18/12/2025
Лајонс клуб „Кабадаја“ донираше за Клиничката болница во Битола по повод патрониот празник на градот
По повод патрониот празник на Град Битола – Св. Нектариј, Лајонс клубот „Кабадаја“ од Битола реализираше поголема донација за Клиничката болница во Битола, со што уште еднаш ја потврди својата посветеност кон локалната заедница и јавното здравство.
Донацијата вклучува тврда подна облога (ламинат) за Одделението за педијатрија, како и комплети постелнина за две болнички одделенија – Урологија и Интерна медицина. Со оваа донација се подобруваат условите за престој и лекување на пациентите, како и условите за работа на медицинскиот персонал.
Донацијата беше официјално примена од директорката на Клиничката болница во Битола, г-ѓа Ненси Лозанче, која изрази искрена благодарност до Лајонс клубот „Кабадаја“, истакнувајќи дека секоја донација е од исклучително значење, бидејќи здравствените установи континуирано имаат потреба од поддршка. Таа изрази надеж дека ваквата соработка ќе продолжи и во иднина.
Претседателката на Лајонс клуб „Кабадаја“ , Емилиа Ѓероска, истакна дека донацијата е реализирана со голема радост и чувство на одговорност кон заедницата:
„Оваа донација произлегува од едноставно, но силно уверување – дека да се врати кон градот во кој живееме треба да биде вообичаено за секој од нас. Сите ние, во различни моменти од животот, ги користиме јавните услуги, особено здравствените. Со вакви донации придонесуваме за поквалитетен живот за сите нас во Битола.“
Таа додаде дека реализирањето на оваа донација токму на патрониот празник на градот ѝ дава дополнителна симболика и ја нагласува грижата, солидарноста и посветеноста на Лајонс клуб „Кабадаја“ кон својот град.
Со оваа иницијатива уште еднаш се потврдува дека граѓанската одговорност не значи само користење на заедничките ресурси, туку и активно вложување во нивно унапредување, а Лајонс клубот „Кабадаја“ останува посветен на конкретни дела кои прават позитивна разлика во локалната заедница.
