04/11/2025
🌍 Plastic Fantastic — Битола размислува зелено
Преполна сала, инспиративни гости и млади луѓе со јасна порака: времето на изговори заврши.
Во Кино „Манаки“, под покровителство на Здружението за македонско-германско пријателство и соработка Битола и во соработка со Гете-институт Скопје, се одржа проекцијата на документарниот филм „Plastic Fantastic“ – филм кој на едукативен и провокативен начин нè соочува со реалноста на светот кој тоне во пластика.
„Тоа е само едно пластично шише“ реченица што секој од нас барем еднаш ја изговорил. Но што се случува кога „само едно шише“ ќе се помножи со бројот на жителите на Битола или со осум милијарди луѓе? Одговорот го понуди ова визуелно и содржински силно остварување, кое преку искрени сведоштва, научни факти и уметничка поетика нè потсетува дека решението почнува токму од секој поединец.
По проекцијата следеше разговор со Марија Магдалена Петковска Микаровска, професорка и еко-активистка со долгогодишен ангажман во развојот на еколошката свест кај младите, и Стефан Поповски, ликовен педагог кој ја претвори темата во креативен повик за акција.
Настанот беше збогатен со уметнички перформанс на ученици, изложба на креативни изработки направени од рециклирани материјали, симболично претворајќи отпад во порака за иднината.
Со свое обраќање, Проф. д-р Валентина Илиева, претседателка на Здружението за македонско-германско пријателство и соработка Битола, ја нагласи важноста на ваквите иницијативи во процесот на градење свесно општество:
„Еколошката промена не започнува со технологија, туку со едукација. Колку порано младите сфатат дека секое мало дело има тежина, толку поблиску сме до вистински одржлива иднина.“
Здружението за македонско-германско пријателство и соработка Битола веќе повеќе од две децении претставува мост меѓу културите, јазиците и едукативните вредности, градејќи партнерства што создаваат реални промени во заедницата. Нивната долгогодишна соработка со Гете-институт Скопје резултира со бројни културни и образовни иницијативи, меѓу кои и овој настан што ги спојува уметноста, екологијата и младинската едукација во една современа, општествено значајна порака.
Присуството на претставници од Гете-институт Скопје и бројната публика – ученици, професори, активисти и љубители на документарен филм го потврди интересот и потребата за вакви иницијативи во Битола.
Настанот е дел од пошироката иницијатива Free Plastic July, која има за цел да поттикне одржливи навики, свесност и одговорност кон животната средина.
Ова беше вечер што не заврши со последниот кадар, туку започна разговор што треба да продолжи.
Да ја направиме мисијата зелена, а не пластична.
