15/07/2026
📢 Webinar တက်ရောက်ခွင့်ရသူများအတွက် အကြောင်းကြားစာ.....
လူကြီးမင်းတို့ စောင့်မျှော်နေကြတဲ့ Webinar အတွက် Zoom Link ကို စာရင်းသွင်းစဉ်က ပေးထားခဲ့တဲ့ Email များဆီသို့ ပို့ပေးထားပြီး ဖြစ်ပါတယ်ခင်ဗျာ
စာရင်းသွင်းထားသူများအနေနဲ့ မိမိတို့ရဲ့ Email ကို အခုပဲ ဝင်ရောက်စစ်ဆေးပေးကြဖို့ မေတ္တာရပ်ခံအပ်ပါတယ်။ 📬
💡 Email စစ်ဆေးရာတွင် အဆင်ပြေစေရန် အကြံပြုချက် -
Inbox ထဲမှာ အီးမေးလ် ရှာမတွေ့ပါက Spam, Junk သို့မဟုတ် Promotions Folder များကိုပါ သေချာလေး ထပ်မံစစ်ဆေးပေးပါခင်ဗျာ
တကယ်လို့ အီးမေးလ် လုံးဝမရရှိသေးဘူးဆိုရင်တော့ ကျွန်တော်တို့ Page ရဲ့ Messenger သို့ (မိမိစာရင်းသွင်းထားသည့် Email address လေးနှင့်တကွ) အမြန်ဆုံး လာရောက်ဆက်သွယ် စုံစမ်းနိုင်ပါတယ်။
Webinar မှာ အားလုံးနဲ့ အတူတူ ပြန်လည်ဆုံတွေ့ဖို့ စောင့်မျှော်နေပါမယ်နော်။ ✨
မြန်မာနိုင်ငံဟာ အရှေ့တောင်အာရှနိုင်ငံများအနက် ကုန်းမြေတဆက်စပ်တည်းတည်ရှိသည့် ဒုတိယအရွယ်အစားအကြီးဆုံးနိုင်ငံတခုဖြစ်ပါတယ်။ ကီလိုမီတာထောင်ချီ၊ ရာချီ ဖြတ်သန်းစီးဆင်းသွားတဲ့ ဧရာဝတီ၊ ချင်းတွင်း၊ စစ်တောင်းနဲ့ သံလွင်အပါအဝင် အခြား အဓိကကျသော မြစ်လက်တက်များစွာဖြင့် ဟိမဝန္တာတောင်တန်းကို အခြေပြုလျက် ကပ္ပလီပင်လယ်၊ ဘင်္ဂလားပင်လယ်အော်ထဲသို့ စီးဆင်းကြပါတယ်။ ဒီလိုမျိုး နိုင်ငံတခုရဲ့နယ်နိမိတ်ထဲမှာပဲ ကီလိုမီတာ ရာချီ၊ ထောင်ချီဖြတ်သန်းစီးဆင်းသွားတဲ့ မြစ်ကြီး တွေကို ပိုင်ဆိုင်ထားတဲ့ နိုင်ငံအနည်းစုသာရှိပြီး မြန်မာမှာဆိုရင် အဲဒါက တခုမကတောင် ရှိနေတာမို့ မြန်မာနိုင်ငံဟာ ရေအရင်းအမြစ် ပေါကြွယ်ဝတဲ့နိုင်ငံတခုဖြစ်တယ်လို့ ဆိုတာဖြစ်ပါတယ်။ မုတ်သုံရာသီမိုးများနဲ့ အမြဲစိမ်းတောများက ၎င်းပထဝီဝင်အနေအထားများရဲ့ ကွက်လပ်တွေကို ဖြည့်ဆည်းပေးခြင်းဖြင့် (မြန်မာနိုင်ငံအလယ်ပိုင်း အပူပိုင်းမိုးနည်းရပ်ဝန်းဇုံမှလွှဲ၍) ယေဘုယျအားဖြင့်ဆိုလျင် သာယာစိမ်းလန်းသည့် ရေမြေတောတောင်များဖုံးလွှမ်းနေသည့် နိုင်ငံတခုဖြစ်သည်ဟု ဆိုနိုင်ပါတယ်။
