရသေ့တွေ အလှူပေးနေတာပဲ ။ သူ့ကို ဘယ်သူကမှ လာတရားမဟောဘူး။
ဒီတော့ကာ လူတွေက ဗုဒ္ဓဘာသာတွေမှ ကုသိုလ်ကံပြုတတ်တယ် ။ ဗုဒ္ဓဘာသာမဟုတ်ရင် မပြုတတ်ဘူးလို့ဆိုတော့ ဘုရားအလောင်းပါရမီဖြည့်ခဲ့တဲ့ဘဝတွေက ဗုဒ္ဓဘာသာမဟုတ်တဲ့ ဘဝတွေချည်းများတယ် ။ ဘုရားအလောင်း လေးသင်္ချေနှင့် ကမ္ဘာတစ်သိန်း ပါရမီဖြည့်စဉ်မှာ နှစ်ကျိပ်လေးဆူသာ ဘုရားပွင့်တယ်။
✴ ဗုဒ္ဓဘာသာဆိုတဲ့ ဘာသာဟာ နှစ်ဆယ့်လေးခါသာ ပေါ်ခဲ့တယ် ။ ကျန်တဲ့ အချိန်တွေ ဗုဒ္ဓဘာသာခေတ်ကို မဟုတ်ခဲ့ဘူး။
အဲဒီအတောအတွင်းမှာ ဘုရားအလောင်းတွေ ပါရမီဖြည့်တော်မူလာလိုက်ကြတာ ။ ဒီတော့ကာ ဒါလေးကို ပထမဆုံး နားလည်ပါလေ။
ခုနက သူဌေးကြီးတွေ ဗုဒ္ဓဘာသာ မဟုတ်ပေမယ့် သူတို့လည်း သူတို့နည်း သူတို့ဟန်နှင့် လွန်ခဲ့တဲ့ ဖြစ်လေရာ ဘဝတွေတုန်းက ကုသိုလ်တွေရှိမှာပေါ့ ။ သေခါနီးကျတော့ နိမိတ်တွေထင်မှာပေါ့ ။ နိမိတ်တွေထင်တဲ့အခါကျတော့ အမျိုးမျိုးသော ကံကြောင့် တချို့က ပေါများတဲ့ နိုင်ငံမှာ သွားပြီးတော့ ပဋိသန္ဓေနေကြမယ် ။ အဖေက သူဌေးလေ ။ အမေက သူဌေးလေ ။ သူတို့ကျတော့ သူဌေးလေ ။ ဘာပြောစရာရှိလဲ။
ဗုဒ္ဓဘာသာနှင့် ....ဘာဆိုင်လဲ။ 📍
ဗုဒ္ဓဘာသာ ဖြစ်တာ မဖြစ်တာနှင့် ဘာမှမဆိုင်ဘူး။
အဖေသူဌေး ၊ အမေသူဌေးနှင့်သာဆိုင်တယ် ။ နိုင်ငံကြီးနှင့်သာဆိုင်တယ် ။ အဲလိုနှင့် သူတို့ သုံးလို့မကုန်နိုင်အောင်ပေါကြတယ် ။ သုံးလို့မကုန်နိုင်အောင်ပေါတော့ကာ ဒီလူတွေက သုံးချည်းပစ်နေလားဆိုတော့ ဒီလူတွေက ဆေးရုံတွေတည်ဆောက်ကြတယ်။
သူတို့ပိုက်ဆံကြောင့် ဆင်းရဲတဲ့သူတွေ ကျန်းမာချမ်းသာစေချင်တဲ့ မေတ္တာ ၊ ကရုဏာကြီးမားလိုက်တာ ။ ထူးထူးခြားခြားစာသင်နိုင်အောင်လို့ စာသင်ကျောင်းတွေ ထောက်ပံ့ပေးနေတယ် ။ မရှိဆင်းရဲတဲ့သူတွေအတွက် ကြက်ခြေနီအသင်းဆိုပြီးတော့ ငွေတွေထည့်ပြီး ထောက်ပံ့ပေးနေကြတယ် ။ ဆေးရုံတွေဆောက်တယ်။ စာသင်ကျောင်းတွေတည်တယ် ။ မရှိဆင်းရဲတဲ့သူတွေ ကြီးပွားအောင်လို့ နိုင်ငံတွေကို ထောက်ပံ့ပေးနေတယ် ။ နည်းတဲ့သတ္တိတွေလား ၊ နည်းတဲ့ကံတွေလား ။ ဒီလူတွေက ရှေ့ကို တက်ကြပါအုံးမယ် ။ ရှေ့ကို တိုးကြပါအုံးမယ်။
