Bamirësit Struganë

21/06/2026

📦 DONACIONET I KEMI, DEPON JO
Kërkojmë një hapësirë për ruajtjen e ndihmave humanitare.
Të nderuar miq,
Për shkak të projekteve të shumta humanitare dhe materialeve që po grumbullojmë për ndërtimin e shtëpive për familjet në nevojë, kemi nevojë për një depo ose hapësirë të mbyllur ku mund t’i ruajmë materialet ndërtimore dhe donacionet.
Shpeshherë na ofrohen orendi shtëpiake, veshmbathje dhe mjete të tjera të nevojshme për familjet në nevojë, por për mungesë të një hapësire për ruajtje, jemi të detyruar t’i refuzojmë këto donacione.
Nevoja për një depo është shumë e madhe. Nëse keni një magazinë, depo ose ambient që nuk e shfrytëzoni, dhe mund ta vini në dispozicion për këtë qëllim humanitar, do të na ndihmonit jashtëzakonisht shumë. Hapësira do të menaxhohet dhe mirëmbahet nga zyra e Shoqatës Humanitare “Bamirësit Struganë”.
Çdo ndihmë, sado e vogël, na ndihmon të jemi më të organizuar dhe të arrijmë te më shumë familje që kanë nevojë.
🤝 Kontaktoni Shoqatën Humanitare “Bamirësit Struganë”
📞 071 313 991
Faleminderit për besimin dhe mbështetjen tuaj!

19/06/2026

🙏 MIRËNJOHJE DHE FALËNDERIM

Shoqata Humanitare “Bamirësit Struganë” shpreh mirënjohjen dhe falënderimin e saj më të sinqertë për kompaninë ProTec Leckortung dhe pronarin e saj, Haris Isaku, i cili jeton dhe vepron në Gjermani.

Falë bujarisë së tij, shoqata jonë ka pranuar një donacion të vlefshëm, një mbështetje e çmuar që do të shërbejë për realizimin e projekteve tona humanitare dhe për ndihmën e familjeve në nevojë.

Ky gjest është dëshmi se humanizmi nuk njeh kufij dhe se bashkatdhetarët tanë, kudo që ndodhen, vazhdojnë të qëndrojnë pranë njerëzve që kanë nevojë për mbështetje.

Në shenjë respekti dhe mirënjohjeje, patëm kënaqësinë t’i ndajmë një Mirënjohje z. Haris Isaku për kontributin e tij të vyer në mbështetje të misionit tonë humanitar.

Faleminderit për besimin, zemërgjerësinë dhe solidaritetin tuaj.

Me respekt,

❤️ Shoqata Humanitare “Bamirësit Struganë”

17/06/2026

NDËRTOJMË NJË SHTËPI TË RE PËR FAMILJEN S.S. NGA OHRI

Familja 6-anëtarëshe e S.S. nga Ohri është zgjuar disa herë me shtëpinë plot ujë, duke parë me sytë e tyre si uji shkatërron çdo gjë që kishin ndërtuar me vite mundi.

Çdo herë që uji ka hyrë në shtëpinë e tyre, kanë mbledhur forcat, kanë riparuar çka kanë mundur dhe kanë vazhduar përpara, me shpresën se herën tjetër do të jetë më mirë. Por vërshimet e njëpasnjëshme kanë shkatërruar çdo investim. Kjo është realiteti që kjo familje e jeton prej vitesh. Shtëpia sot nuk është më e banueshme. Ka ardhur koha që ajo të ndërtohet nga e para.

Ne nuk mund t'ua kthejmë vitet e vështira që kanë kaluar, frikën e netëve me shi apo lodhjen e kësaj lufte të pabarabartë me natyrën. Por mund t'u japim atë që çdo familje meriton - një strehë të sigurt e të ngrohtë, që e quajnë "shtëpi" pa frikë.

Shoqata Humanitare "Bamirësit Struganë" merr përsipër këtë mision dhe shpreson që, së bashku me ju, ta bëjë realitet një shtëpi të re për këtë familje.

