19/05/2026
‼️ РЕАКЦИЈА НА МЛАДИ ОД СЕМЕЈНА РАЗНОВИДНОСТ‼️
Здружението „Млади од семејна разновидност“ остро реагира на предложените измени во Законот за студентски стандард, со кои се намалува квотата за студенти од социјално ранливи категории од 49% на 40%.
Студентите од самохрани и еднородителски семејства токму во оваа категорија ја гледаат можноста за финансиска сигурност и мотивација за продолжување на образованието, имајќи предвид дека студентите коишто се деца на самохран родител добиваат дополнителни 10 бодови за подобро рангирање. Но, дополнителните бодови нема да значат ништо доколку бројот на достапни места за овие категории континуирано се намалува.
Како организација која секојдневно работи со млади од еднородителски и самохрани семејства, сведочиме дека голем број студенти веќе живеат во услови на финансиска несигурност, ограничен пристап до ресурси и постојан ризик од прекин на образованието. Намалувањето на квотите директно ќе ги погоди токму овие млади луѓе, кои и онака се соочуваат со системски бариери и нееднакви можности.
Образованието мора да биде достапно за сите, а не привилегија само за оние кои можат финансиски да си го дозволат. Наместо намалување на квотите и дополнително оптоварување на студентите, потребни се политики што ќе ја зголемат поддршката, ќе овозможат достоинствен студентски живот и ќе гарантираат еднакви можности за младите од ранливите категории.
Ги повикуваме Министерството за образование и наука, пратениците и сите надлежни институции да ги преиспитаат предложените измени и да отворат суштинска јавна дебата со студентите и граѓанските организации. Политиките што ги засегаат младите мора да се носат во интерес на младите, а не на нивна штета.
Младите од социјални категории не смеат повторно да бидат оставени на маргините.
