23/03/2025
👉Посета од Словенија - обука за дизајн на изработки од срмен конец во Занаетчиска комора Скопје
Минатата недела, заедно со Занаетчиска комора Скопје бевме домаќини на Združenje izobraževalnih in svetovalnih središč Slovenije - Здружението на образовни и советодавни центри од Словенија. Во рамките на ова партнеrство, финансирано од програмата Еразмус+, 16 претставнички – учеснички на обуки за неформално образование на возрасни во образовните центри – Људски универзи од Толмин, Јесенице, Кршко, Нова Горица, Ново Место, Загорје, Жалец и Мислиња, зедоа учество во креативен курс за изработка на дизајни од срмен конец. Програмата беше изработена од страна на Занаетчиска комора Скопје, каде што и се одржа.
Учесничките – 16 инспиративни и сестрани дами, покажаа особен интерес, ентузијазам и посветеност во дизајнирањето и креирањето слики од срмен конец. Од нивната неуморна работа, произлегоа низа интересни и квалитетни изработки и нивната продуктивност ги надмина сите очекувања и ни покажаа дека никогаш не е доцна да се научи нешто ново како и дека грижата за себеси и квалитетот на живот во третото доба се приоритет.
По враќањето во своите матични Људски универзи, учесничките ќе ја понудат оваа програма за сите заинтересирани слушатели во нивните заедници. Оваа можност е особено важна, бидејќи во Словенија не е застапена техниката на креативна работа со срмен конец.
Упатуваме благодарност до Združenje izobraževalnih in svetovalnih središč Slovenije како организатор на оваа мобилност во Словенија. На нашите колешки од Занаетчиска комора Скопје и на обучувачката Julijana Jakimovska им благодариме од се'срце за одличната соработка, за професионалноста и максималната посветеност во реализацијата на програмата.
На гостинките од Словенија им посакуваме многу успех во обуките, за кои веќе имаат пријавени кандидати и се надеваме дека повторно ќе имаме можност за вакви билатерални средби посветени на учење и културна размена.
