Подрачјето на ЛАГ-от ПЛАЧКОВИЦА (слика 1) ги опфаќа териториите и населените места на четири (4) општини (Општина Карбинци, Општина Конче, Општина Радовиш и Општина Штип) со исклучок на градот Штип и го завзема централниот дел од Источна Македонија. Руралната средина и руралните заедници на територијата на ЛАГ-от се простира на 1641.5 km² без територијата на урбаната средина на градот Штип. Територијата на ЛАГ-от опфаќа 6,3% од вкупната територија на Република Македонија. Границите на ЛАГ се простираат на два плански региони (источен плански регион и југоисточен плански регион). На територијата на ЛАГ-от Плачковица, постојат 122 рурални заедници (населени места). По површина најголема е општина Радовиш ( 608 км²), потоа општина Штип (583 км²), општина Конче (233 км²), а најмала по територија е општината Карбинци (231 км²).
Просторот на ЛАГ-от е дефиниран од неговите релјефни карактеристики како и од територијалните граници на општините кои се вклучени во ЛАГ-от. Територијата на ЛАГ-от на север се простира по падините на планината Плачковица, преку радовишката котлина и планината Смрдеш, јужно опфаќајки го сливното подрачје на река крива Лакавица ограничено до билото на планината Серта на југ, на исток територијата се протега до билото на планината Готен, а на запад до овчеполската котлина по течението на река Брегалница. Територијата на ЛАГ-от Плачковица се граничи со тринаесет (13) општини. На север се граничи со општините Пробиштип, Чешиново-Облешево, Зрновци, на североисток со општина Виници, на исток територијата на ЛАГ-от се граничи со општина Берово и општина Василево и на југоисточната страна со општина Струмица. На југ се граничи со општина Валандово, општина Демир Капија, на југозапад со општина Неготино и општина Градско. На запад се граничи со општината Лозово, а на северозапад со општината Свети Николе.