16/05/2026
Уште еден успешно реализиран Републички натпревар „Млади библиотекари“!
На 15 мај, во прекрасната атмосфера на Домот на култура „Драги Тозија“ - Ресен, успешно се одржа 25. републички натпревар „Млади библиотекари“, настан кој и оваа година ја потврди љубовта на младите кон книгата, знаењето и библиотекарството.
Натпреварот беше успешно спроведен од страна на комисијата во состав:
📚 Гордана Кроткова од Национална и универзитетска библиотека „Св. Климент Охридски“ – Скопје – претседател,
📚 Ивана Стојанова од НУУБ „Гоце Делчев“, член
📚 Сања Јованова Петров од ЈУ Градска библиотека „Браќа Миладиновци“, член
како и еден претставник од домаќинот и еден претставник од менторите.
По прегледувањето на тестовите од пријавените учесници, комисијата ги донесе следните резултати:
🥇 1. место – Ана Бучуковска од ООУ „Коле Канински“ – Битола, со ментор Наташа Лозановска
🥈 2. место – Бисера Глигорова од ООУ „Коле Неделковски“ – Скопје, со ментор Весна Трајкова
🥉 3. место – Александра Алексова од ООУ „Димитар Влахов“ – Штип, со ментор Сузана Николова
Упатуваме искрена благодарност до сите ученици кои учествуваа на натпреварот. Токму нивната љубопитност, посветеност и љубов кон книгата се најголемата вредност и причината поради која овој натпревар успешно опстојува веќе 25 години. Искрени честитки до сите учесници и нивните ментори!
Голема благодарност и до членовите на комисијата за нивната професионалност, посветеност и вложен труд.
За успехот на учениците, Библиотекарското здружение на Македонија обезбеди пригодни подароци, а како прекрасно дополнување за првонаградените, Националната и универзитетска библиотека „Св. Климент Охридски“ – Скопје донираше три изданија од „Правопис на македонскиот јазик“.
Дополнително, колешката Гордана Кроткова и оваа година обезбеди убава и вредна донација од Тримакс – за првите три места беа доделени по еден од сите три изданија од прекрасните и исклучително корисни изданија: „Географски атлас“, „Историски атлас“ и „Вселена“.
За сите учесници и ментори беа доделени потврди за учество, како и по една книга исто така донација од Националната и универзитетска библиотека „Св. Климент Охридски“ – Скопје.
Особена благодарност упатуваме и до директорот на Дом на култура „Драги Тозија“ за поддршката, прекрасниот прием и гостопримството за повеќе од 70 присутни гости. Во знак на благодарност, од страна на Библиотекарско здружение на Македонија му беше доделена благодарница-плакета.
Со особена радост најавуваме дека домаќин на 26. републички натпревар „Млади библиотекари“ следната година ќе биде Библиотеката во Битола.
Благодариме ученици, ментори, библиотекари, Национална и универзитетска библиотека „Св. Климент Охридски“ – Скопје, Тримакс и Дом на култура „Драги Тозија“ — затоа што заедно создаваме простор и услови каде што љубовта кон книгата, знаењето и библиотеките продолжува да расте.
Нека овој натпревар продолжи да ги инспирира младите да читаат, истражуваат и да веруваат во силата на образованието и културата. 📖✨
