Habitat for Humanity Macedonia

20/08/2026

По потпишувањето на Меморандумот за соработка со Хабитат Македонија, Општина Македонска Каменица објави Јавен повик за субвенции за изработка на проектна документација и поставување на енергетски-ефикасни фасади и реконструкција на кровови на станбени згради за колективно домување. Општината обезбеди субвенции од дури 40% од вкупната вредност на инвестициите за реновирање на згради, овозможувајќи им на граѓаните побрзо и полесно да ја подобрат енергетската ефикасност во своите домови. Поддршка за граѓаните на Македонска Каменица обезбеди и проектот OSS HABITAT финансиран од ЕУ, од каде ќе се покријат трошоците за изработка на техничката документација за реновирање на станбените згради. Повеќе информации за јавниот повик можете да добиете на следниот линк: https://makedonskakamenica.gov.mk/subvencii-energetsko-efikasni-domovi-kamenica/

04/08/2026

Хабитат Македонија стана дел од новиот Ресурсен центар на Општина Карпош кој преку вмрежување со невладините организации ќе овозможи реализација на проекти и активности во интерес на локалната заедница. Во наредниот период, преку едношалтерскиот систем на услуги OSS HABITAT, за граѓаните на Карпош ќе се обезбедат услуги и поддршка за енергетски-ефикасно реновирање на нивните домови. Покрај стручната поддршка и моделите за финансирање на проектите за енергетски-ефикaсно реновирање на домовите, Хабитат Македонија ќе обезбеди мониторинг и примена на високи технички стандарди при изведбата на мерките за енергетска ефикасност. Дополнително, преку Акцелераторот за енергетска обнова на станбени згради ќе се олесни процесот на колективно одлучување за обнова на фасадите, покривните конструкции, поставување на фотоволтаици и замена на дотраените со енергетски-ефикасни прозорци во колективните станбени згради.

31/07/2026

Триесет волонтери, претставници на Thrivent од повеќе американски држави, деновиве им помагаа на 16 велешки семејства да добијат нов дом во седмата зграда, во населбата Хабитат во Велес. Во рамки на GV и New Builds програмата, волонтерите придонесоа за завршните работи за изградба на зградата. Волонтерскиот тим посветено работеше на ископ на одводен канал и канал за електрични инсталации, монтажа на гипс-картонски плочи, глетување, обработка и бојадисување на внатрешни ѕидови, бојадисување на метални огради како и на транспорт на градежни материјали и фугирање на керамички плочки во кујните и санитарните јазли. Волонтерите се дружеа со семејства од населбата и учествуваа во активностите за социјално учење преку подготовка на традиционални македонски специјалитети. Во рамки на нивниот престој во Македонија, тие го посетија Скопје и археолошкиот локалитет Стоби.

22/07/2026

16 велешки семејства се сè поблиску до остварување на сонот за пристоен дом. Петтиот тим на волонтери од САД и Канада деновиве работеше на завршните работи за изградба на станбените единици во седмата зграда, во населбата Хабитат во Велес. 11 волонтери работеа на подготовки, бојадисување на внатрешните ѕидови во становите како и на фугирање на плочките во кујните и санитарните јазли. Како и претходните тимови, тие имаа можност да ја разгледаат околината на Велес и да се запознаат со културните вредности и традиции. Досега на изградбата на седмата зграда работеа вкупно 114 волонтери од кои 57 од САД и Канада ангажирани во рамки на GV програмата и 60 локални волонтери ангажирани од Хабитат Македонија, во рамки на одбележувањето на дваесетгодишниот јубилеј на организацијата. Следниот волонтерски тим се очекува да започне со работа на 27 јули годинава.