အကယ်၍များ အရိမေတ္တေယျဘုရားလက်ထက်မှာ သူတို့တွေက လူ့အဖြစ်နှင့်ဆိုလို့ရှိရင် ဘုရားဆီရောက်ကြပါအုံးမယ် ။ ဘုရားဆီရောက်တဲ့အခါကျတော့ ဘုရားဆီက သစ္စာလေးပါးတရားကို နာကြားကြရပါအုံးမယ် ။ ဒီလူတွေ ၊ ဒီဉာဏ်ရှိတဲ့လူတွေ ။ ဒီတော့ကာ ကျွတ်တမ်းဝင်ချင်ရင်လည်း ဝင်သွားမယ်။
ဒါမှမဟုတ် နောက်ဘုရားလက်ထက် ကျွတ်တမ်းဝင်ဖို့ အထောက်အပံ့ကောင်းကောင်းကြီး ရသွားကြပါမယ်။
ဒါကြောင့် ဗုဒ္ဓဘာသာ ၊ ဗုဒ္ဓဘာသာဆိုပြီးတော့ စိတ်ကြီးဝင်မနေကြပါနဲ့။
ကောင်းကောင်းနေကြဖို့ အရေးကြီးပါတယ်။
ဗုဒ္ဓဘာသာဆိုပြီးတော့ အမှတ်တမဲ့နှင့် နေလို့ရှိရင်တော့ တခြားကလူတွေက ဘုန်းကြီးတို့အပေါ် ကျော်ပြီးရင်းကျော်ရင်း ၊ ကျော်ပြီးရင်းကျော်ရင်း ဖြစ်သွားကြပါလိမ့်မယ်။
နိုင်ငံငယ်ကလေးတွေမှာ ဗုဒ္ဓဘာသာဖြစ်နေရတာကတော့ နိုင်ငံငယ်ကလေးတွေမှာ စားစရာလေးတွေရှိတယ်။
ဘုန်းကြီးတွေက စားစရာကိုမှီပြီးတော့ ဘုန်းကြီးတွေဖြစ်ရတယ် ။ အဲဒီဘုန်းကြီးတွေက ဟောပြောပြီးပေးတော့မှ သူတို့တွေက အသိဉာဏ်တွေရင့်ကျက်ပြီးတော့ လာခဲ့တယ် ။ နဂိုတုန်းက မြန်မာနိုင်ငံရဲ့အသိဉာဏ်ဟာ မှန်းပြီးတော့ ကြည့်စမ်း။ အရည်းကြီးတွေကိုလက်ခံပြီးနေကတည်းကိုက မြန်မာနိုင်ငံရဲ့အသိဉာဏ်ဟာ ဘယ်လောက်ညံ့နေတုန်း ။ အရည်းကြီးတွေကို လက်ခံရမှာမဟုတ်ဘူး ။ မောင်းထုတ်ရမှာ ။ အဲဒါကို ရှင်ဘုရင်နှင့်တကွ အရည်းကြီးတွေကို လက်ခံပြီး လာကတည်းကိုက မြန်မာနိုင်ငံရဲ့ အသိဉာဏ် ဘယ်လောက်ညံ့နေတုန်း ။ ရှင်အရဟံသာ မပါလို့ရှိရင် မြန်မာနိုင်ငံ ဒီ့ထက် အသိဉာဏ်ညံ့ပါမယ် ။ ရှင်အရဟံကြွလာပြီး ဗုဒ္ဓတရားတော်တွေပါလာလို့ ဒီအခြေအနေ ဒီအရည်အချင်းတွေကို မြင်ရတာပါ။ အကယ်၍များ ဗုဒ္ဓဘာသာသာ မဖြစ်လို့ရှိရင် ဗုဒ္ဓမြတ်စွာရဲ့ တရားတော်တွေသာ မပါလာလို့ရှိရင်တော့ မြန်မာနိုင်ငံ ခုအထိ ဒီထက်ညံ့ပါအုံးမယ်။
အဲဒါလေးကို နားလည်ကြပါ။"
အရှင်ဇနကာဘိဝံသ
၁၇၊ ၄၊ ၁၉၇၃ ပဋ္ဌာန်းတရားတော်မှ ကောက်နုတ်ချက်
