16/09/2026
❗️NJOFTIM ZYRTAR ❗️
Drejtuar: Artdashësve, pjesëmarrësve, bashkëpunëtorëve dhe mbarë komunitetit artistik dhe më gjerë.
Të dashur miq dhe ruajtës të trashëgimisë sonë,
Në emër të Shoqërisë Kulturore Artistike "DUFLLA" dhe në cilësinë e drejtorit të festivalit, ju njoftoj me keqardhje se Edicioni i XI i Festivalit të Folklorit Burimor "DUFLLA", i planifikuar për t'u mbajtur në datat 18, 19 dhe 20 Shtator 2026, shtyhet për një afat të pacaktuar.
Ky vendim nuk ka qenë aspak i lehtë pas një pune të gjatë përgatitore, por vjen si një detyrim i thellë moral dhe shpirtëror. Duke ndjekur me shqetësim zhvillimet e fundit dhe gjykimin e ish-krerëve të Ushtrisë Çlirimtare të Kosovës (UÇK) në Hagë, ne vlerësojmë se ky nuk është momenti i duhur për organizime festive.
Misioni i festivalit tonë është pikërisht aty ku tradita flet për lartësimin e vlerave, historisë dhe trashëgimisë sonë kombëtare. Këto vlera nuk u ndërtuan vetëm me këngë e valle, por u mbrojtën me sakrificë, gjak dhe përpjekje titanike për liri. Në këto ditë kur dinjiteti i luftës së drejtë po përballet me sfida dhe kur ata që shkruan historinë tonë ndodhen në bankën e të akuzuarve, solidariteti kombëtar është më i rëndësishëm se çdo manifestim.
Nuk mund të festojmë të qetë kur historia jonë e lavdishme vihet në sprovë.
U kërkojmë ndjesë të gjithë artistëve, grupeve pjesëmarrëse dhe publikut tonë besnik për këtë ndryshim të papritur.
Për datën e re të mbajtjes së festivalit, do t'ju njoftojmë paraprakisht me kohë, sapo rrethanat të jenë më të përshtatshme. Ju falënderojmë për mirëkuptimin dhe mbështetjen e vazhdueshme që i keni dhënë këtij festivali ndër vite.
Kënga dhe vallja jonë burimore do të rikthehen përsëri në Rashçe, atëherë kur zemrat tona të jenë më të qeta dhe kur drejtësia të triumfojë për vlerat tona kombëtare.
Me respekt,
Ylber Idrizi
Kryetar i SHKA "DUFLLA"
Drejtor i Festivalit