Kontext

12/05/2026

Почитувани пријатели-поети, колеги, соработници - објавен е годинешниот конкурс за необјавена песна за 9. издание на Меѓународната поетска манифестација „Антево слово“ 2026 година!

🗓️ рок за испраќање: 30 јуни 2026 година
✍️ email: [email protected]

9. ИЗДАНИЕ НА АНТЕВО СЛОВО 2026 – МЕЃУНАРОДЕН КОНКУРС ЗА ПОЕЗИЈА ВО СИЦИЛИЈА, ИТАЛИЈА

✍️ Меѓународната поетска манифестација „Анџело Ла Векија“ („Il Parnaso - Concorso di Poesia - Premio Angelo La Vecchiao“), во соработка со Здружението за развој на култура и заштита на културно наследство „Контекст - Струмица“ (Kontext) годинава по деветти пат го распишува конкурсот за најдобра необјавена поетска творба „Антево слово“, специјална награда на фестивалот, востановена во чест на великанот на македонската поезија Анте Поповски.

👉 На конкурсот можат да учествуваат поети од Македонија кои ќе испратат една своја необјавена песна на e-mail адресата: [email protected] на македонски и италијански или англиски јазик. Со учеството на овој конкурс истите автоматски учествуваат и за носечката награда на манифестацијата „Парнас – награда на Анџело Ла Векија“. Поезијата може да се испраќа до 30 јуни 2026 година.

📚 Претставниците на манифестацијата велат дека конкурсот за поезија е создаден со цел да се прослави и овековечи, преку „возвишена поезија“, духот, душата, суштината и есенцијата на животот. Најмногу пријавени поети има од Италија, но меѓу учесниците има поети од цела Европа, Балканот и пошироко. Специјалната награда „Антево слово “ ќе ја координира интернационална жири-комисија со која ќе претседава поетот од Македонија Митко Гогов, поет и претствник на Здружение за развој на културата и заштита на културното наследство „Контекст - Струмица“. Специјалната награда „Антево слово“ официјално ќе се додели летото, 2026 година во Каникати, Сицилија, како дел од програмата на меѓународната поетска манифестација „Парнас – награда на Анџело Ла Векија“.

📖 Сите пријавени учесници ќе имаат можност да влезат во конкуренција за двете награди, носечката награда „Анџело Ла Векија“, награда која е именувана по проф. Анџело Ла Векија, познат во Сицилија и на територијата на Италија со неговата работа како поет, драмски писател, историчар и професор и специјалната награда „Антево слово“ која ќе се доделува во чест на Анте Поповски, познатиот македонски поет, есеист, препејувач и публицист.

01/01/2026

КУЛТУРАТА Е ЖИВ КОНТЕКСТ НА ИДНИНАТА

На прагот на новата година, времето повторно нè повикува на тивка, но длабока пресметка со себе: што создадовме, што зачувавме и што сме подготвени да изградиме понатаму. За Здружението за развој на културата и заштита на културното наследство „Контекст – Струмица“, новата година не е само календарски премин, туку простор за нови идеи, нови гласови и нови средби меѓу минатото и иднината.

Пред нас се отвора година на проекти што ќе го зборуваат јазикот на смислата, настани што ќе создаваат дијалог, фестивали што ќе ја поврзуваат локалната меморија со современите културни текови. Очекуваме нови странски гости, уметници, истражувачи и пријатели на културата, кои ќе го донесат светот во Струмица, но и ќе ја понесат Струмица со себе - како искуство, како приказна, како контекст што се памети.

Новата година носи можности што се отвораат само за оние кои се подготвени да мислат храбро и да дејствуваат одговорно. Нашата мисија останува јасна: културата да не биде украс, туку потреба; наследството да не биде сенка, туку живо присуство; а заедницата - активен учесник, а не тивок набљудувач. Веруваме дека преку знаење, креативност и соработка, можеме да создадеме простор каде културата не се троши, туку се продлабочува.

Нека новата година ни донесе јасност во визијата, истрајност во работата и мудрост во одлуките. Нека секој проект биде чекор кон поголема културна зрелост, а секоја средба, потврда дека вистинските вредности опстојуваат кога се негуваат со љубов и одговорност.

Со надеж, доверба и отвореност кон иднината,
Ви посакуваме среќна, плодна и успешна Нова година.