Çdo kontribut, sado i vogël, është një gur drejt kësaj shtëpie të re. Bashkohuni me ne.
Për donatorët brenda shtetit:
Emri i llogarisë: HZBS Nr. xhirollogarisë: 210-075048960117
Banka: NLB BANKA AD SKOPJE
Për transfere nga jashtë:
Emri i llogarisë: HZBS
IBAN: MK07210722000117340
SWIFT: TUTNMK22
Adresa: Karaorman 21, Strugë
Online:
WhyDonate: https://whydonate.com/fundraising/ndertojme-nje-shtepi-te-re-per-familjen-ss-nga-ohri

Kontakt – Zyra:
Prapa postës, 08:00 – 16:00
Tel: +389 71 313 991
E-mail: [email protected]

16/06/2026

🌟 English Club gjatë verës për fëmijët e klasave 5–8!

Shoqata Humanitare Bamirësit Struganë, në bashkëpunim me vullnetarët e Peace Corps USA, mirëpret një program veror falas në gjuhën angleze për nxënësit e klasave të 5-ta deri në të 8-ta.

Gjatë takimeve, fëmijët do të kenë mundësi të praktikojnë anglishten me folës amtarë, të marrin pjesë në aktivitete kreative, lojëra edukative dhe të krijojnë miqësi të reja në një atmosferë të ngrohtë dhe argëtuese.

Kurset do të zhvillohen në ambientet e shoqatës sonë dhe pjesëmarrja është plotësisht falas.

📍 Regjistrohuni dhe bëhuni pjesë e një vere plot mësim, shoqëri dhe përvoja të bukura! Mund të kontaktoni në emailin: [email protected]

16/06/2026

Me kënaqësi ju njoftojmë se M.A. ka filluar rrugëtimin e trajtimit të tij mjekësor, pas një periudhe të nevojshme rikuperimi dhe përgatitjeje para trajtimeve.

Falë mbështetjes së donatorëve tanë, mjetet financiare për këtë rast ishin siguruar më herët, ndërsa tani janë krijuar kushtet që trajtimi të nisë sipas planit të mjekëve.

I urojmë M.A. shumë forcë, shëndet dhe sukses në këtë proces. Faleminderit të gjithë atyre që u bënë pjesë e kësaj mbështetjeje humane.

15/06/2026

Apel për ndihmë: Nëna e 3 fëmijëve po përballet me leukemi akute, familja kërkon mbështetje për trajtim jashtë vendit

Një apel urgjent për ndihmë është publikuar për qytetaren Fidane Kalludra Beqiri, e cila është diagnostikuar me leukemi akute me rrezik të lartë dhe aktualisht ndodhet në gjendje të rëndë shëndetësore, njofton Mitropol.

Sipas familjarëve, Fidanja, nëne e tre fëmijëve ka nevojë urgjente për trajtim jashtë Kosovës, pasi terapia e nevojshme dhe transplanti i palcës kockore nuk mund të realizohen në vend.

Në thirrjen publike për ndihmë thuhet se çdo ditë është vendimtare për jetën e saj, ndërsa familja po kërkon mbështetje financiare nga qytetarët, miqtë dhe mërgata për të mundësuar trajtimin sa më shpejt.

“Çdo ndihmë, sado e vogël, është shpresë për shërim”, thuhet në apelin e publikuar nga familja.

Për të gjithë ata që dëshirojnë të kontribuojnë financiarisht, janë bërë publike të dhënat bankare për donacione:

Përfituesja: Fatime Kalludra
Banka: BKT
Xhirollogaria: 1951152342021133
Linku për donacione: https://gofund.me/cfa590e70

Familja ka falënderuar të gjithë qytetarët për mbështetjen, shpërndarjen e apelit dhe lutjet për shërimin e Fidanes.

Të dashur miq, Po ju drejtohemi me një lutje të sinqertë për … Arblis Baliu needs your support for Fidanes i duhet ndihma e jonë.Fidane needs our Help.

