19/08/2026
မိမိတို့ အဖွဲ့ဝင်တွေအနေနဲ့ ကျရာတာဝန်ကို ပြည်သူလူထုအတွက် ထမ်းဆောင်နေကြပါတယ်။
မြိုင်မှာ စစ်တပ်မီးရှို့ခဲ့တဲ့ ကျေးရွာတွေက မီးဘေးသင့်စစ်ရှောင်တွေကို FBR နဲ့ မကွေးယူနစ်အစိုးရတို့ ထောက်ပံ့
ဖက်ဒရယ် FM | ဩဂုတ်လ ၁၉ ရက်
မကွေးတိုင်း၊ မြိုင်နဲ့ ပေါက်မြို့နယ်ထဲက ရေနံမှော်တွေကို စစ်ကြောင်းထိုးနေတဲ့ အာဏာသိမ်းစစ်တပ်က လမ်းတလျှောက် မီးရှို့ခဲ့တဲ့ကျေးရွာတွေက မီးဘေးသင့်စစ်ရှောင်ပြည်သူ ၃ ထောင်နီးပါးကို Free Burma Ranger၊ မကွေးဖက်ဒရယ်ယူနစ်အစိုးရ၊ ပခုက္ကူ လူငယ်ဖွံ့ဖြိုးရေးအသင်း (PYDC)နဲ့ အညာတောအိမ်တို့ ပူးပေါင်းထောက်ပံ့ခဲ့တယ်လို့ မကွေးဖက်ဒရယ်ယူနစ်အစိုးရက ထုတ်ပြန်ပါတယ်။
မြိုင်နယ်ထဲက မီးဘေးသင့် စစ်ရှောင်အိမ်ထောင်စု ၃၈၁ စု၊ လူဦးရေအားဖြင့် ၃ ထောင်နီးပါးအတွက် ဆန်၊ ဆီနဲ့ မိုးကာတွေထောက်ပံ့ခဲ့တာလို့ ဆိုပါတယ်။
“FBR က ထောက်ပံ့တာ အကုန်။ မိုးကာကတော့ လိုအပ်တဲ့ စစ်ရှောင်တွေပေါ့။ အိမ်ထောင်စုအလိုက် ချက်စားတဲ့ အလိုက်ရော ၅ ရက်စာ ဆန်ပေါ့။ ဆီ ငါးဆယ်သားပေါ့” လို့ ထောက်ပံ့မှုပါဝင်အားဖြည့်ခဲ့တဲ့ PYDC တာဝန်ခံက ဖက်ဒရယ် FM ကို ပြောပါတယ်။
အဲဒီအိမ်ထောင်စုတွေဟာ စစ်တပ်စစ်ကြောင်းရဲ့ စစ်ကြောင်းထိုးမီးရှို့မှုကြောင့် ဘေးလွတ်ရာ ထွက်ပြေးတိမ်းရှောင်နေရတာ ၁ လကနေ ၃ လအထိ ကြာမြင့်နေပြီလို့ သိရပါတယ်။
FBR ရဲ့ ဒီထောက်ပံ့မှုတွေကို မကွေးဖက်ဒရယ်ယူနစ်အစိုးရ ဝန်ကြီးချုပ် ဒေါက်တာ ရဲထွန်းဇော်၊ ကာကွယ်ရေးဝန်ကြီး ဗိုလ်လက်ယာ၊ ကျန်းမာရေးဝန်ကြီး ဦးမိုးမင်းတို့နဲ့အတူ PYDC နဲ့ အညာတောအိမ်အဖွဲ့က တာဝန်ရှိသူတွေက စစ်ရှောင်စခန်းတွေကို ကိုယ်တိုင်သွားရောက် ပေးအပ်ခဲ့တာလို့ သိရပါတယ်။
ထောက်ပံ့မှုတွေပေးအပ်ရင်း ပြည်သူတွေရဲ့ လိုအပ်ချက်တွေနဲ့ ပတ်သက်လို့ ဆွေးနွေးမှုတွေ ပြုလုပ်ခဲ့တယ်လို့လည်း မကွေးဖက်ဒရယ်ယူနစ်အစိုးရက ထုတ်ပြန်ထားပါတယ်။
လက်ရှိမှာ ရေနံမှော်တွေကို စစ်ကြောင်းထိုးဖို့လာတဲ့ အာဏာသိမ်းစစ်တပ်စစ်ကြောင်းဟာ ကျောက်ခွက်၊ တောင်စုံနဲ့ ဝဲတူးရေနံမှော်တွေကို ထိန်းချုပ်ထားပြီး အဲဒီစစ်ကြောင်းကြောင့် မြိုင်နယ်ထဲက ကျေးရွာပေါင်း ၂၀ ခန့် ထွက်ပြေးတိမ်းရှောင်ခဲ့ရတယ်လို့ အညာမြေတပ်ပေါင်းစုက ထုတ်ပြန်ထားပါတယ်။
ရေးသူ - မင်းမြတ်
ဓာတ်ပုံ - Interim Magway Federal Unit Government
#မြိုင် #မီးဘေးသင့်ပြည်သူ #မကွေးဖက်ဒရယ်ယူနစ်
_____
Website - https://federalfmradio.com
YouTube - https://www.youtube.com/
Telegram - https://t.me/federalfm
Instagram - https://www.instagram.com/federalfmradio
TikTok - https://www.tiktok.com/