09/07/2026

Од Њујорк до Велес, хуманоста не познава граници. Во рамките на програмата Global Village на Habitat for Humanity International, десет волонтери деновиве го донесоа духот на Бруклин во срцето на Македонија. Во населбата Хабитат во Велес тие работеа на изградбата на седмата зграда каде нови домови ќе добијат 16 семејства со пониски приходи. Волонтерите ги молерисуваа внатрешните ѕидови на становите, бојадисуваа огради на внатрешните скали и балконите и работеа на фугирање на плочки во санитарните јазли и кујните. Во рамките на престојот во Македонија, покрај Велес, тие имаа можност да ги посетат Скопје и Охрид и да се запознаат со македонската традиција и култура. Волонтерите се вклучија и во глобалната кампања „Да ја отвориме вратата“ посветена на семејствата ширум светот што немаат пристоен дом.

24/06/2026

Во духот на Хабитат, волонтерството повторно го освои Велес. Од 15 до 19 јуни годинава, тринаесет волонтери од Северна Калифорнија посветено работеа на изградбата на 16 нови домови за семејства со ниски приходи. Во седмата зграда на населбата Хабитат во Велес, волонтерите поставуваа спуштени плафони од гипс картон, глетуваа и бојадисуваа внатрешни ѕидови и поставуваа хидроизолација во санитарните јазли. Волонтерите кои поминаа илјадници километри за да им помогнат на велешките семејства беа целосно посветени на работата и покажаа што значат човечноста и хуманоста на дело. Тие се дел од вкупно 12 тимови што Хабитат Македонија ќе ги пречека годинава во рамките на програмата Global Village на Habitat for Humanity International. И оваа група волонтери имаше можност да се запознае со традицијата на грнчарството во Велес, како и со историските вредности на регионот во археолошкиот локалитет Стоби.

19/06/2026

На 18 јуни годинава, тимот на проектот OSS HABITAT ги претстави придобивките од проектот за подобрување на енергетската ефикасност во домувањето пред граѓаните на Македонска Каменица. На промотивниот настан што се одржа во Домот на културата во Македонска Каменица присуствуваа педесетина претставници на заедници на станари, управители на станбени згради и граѓани на Македонска Каменица. Градоначалничката Соња Стаменкова ги информираше присутните дека проектот OSS HABITAT ќе им помогне на граѓаните кои сакаат да ја подобрат енергетската ефикасност на своите домови. Како што најави Стаменкова, Општина Македонска Каменица од буџетот ќе издвои средства за субвенции до 40% за реконструкција на енергетски ефикасни фасади и покриви на станбени згради на подрачјето на општината. На настанот, проектниот тим ги презентираше сите чекори што OSS HABITAT ги овозможува на едно место, за побрз и полесен пристап на граѓаните до мерките за енергетски поефикасни домови.

01/06/2026

Habitat3E Локалните енергетски тимови и претставници на општините Новаци и Могила на 22 мај годинава, во Битола имаа можност да се запознаат со методологијата на Хабитат Македонија за унапредување на управувањето со енергија на локално ниво. На обуката посветена на процесите за креирање, имплементација на локални политики и примена на мерки за подобрување на енергетската ефикасност во јавниот и резиденцијалниот сектор, претставниците на Хабитат Македонија ги запознаа присутните со специфичните чекори и индикатори во процесот на развивање на Општински програми за енергетска ефикасност, во рамки на проектот „3Е“. Обуката придонесе за зајакнување на капацитетите на општинските администрации за прибирање на податоци, анализа и подготовка на програмите за енергетска ефикасност на Новаци и Могила.

28/05/2026

26/05/2026

Општина Македонска Каменица стана дел од семејството на ОSS HABITAT кое вклучува проектантски фирми, градежни компании, финансиски институции, управители на згради, заедници на станари, општини, национални институции и поединци во заедничките заложби за подобрување на енергетската ефикасност во домувањето. Со потпишување на Меморандум за соработка со Хабитат Македонија, општината се вклучи во активностите за подобрување на условите за домување преку реконструкција на станбени згради, со примена на мерки за енергетска ефикасност. Во понатамошниот период, Општина Македонска Каменица заедно со тимот на проектот OSS HABITAT ќе работи на утврдување на приоритетите како и моделите на поддршка на домаќинствата во реконструкцијата и подобрувањето на енергетската ефикасност во нивните домови.