26/12/2025
FANAMBARANA
KMF/CNOE/Fanamb 2025/ Lah-05/23 des
NY RAFITRA REHETRA NO ITAKIANA FANAVAOZANA
Fotoana izao andrafetana rafi-piaraha-monina vaovao eto Madagasikara. Efa ela ny KMF/CNOE-Fanabeazana olompirenena no nitaky izany. Tsy vitsy no nihevitra fa tsy misy mpihaino ireny fitakiana ireny.
Manjavozavo tanteraka ny fikaonan-doha ho amin’izany fanavaozana ny rafitra izany ankehitriny. Talanjona izahay raha nandre fa ny FFKM irery ihany no mikarakara sy mitarika ny fikaonan-doham-pirenena. Ho an'ny Fikambanana KMF/CNOE- Fanabeazana olompirenena, mila fikarakarana mangarahara, tsy mitanila, misokatra amina mpisehatra maro karazana izany, handraisan'ny olompirenena anjara feno sy ankalalahana. Ny fikaonan-doha izao dia nanilihina ankolafin-kery maro eto amin’ny firenena, na tamin’ny fanokafana na amin’izao zotra izao. Anisan’ny voailika tamin’izany ny Fikambanana KMF/CNOE-Fanabeazana Olompirenena.
Hatreto moa, ny FFKM no voalaza fa manana ny “mandat” izay voatendry sy voairaka ho mpitarika ny fikaonan-doham-pirenena. Tsy misy mahita izany “mandat” izany anefa. Mitaky ny hampisehoana izany ny fikambanana amin'ny anaran'ny mangarahara hahafahana mahazo antoka fa tsy misy fifandonan-drafitra manodidina ity fanitsiana na fanavaozan-drafitra ity. Iaraha-mahita fa mitsangana koa ny Minisiteram-panjakana hisahana ny fanavaozana, “Dia iza no manao inona ?” amin’izao fikaonan-doha ho amin’ny fanavaozana izao. Mahatsapa ny fikambanana fa tsy ampy ny fahafantaran'ny olompirenena ny zotran’ny fikaonan-doha izay hotanterahana.
Ny fakankevitra dia atomboka eny amin’ny Kaominina izay rafitra intsinjaram-pahefana manakaiky indrindra ny Olompirenena sady vao nifidy ny mpitondra azy. Tsy fanilihana izany fa azo atao tsara ny manokatra ny sehatra handraisan'ny olompirenena anjara tolokevitra hatrany amin’ny fokontany. Ny Kaominina heverina ho fakankevitra, ny Faritra ho fandravonana ka omena sehatra kokoa amin'izany ireo anjerimanontolo eny amin’ny Faritra, ary ny Nasionaly kosa ho fanapahan-kevitra. Tsy ferana ho andro vitsy ny fakankevitra nasionaly, ahitam-bokany kokoa aza raha iray hatramin’ny telo volana izany. Mila ajoro ny komity siantifika ahitana ireo manampahaizana Malagasy, profesora amin’ny seha-pahalalana marolafy toa ny mpahay fiaraha-monina, fomba, toekarena izay hiantoka ny kalitao ara-tsiantifika, sy tsy mitanila, ary tsy manilika ny fikirakiran-kevitra rehetra mialoha, mandritra ary aorian’ny fikaonan-doha izay hatao.
Tsy sandaina vola ny fandraisana anjara amin'ny fikaonan-doha fa an-tsitrapo tanteraka ; iantohana kosa ny saran-dalana sy ny fisakafoanana ary ny fiantranoana manomboka eo amin’ny sehatra rejionaly. Ny sehatra rehetra no hakana fanapahan-kevitra fa tsy ny Lalampanorenana sy ny Lalam-pifidianana ihany. Zaraina isam-paritra kosa ny fandinihana ny sehatra samihafa (fanabeazana, fahasalamana, fandriampahalemana, seha-pihariana isan-tsokajiny, …) izay mety kokoa raha ialohavan'ny fakan-kevitra isaky ny Minisitera.
Tsy misy halatsaka ny hevitra azo fa havadika lalàna ny tolokevitra isaky ny sehatra. Ny lalampanorenana kosa dia hanaovana fitsapan-kevibahoaka raha Lalampanorenana iray no nipoitra hatreny ifotony. Raha misy endrika lalampanorenana maro dia fifidianana Lalampanorenana no takiana. Tsy hanana fahefana hametra, na hanivana, ny Lalampanorenana izay hatolotra hisafidianan’ny Olompirenena ireo mpandray anjara amin’ireo fikaonan-doha nasionaly fa natao handravona ka hanolotra izany amin’ireo manampahaizana hamadika azy ireo ho sora-dalàna.
Mitsahatra amin’ny asany ireo andrimpanjakana rehetra misy amin’izao rehefa lany, amin’ny alalan’ny fifidianana ny lalampanorenana vaovao sy ny firosoana amin’ny fametrahana, amin’ny alalan’ny Fifidianana, ireo rafitra vaovao hitantanana ny firenena.
Eto ampamaranana dia manamafy ny KMF/CNOE-Fanabeazana olompirenena fa mahasoa kokoa ny firenena ny fanaovana ny Fifidianana miainga avy any amin’ny rafitra eny ifotony vao ny ho Filohampirenena.
Natao teto Antananarivo, androany faha-23 Desambra 2025
Ny Birao Nasionaly
