09/10/2026
Zgjedhja e presidentes në Kosovë – një rikthim në rrugën e përparimit
Akademia e Shkencave dhe Arteve të Shqiptarëve të Maqedonisë e ka ndjekur me interesim të vazhdueshëm situatën politike në Kosovë gjatë dy viteve të fundit, periudhën e ngërçit politik dhe ciklet e pandërprera zgjedhore, të cilat nuk arritën të prodhonin përparimin e nevojshëm për shoqërinë kosovare.
Zgjedhja, para disa ditësh, e presidentes, akademikes Justina Shiroka-Pula, përbën një hap të rëndësishëm të mençurisë politike, të mundësuar nga dialogu, i cili nxori në pah, si vlerë të veçantë, interesin jetik të qytetarëve të Kosovës.
Kosova nuk ka më kohë për inate politike dhe ecje në vendnumëro. Ajo ka nevojë për institucione të fuqishme dhe për një elitë politike që nuk e shpenzon energjinë në garën se kush do ta mposhtë tjetrin, por që angazhohet për zhvillimin e vendit, mirëqenien e qytetarëve dhe forcimin e demokracisë.
Vetë fakti që presidentja u zgjodh në momentet e fundit tregon se zgjidhja ka qenë e mundshme gjatë gjithë kohës, por se asaj i kanë paraprirë mungesa e tolerancës politike dhe anashkalimi i interesave të qytetarëve të Kosovës.
Akademia jonë është e bindur se personaliteti shkencor dhe politik i presidentes së re do të sjellë një cilësi të re në kulturën politike dhe në zhvillimin e dialogut të vazhdueshëm, si një ndër themelet e shoqërive me traditë demokratike liberale.
Akademia e Shkencave dhe Arteve të Shqiptarëve të Maqedonisë i uron presidentes së re suksese në përmbushjen e detyrës së saj të lartë shtetërore, në shërbim të qytetarëve, demokracisë dhe perspektivës evropiane të Kosovës.
Tetovë, 09.10.2026
Nga Këshilli për Informim
Kryetar, Prof. Dr. Hasan Jashari