25/05/2026
🙏🏼☦️ СВЕТИОТ МАЧЕНИК АЛЕКСАНДАР – ЗАШТИТНИК НА БЕЛИЦА И МАКЕДОНСКИТЕ ВОЈНИЦИ ☦️🙏🏼
Со особена духовна радост и почит, и оваа година во нашето село Белица ќе се одбележи празникот посветен на нашиот вековен заштитник – Светиот маченик Александар, храбриот Христов воин кој со својата силна вера и пожртвуваност останал запаметен како симбол на истрајноста, храброста и верноста кон Бога.
Свети Александар, млад војник во времето на царот Максимилијан, одбил да им се поклони на римските идоли и со тоа го започнал својот маченички пат низ Македонија сè до Цариград. И покрај страшните маки, не се откажал од христијанската вера. Неговата молитва правела чуда, а ангел Господов му давал сила да ги издржи страдањата. Неговото свето дело и денес живее меѓу народот, а неговиот гроб во Белица со векови претставува место на молитва, надеж и исцеление.
📅 На 26 мај во црквата „Св. мач. Александар“ ќе се одржи свечена утринска литургија со почеток од 10:00 часот, на која верниците ќе упатат молитви за здравје, мир и благослов за своите семејства и за сите македонски војници и чувари на татковината.
🌿 Во духот на старите белички традиции, на 25 мај од 16:00 часот, жените од селото ќе се соберат пред црквата Александрија, каде ќе постават богата трпеза во чест на својата машка челад, продолжувајќи ја вековната молитва и надеж како во старите немирни времиња – нивните сопрузи, синови и браќа здрави и живи да се вратат од сите искушенија и патишта.
✨ Со радост известуваме дека сè е подготвено за овој голем и светол празник, организиран со љубов и посветеност од годинешниот кум и неговата фамилија – Дејан Костески.
Добредојдени се сите верници, пријатели и добронамерници за заеднички да го прославиме светиот заштитник на Белица.
🙏🏼 Св. мач. Александар – моли Го Бога за нас! ❤️👌🇲🇰