18/04/2026
မိန်းကလေးတွေမှာ လူတွေ မမြင်နိုင်တဲ့ ဖိအားတွေရှိပါတယ်။
မသိမသာ ကြားနေရတဲ့ “ရင်းနှီးလို့ စတာပါ”ဆိုပြီး မသင့်တော်တဲ့ စကားတွေ အပြုအမူတွေက
တခါတလေ ရယ်ရတယ်…
တခါတလေ မရယ်ချင်လည်း ရယ်ပြလိုက်ရပေမယ့် စိတ်ထဲမှာတော့ အဆင်မပြေပါဘူး။
တကယ်တော့ ရင်းနှီးချစ်ခင်လို့ စတာနဲ့ နှစ်နာစေလိုတဲ့ သဘောနှိမ်ချပြောတာ ပါးစပ်အရသာခံ သားပြောမယားပြော ပြောတာက မတူသလို ပြောလိုက်တဲ့ သူအတွက် “ပေါ့ပေါ့ပါးပါး စတာ” ဆိုတဲ့ စကားတွေက အစခံရတဲ့ မိန်းကလေးတွေအတွက်တော့ မပေါ့ပါးပါဘူး။
“ငါများ ဘာဖြစ်နေလို့လဲ”
“ငါ့ပုံစံက ရီစရာကောင်းလို့လား”
“ငါ့အဝတ်အစားကြောင့်လား”
“ငါ့ခန္တာကိုယ်က သူများအမြင် မကောင်းပြောစရာ ဖြစ်နေတာများလား”
စတဲ့ မေးခွန်းတွေက စိတ်ထဲမှာ တိတ်တိတ်လေး အမြစ်တွယ်လာရာကနေ ကိုယ့်ကိုယ်ကို အပြစ်မြင်ပြီး ယုံကြည်မှုလည်းမရှိမပြောရဲ၊ မလုပ်ရဲ၊ လူရှေ့မထွက်ရဲတော့တဲ့ လူတစ်ယောက် ဖြစ်လာစေတတ်ပါတယ်။
နောက်ပြီး ဒီလိုဖိအားတွေက နေရာမရွေး လူပေါင်းစုံဆီကနေ ကြုံရတတ်ပါတယ် ……
ကျောင်းခန်းထဲက ဟာသတွေကစလို့
လုပ်ငန်းခွင်ထဲ ရောက်တဲ့အခါ ကြိုးစားလို့ ရလာတဲ့ အခွင့်အရေးကိုတောင် အရည်အချင်းကို မချီးကျူးဘဲ လိင်ကိုအခြေခံပြီး လူများ အထင်မှားစေမဲ့
“မိန်းကလေးမလို့ ရတာ” လို့ ပြောသလို “မိန်းကလေးမလို့ ဒီနေရာနဲ့ မသင့်တော်ဘူး” ဆိုတဲ့ စကားတွေက ကြိုးစားထားသမျှ အရာအားလုံးကို အလေးထားမခံရဘဲ စော်ကားခံလိုက်ရတာပါပဲ။
ဒါ့အပြင် အိမ်ထောင်ရေးမှာလည်း
“ယောက်ကျားက ပိုက်ဆံရှာပေးနေရင် တော်ပြီပေါ့ ဘာတွေ မျှော်လင့်နေသေးတာလဲ”
“မိန်းမဆိုတာ အိမ်မှာပဲနေ”
“အပြင်အလုပ် မလုပ်ရဘူး”
“အိမ်မှုကိစ္စပဲ လုပ် အိမ်ထောင်သည်က အပိုကုန်အောင် ပြင်ဆင်မနေနဲ့”
စတဲ့ စကားတွေက မိန်းမတစ်ယောက်ရဲ့ အသံကို ပိတ်ထားပြီး ရွေးချယ်ခွင့်မရှိတဲ့ လမ်းတစ်ခုထဲကို တွန်းပို့လိုက်သလိုပါပဲ။ ခံစားချက်တွေကို မပြောရဲတော့ဘူး။ လိုအပ်ချက်တွေကို မထုတ်ဖော်ရဲတော့ဘူး။
ဒီအရာတွေကို စုပေါင်းကြည့်လိုက်ရင်“မိန်းမဖြစ်ခြင်း” ဆိုတာ မမြင်သာပေမယ့် အမြဲ ထမ်းထားရတဲ့ ဝန်ထုပ်ဝန်ပိုးတစ်ခုလို ဖြစ်နေတတ်ပါတယ်။
စကားလေးတစ်ခွန်း…
အမြင်လေးတစ်ခု…
အပြုအမူလေးတစ်ခု…
သေးသေးလေးတွေလို ထင်ရပေမယ့် ဘဝတလျှောက် ထပ်တလဲလဲ ကြုံရတဲ့အခါ လူတစ်ယောက်ရဲ့ စိတ်ကို တဖြည်းဖြည်း ေ/သ စေနိုင်ပါတယ်။
ဒါကြောင့် ဒီလို စကားတွေနဲ့ စိတ်လုံခြုံမှု မရှိတဲ့ ပတ်ဝန်းကျင်မှာ ဖိအားတွေကြား တိတ်တိတ်လေး ခံစားနေရတဲ့ အမျိုးသမီးတွေကို စာနာပါ။ ကူညီပါ။ လိင်ကိုရှေ့တန်းမတင်ဘဲ လူကိုသာ ရှေ့တန်းတင်ပါ။
တကယ်တော့ အမျိုးသမီး ဖြစ်ရတာက ဝန်ထုပ်ဝန်ပိုး မဟုတ်ပါဘူး ။ ပတ်ဝန်းကျင် ဖိအားတွေကြောင့် ဝန်ထုပ်ဝန်ပိုးတခုလို့ ခံစားလာရရင် “ဒို့အထာ” မှာ ရင်ဖွင့်ဆွေးနွေးနိုင်ပါတယ် ။
#ဒို့အထာ #အမျိုးသမီး
