25/07/2026
A NUNGMI RUAHSANNAK
Rom. 15:13; 1Pet. 1:3-5
Rom laikuat hi Paul ih nganmi ainain amah cu laikuat a ngan tiang Rom khua a phathah rih lo. Peter ih kilkhawimi pawlpi tikhawh ainain amah ih dinmi cu a ii lo. Pentecost ni ah a telvemi zumtu pawl ih dinmi ik zum a ii. Judah mi le Gentile pawl a cawktiami pawlpi an ii. Rom laibu sungah Paul ih Pathian thuthlurdan famkim ngai in kan hmuh kho. Minung pawl ih sualnak, Pathian ih thinsiatnak, thiamcosaknak … tin a han thlur riahro ih a khaanpi (12)nak in cu thiamcomi pawl ih Nunzia (Christian nun) a han thlur ih, kan ruangpun cu a nungmi rai, a ikzia ih a thawh. 15:13nak ah cu Christian nun ih a thupi ngaimi, hmala ah pehzulh ih kan tah, kan tuan, kan tuar khawhnak ding caih a thupi ngaimi ‘ruahsannak’ thu a man sim.
Minung hi ruahsannak kan ngeih lo ahcun nunman ngei lo ah kan cang ih thuqha ruah, thilqha vuak leh thasuah ih hmainor dawtnak khaw a deng. Imang thilqhalo vuak khaw poi kan ti lo ih phusahih khaw kan ngei lo. Mah dawtdawt ih nun poitilonak thinlung sawn kan ngei. Curuangah zu leh sa hman, ritkhawhnak si le vai hman, titir, mi inn tih, mithah khaw poi kan ti lo ih anmah cungih thil qha lo phat ding khaw kan hrul hlei lo.
Ruahsannak leh tumtahnak a ngeitu pawl ni cu cumang thil qha lo kan hrial, kan suuptia ih kan tumtahmi caah thasuah ih kan quan, kan zuam. Ihmansela kan tumtahmi le kan ruahsannak mang in thil a cang lo tikah iseh, a lengla ih harsatnak a phunphun ruangah quan peh kho lo leh siatsuah piak an ik tikah kan ruahsannak a deng. ‘Ka vanpi a cim’ tiah kan ngaih a sia, kan tha a nau, kan thin a pit. Kan taksa le thinlung a siatsuah hlei ah kan zumnak tiang siatsuah in Pathian kan mawhthluk. Icatile kan tumtahmi leh ruahsannak pawl cu a thi khomi, a siatral khomi, a hmunlomi vuleicung thil parah hram kan bun caah a ii.
A nungmi ruahsannak timi cu a rawkralkhomi vulei cung thil parah hram qohmi a ii lo ih acuih kan tumtahmi leh ruahsanmi pawl a kimsaktu a nungmi Pathian parih ruahsannak hramqoh khi a ii. Zumtu pawl ih kan ruahsannak cu ‘Pa Pathian, (ruahsannak hram a simi Pathian-Flm Rom. 15:13); Khrih Jesuh (1Tim.1:1), Pa ih vel leh Khrih ih thawhqhannak (1Pet. 1:3-5) a ii ih Thiang Thlarau Pathian thawngin kan co (Rom.15:13). Kan Pathian cu a nungmi Pathian a ik caah kan ruahsannak khaw ‘a nungmi ruahsannak’ a ii.
Ruahsannak timi hi Bible aan a imi Hebrew aan in ‘tigvah’ tiah leh ‘yahal’ tiin an hmang in a simdawtmi cu ‘tiahfiangmi thilcang ding khi hngah’ a ii ih Noah ih lawng sungin tikeu ding a hngahmi timang ah an hmang. Greek aan in cu ‘elpizo’ lole ‘elpis’ tiah an hmang ih a simdawtmi cu ‘thil a cang teuti dingmi, tiahfiangmi khi hngah’ ti a ii thotho kau. Job laibu kan zoh tikah an tiahfiang khaihmi cu ‘itucaah miqha, mifel a imi Job ni harsatnak a tuar?’ timi a ii. A phi an hrawl ciamco ih dungtatleng ah Pathian rori a zon hrolhtia ve. Pathian ni itucaah ti a simfiang lo nain Job ih a hmuhsuahmi cu izoangza hi Pathian ih k*t sungah a om timi khi a na ceo ih zak iloin a mit rori in a hmu fiang (Job. 42:5). Habbakuk ni khaw “Itucaah miqhalo pawl ni miqha pawl an hrem, thu an ngei, an qhangso…? Timang pawl a buaipi ciamco nan dungtatleng ih Pathian a tiahfiang, a hmuhfiang hnuk cun ‘Thei kung, sabit leh oliv ni vuanglo, tuu le sumhnam ngei lo… hmansela Bawipa ah ka lungawi siksik thok’ ti hi a ii.
Curuangah khawmang dinhmun le harsatnak kan tuah hmanah izongza hi Pathian ih k*t sungah a om ti tiahfiang in, Pathian kan hemah a om ih kan tuarnak pawl a tiah, a man tuarpi ti tiahfiang ding a thupi ngai. Kan ruahsannak hi a rawkkhomi vulei thil parah leh kan tumtahnak parah hramqoh lo in cu hmawhhmawh a kimsak khotu a nungmi Pathian parah hramqoh lehu khawh a nungmi ruahsannak rum kekar vek lehu!
By Rev. Dr. Van Ro Mawi