15/06/2026

🎓 RAPORT DHE FALENDERIM PËR BURSAT STUDENTORE 2025/2026
Kemi nderin dhe krenarinë t’ju informojmë se programin e bursave për vitin akademik 2025/2026 e kemi përmbyllur me sukses, duke financuar gjithsej 37 bursa për nxënës dhe studentë.
Programi i bursave është një ndër shtyllat më të rëndësishme të Shoqatës Humanitare “Bamirësit Struganë”. Këtë rrugëtim e kemi nisur vite më parë me vetëm 14 bursa, ndërsa falë mbështetjes dhe solidaritetit të donatorëve tanë, kemi arritur ta zgjerojmë këtë program vit pas viti.
Sot, me pagesën e këstit të fundit, mbyllim me sukses edhe një vit akademik.
📊 Gjatë vitit 2025/2026 janë shpërndarë:
▪️ 37 bursa : 29 studentë, 8 gjimnazistë
Vlera totale e bursave: 1.980.000 denarë.
Pas këtyre rezultateve qëndrojnë njerëz me zemër të madhe, të cilët besuan në këtë mision dhe kontribuan sipas mundësive të tyre.
Mirënjohja jonë shkon për pronarët e bizneseve të qytetit dhe rrethinës sonë, qofshin ato biznese të vogla, të mesme apo të mëdha. Po aq mirënjohës jemi ndaj familjeve që morën përsipër financimin e një burse të plotë, duke sjellë çdo muaj kontributin e tyre në zyrën tonë.
Një falenderim i veçantë u takon pensionerëve tanë në diasporë, të cilët nga pensionet e tyre mundësuan financimin e disa studentëve gjatë këtij viti. Po ashtu, falenderojmë bashkatdhetarët tanë që jetojnë dhe veprojnë në diasporë, të cilët sa herë vijnë për pushime në vendlindje, nuk largohen pa kaluar në zyrën tonë për të dhënë kontributin e tyre dhe për të mbështetur këtë mision fisnik.
Mirënjohje shprehim edhe për qytetarët e thjeshtë të Strugës dhe më gjerë, të cilët nga pagat dhe të ardhurat e tyre ndanë aq sa patën mundësi dhe u bënë pjesë e këtij fondi gjatë gjithë vitit shkollor.
Secili kontribut, pavarësisht madhësisë së tij, ka pasur një rëndësi të jashtëzakonshme në realizimin e këtij misioni. Prandaj, i falenderojmë të gjithë pa dallim, sepse çdo bursë e ndarë mban brenda saj një pjesë të mirësisë së secilit prej tyre.
Shpresojmë që në vitin akademik 2026/2027 të arrijmë të mbështesim edhe më shumë nxënës dhe studentë që kanë nevojë për ndihmën tonë.
Investimi në arsim është investimi më i sigurt për të ardhmen.

12/06/2026

Mirënjohje dhe falënderim 🤍

Patëm nderin të mirëpresim në zyrën tonë z. Mitat Toska, aktivist i Albanian-American Islamic Center në Chicago.

Gjatë takimit, shprehëm falënderimet tona të sinqerta për mbështetjen e vazhdueshme që ai dhe komuniteti që përfaqëson kanë dhënë për aksionet dhe projektet tona humanitare.

Falë bujarisë dhe solidaritetit të tyre, shumë familje në nevojë kanë marrë ndihmën e nevojshme dhe kanë gjetur shpresë në momente të vështira.

Ju falënderojmë për besimin, humanizmin dhe kontributin tuaj të çmuar. Zoti ju shpërbleftë për çdo vepër të mirë.

#

11/06/2026

Punimet në shtëpinë e Tatesh*t po vazhdojnë me ritëm të mirë.

Pas instalimit të rrjetit elektrik dhe ujit, sot u përfundua edhe dora e parë e lyerjes së mureve.
Çdo hap na afron më pranë qëllimit për t'i siguruar familjes një shtëpi më të sigurt dhe më dinjitoze për jetesë.
Së bashku po e kthejmë ndihmën në vepra konkrete. 🤍