WWF ရဲ့ လွတ်လပ်စွာစီးဆင်းနေသောမြစ်များအကြောင်း ပိုစတာတခုမှာတော့ ဧရာဝတီမြစ်ဝှမ်းတခုတည်းပင်လျှင် နှစ်စဉ် ဂေဟဝန်ဆောင်မှုတန်ဖိုး ၇ ဘီလီယမ်ခန့် အထိ ရရှိတယ်လို့ တွက်ချက်ဖော်ပြထားပါတယ်။
အခြားတဘက်မှာလည်း အဆိုပါ မြစ်ကြီးတွေရဲ့ရေရှည်တည်တံ့ရေးဟာ စိုးရိမ်ဖွယ်ရာအခြေအနေသို့ ရောက်ရှိလို့ လာနေပါတယ်။ အဲဒီလိုဖြစ်လာစေတဲ့အကြောင်းရင်းတွေအနက် အကြီးမားဆုံး စိန်ခေါ်မှုကြီးတခုကတော့ သတ္တုတူးဖော်ရေးလုပ်ငန်းများပဲဖြစ်ပါတယ်။
သတ္တုတူးဖော်ရေးလုပ်ငန်းတွေဟာ မြစ်ချောင်းတွေကို တိမ်ကော၊ ပျက်စီးစေလာသလို မြစ်ရေအရည်အသွေးကို ပြင်းပြင်းထန်ထန် ထိခိုက်စေပြီးတော့ ရေနေဂေဟစနစ်ကိုလည်း ကြီးမားစွာခြိမ်းခြောက်လျက်ရှိပါတယ်။ အဲဒီလိုအချက်တွေကြောင့် နှစ်စဉ်ရရှိနေတဲ့ ဂေဟဝန်ဆောင်မှုတန်ဖိုးတွေဟာ လျှော့ကျလာမှာဖြစ်ပါတယ်။ ၎င်းတို့ကို အကြီးမားဆုံးရင်ဆိုင်နေရတာကတော့ ချင်းတွင်းမြစ်လို့ (သတ္တုတူးဖော်ရေးလုပ်ကွက်များအား ဂြိုလ်တုဓါတ်ပုံများမှတဆင့် လေ့လာချက်အရ) ယူဆရပါတယ်။
သတ္တုတူးဖော်ရေးဟု ဆိုရာမှာ ရွှေသတ္တုကဏ္ဍဟာ မြန်မာပြည် နေရာအနှံ့အပြား ကျယ်ကျယ်ပြန့်ပြန့် ရှိနေပါတယ်။ မြစ်ချောင်းအနီးနားတလျှောက်တူးဖော်တာ၊ ရွှေမျှောတွေအနေနဲ့ မြစ်ကြမ်းပြင်ကနေ သဲတွေကို စုပ်ယူပြီးတူးဖော်တာအပါအဝင် မြစ်လက်တက်၊ ချောင်းလက်တက်တွေနဲ့ မလှမ်းမကမ်း တလျှောက်လုံးနီးနီးမှာ အထိန်းအကွပ်မဲ့တူးဖော်ကြတာ၊ လယ်မြေတွေထဲအထိ တူးဖော်ကြတာ၊ သစ်တောမြေတွေထဲအထိ တူးဖော်ကြတာတွေဟာ လက်ရှိအချိန်မှာ ထိန်းမနိုင်သိမ်းမရအခြေအနေအထိသို့ ပိုပိုတိုး၍ ရောက်ရှိလာတာကို တွေ့ရပါတယ်။
အဲဒီလိုအရာတွေကို ဆက်လက်ပြီး အထိန်းအကွပ်မဲ့ လုပ်ဆောင်နေကြမယ်ဆိုပါက လာမည့် ဆယ်စုနှစ်တွေမှာ ချင်းတွင်းမြစ်ဟာ သာမန်ချောင်းတခုအဖြစ်သို့သာ ပြောင်းလဲလာမှာဖြစ်ပြီးတော့ အခြား မြစ်ကြီးနဲ့ မြစ်လက်တက်တွေဟာလည်း အလားတူ တိမ်ကော၊ ပျက်စီး၊ ပျောက်ကွယ်လာမည့် ကပ်ဘေးသို့ ဆိုက်ရောက်လာပါလိမ့်မယ်လို့ သုံးသပ်မိပါတယ်။