—
Здружение за развој на културата и заштита на културното наследство
„Контекст – Струмица“

04/11/2025

Честитки за Марина Икономова Шокева, останатите наградени автори и сите учесници на годинешното издание на Меѓународната поетска манифестација „Антево слово“ 2025 година! :)

МАРИНА ИКОНОМОВА ШОКЕВА Е ЛАУРЕАТ ЗА АНТЕВО СЛОВО 2025 ГОДИНА

Меѓународната поетска манифестација „Анџело Ла Векија“ („Il Parnaso – Concorso di Poesia – Premio Angelo La Vecchia“), во соработка со Здружението за развој на култура и заштита на културно наследство „Контекст - Струмица“ годинава по осми пат ја доделува наградата за најдобра необјавена поетска творба „Антево слово“, специјална награда на фестивалот, востановена во чест на великанот на македонската поезија Анте Поповски.

Меѓу учесниците, освен поети од Македонија имаше автори и од Англија, Албанија, Бугарија и Србија, а во поширокиот избор влегоа: Фросина Тасевска, Белинда Шипкоска, Александар Михајловиќ, Александра Велинова, Миа Димевска, Емануела Ковачевска Китановска и Зорица Поп Илиев.

Жири комисијата во состав: Митко Гогов (претседател) и Жорж Поповски и Геро Ла Векија (членови), по пристигнати стотина песни едногласно одлучија да ја доделат првата награда на Марина Икономова Шокева за песната „Летото одминува“.

НАГРАДЕНИ АВТОРИ:

1. Марина Икономова Шокева – „ЛЕТОТО ОДМИНУВА“
2. Катерина Панов Кожаров – „КАФЕЗ“
3. Димче Шипинкаровски – „ШЕПОТОТ НА ТАТКО МИ“
Силвана Димитриевска – „ПРАВДА“

Млад автор:
Васја Мицковски – „ВРЕМЕ - ВЕТЕР“

ОБРАЗЛОЖЕНИЕ:

Песната „Летото одминува“ на Марина Икономова Шокева е едно од оние ретки лирски сведоштва во кои минливоста не звучи како губиток, туку како благородна преобразба. Таа е носталгична поема на меморијата и на времето - на детството како мит и на семејството како оска на идентитетот. Летото во неа не е само сезона, туку симболичен простор на чистота, игра и топлина, каде радоста е едноставна и телесна, а светот се мери со бојата на лубеницата и со смевот на таткото.

Уште во почетните стихови: „Сè почесто се сеќавам на насмевката на татко ми / налик на кришка од големата лубеница“, поетесата го отвора текстот со метафора од редок визуелен и емотивен интензитет. Насмевката – плодна, сочна, распукната под ножот на времето - ја означува суштината на животната сладост што исчезнува. Таа ја претвора сликата на детството во света литургија на простите радости, во која вкусовите, боите и звуците стануваат јазик на нежноста и на споменот.

Во вториот дел од поемата, Шокева маестрално го воведува контрастот меѓу минливото и вечноста. Реченицата „малку знаевме... дека ни летото, ни насмевката на татко ни̒ нема да траат вечно“ ја отвора егзистенцијалната димензија на делото, каде детската невиност се судрува со зрелата свест за смртноста. Тоа е момент на поетска и духовна катарза, каде емоцијата станува созерцание.

Структурата на песната е наративна, но и лирски исповедна, градејќи мост меѓу личното и универзалното. Со реторичка едноставност и ритмична смиреност, авторката создава простор во кој секој читател може да се пронајде - во гласот на мајката, во сенката на таткото, во вкусот на летото што никогаш не се враќа исто.

Во последните стихови: „Јадете деца наши, смејте се, љубете го летото...“, поетесата нè води кон етичка и духовна порака, кон повик за љубов и благодарност. Тука песната го преминува својот интимен праг и станува универзална химна на животот, на наследството на топлината и човечноста.

Како кај италијанскиот поет Џузепе Унгарети, кој вели дека „секој миг е вечност кога го љубиш“, така и кај Шокева летото не исчезнува - тоа се преобразува во сеќавање што гори тивко во секое ново дете што вкусува лубеница под сонцето на нечиј татко.

Не е случајно што оваа песна ја доби првата награда на Меѓународната поетска манифестација „Антево слово“, дел од Меѓународната поетска манифестација „Анџело Ла Векија“ - затоа што таа носи во себе вистинитост, интимност и едноставна сила.

„Летото одминува“ е поема што не старее - таа останува во нас како трага од сонце на усните на споменот.

01/01/2025

🎄 ✨ Здружението за развој на културата и заштита на културното наследство „Контекст-Струмица“ Ви посакува среќни и весели Новогодишни и Божиќни празници! :)