အဆိုပါ ကိစ္စပ်ရပ်များအား ထိန်းသိမ်းဆောင်ရွက်ကြတဲ့နေရာမှာ ဥပဒေ၊ စည်းမျဉ်းစည်းကမ်းများနှင့် ထိန်းကြောင်းနိုင်ဖို့လိုအပ်သလို ထိန်းသိမ်းဆောင်ရွက်နိုင်မယ့် နည်းပညာနှင့် ဗဟုသုတများကလည်း လက်လှမ်းမီဖို့က အရေးကြီးပါတယ်။
ဒါကြောင့်မို့လို့ သဘာဝပတ်ဝန်းကျင်ထိန်းသိမ်းရေးနယ်ပယ်သို့ စတင်ဝင်ရောက်လိုသူများ၊ အရပ်ဘက်အဖွဲ့အစည်းများတွင် လုပ်ကိုင်နေကြသူများ၊ သတ္တုတူးဖော်ရေးကဏ္ဍ သဘာဝပတ်ဝန်းကျင်ထိန်းသိမ်းရေးနည်းလမ်းများအား လေ့လာလိုသူများ၊ ပတ်ဝန်းကျင်ထိခိုက်မှုဆန်းစစ်ခြင်း (EIA) အစီရင်ခံစာရေးသားကြသူများ၊ သတ္တုတူးဖော်ရေးလုပ်ငန်း လုပ်ကိုင်နေကြသူများအတွက် ပညာရပ်ဆိုင်ရာ ပေါင်းကူးတံတားအဖြစ် ပံ့ပိုးကူညီပေးရန် အောက်ပါ Webinar လေးတခုကို Groundwater and Environmental Sustaianbility (Myanmar) အဖွဲ့လေးအနေဖြင့် ပြုလုပ်သွားဖို့ရှိပါတယ်။
ဆွေးနွေးပွဲလေးရဲ့ခေါင်းစဉ်ကတော့ ဖော်ပြထားတဲ့အတိုင်း "ရေရှည်တည်တံ့သော သတ္တုတူးဖော်ရေးနည်းလမ်းများ - Environmental Friendly Mining Techniques" ဖြစ်ပါတယ်။ ဆွေးနွေးပွဲမှာတော့ သတ္တုတူးဖော်တဲ့အခါ ရေအရင်းအမြစ်များအားအပါအဝင် မြေဆီလွှာ၊ လေထုနှင့် ဥတုရာသီ၊ ဇီဝမျိုးစုံမျိုးကွဲများနှင့် သစ်တောများ ထိန်းသိမ်းကာကွယ်ရေး၊ လူမှုဘဝလုံခြုံမှုနှင့် ရေရှည်တည်တံ့ရေး၊ လုပ်ငန်းခွင်ဘေးအန္တရာယ်များ စသည့် ကဏ္ဍတို့အပေါ် သက်ရောက်မှုများကို လျော့နည်းအောင် လုပ်ဆောင်ရမည့်ကိစ္စရပ်များကိုပါ ထည့်သွင်းဆွေးနွေးသွားမှာကို နားထောင်ရမည်ဖြစ်ပြီး ဆွေးနွေးမေးမြန်းခြင်း၊ အပြန်အလှန် နှီးနှောဖလှယ်ခြင်း အစီအစဉ်တွင်လည်း တက်တက်ကြွကြွပါဝင်ခွင့်ရနိုင်မှာဖြစ်ပါတယ်။
ထိရောက်သော ဆွေးနွေးပွဲလေး ဖြစ်စေဖို့ရာ လူဦးရေကို အနည်းငယ်သာ ကန့်သတ်ထားတာမို့ စာရင်းပေးသွင်းထားဖို့ မေတ္တာရပ်ခံအပ်ပါတယ်။
အောက်ပါ လင့်ခ်မှတဆင့် စာရင်းပေးသွင်းနိုင်ပါတယ်။
https://forms.gle/aDo5pcsbVVonkarN6
