Vovonan'ny Tanora Katolika Manjakaray

14/03/2026

TANORA MANDRAY ANDRAIKITRA AHO ARY MIASA AM-PANETRE-TENA.

Ny finoana no fototra mampijoro antsika Kristianina. Anisany hahafahana mandalina an'io finoana io ny fandraisana andraikitra ao amin'ny Eglizy. Amin'ny alalan'ny fandraisana andraikitra ihany koa no hahafahantsika miaina ny finoantsika.

▶️ Indraindray anefa isika, indrindra isika Tanora, entanim-po be loatra amin'ny fanatanterahana ireny andraikitra raisintsika ireny ka manana toe-tsaina tia mirehareha. Ny hitsaran'ny olona antsika avy ety ivelany hoe tena mahefa be amin'ny fandraisana andraikitra no lasa imasoantsika be loatra.
Ary adinontsika hoe tena ilàna fanetre-trena ny fandraisana andraikitra indrindra eo anivon'ny Eglizy.

Toy ny ahoana ary izany hoe miasa am-panetre-tena?

➡️ Mahafoy tena tsy miandry tambiny. Mitaona marina ny olona makany amin'Andriamanitra, izay iraka andefasana antsika. Ka rehefa mampihatra izany, na tsy misy mahita aza dia manohy hatrany.

➡️ Miasa mba hahatsara ny fifandraisanao sy ny fifandraisan'ny hafa amin'Andriamanitra.
Tsy mirehareha be loatra amin'izay efa vita ary miezaka manome lanja ny vitan'ny hafa fa tsy mifaninana aminy.

➡️ Miaina amin'ny tenin'i Kristy. Miasa ho an'ny voninahitr'Andriamanitra fa tsy ny mba hahazoan'ny tena manokana dera sy laza avy amin'ny hafa hoe tena mahefa be isika ao amin'ny Eglizy.

➡️ Fadiana ny manambony tena be loatra ka tsy manome lanja ny hafa. Indraindray isika mpiandraikitra mihevitra ny tenantsika ho tsy misy mahasolo, ho ambony noho ny mpikambana hafa. Hany ka manana fisainana fa tsy miodina ny fikambanana raha tsy noho ianao. Very tanteraka ny fanetre-trena.

➡️ Antson'Andriamanitra ny fandraisana andraikitra. Noho izany, tsy tokony hampifila an'Andriamanitra isika. Indraindray mantsy any anaty fikambanana, vovonana sy ny sisa any, rehefa misy ny tsy fifanarahana dia ao ny miteny hoe ''izaho tsy hivavaka ato intsony fa hiova fiangonana, izaho hiala tsy ho mpikambana, sns''. Tadidio fa Andriamanitra no niantso antsika ka aza ampifilaina Izy.

➡️ Manankina amin'Andriamanitra ny fiainan'ny Fikambanana na Vovonana ikatrohana. Mba tsy ho sondriana be loatra amin'ny fitadiavam-bola na hetsika fa hanome lanja ihany koa ny ara-panahy.

Tsy misy ny atao hoe ''mpiandraikitra lavorary'' fa ny tsirairay dia afaka miezaka. Entanina isika mpiandraikitra, na Tanora na tsia, hanana fanetre-tena.
Mankahery antsika ihany koa satria tsy mora ny mitondra olona, tsy mora ny mandray andraikitra fa eo i Jesoa miara-dalana amintsika.

Manentana antsika tsy mbola mpiandraikitra ihany koa hiroso, raha misy ny fahafahana sy ny finiavana fa miandry antsika Andriamanitra.

''Tsy miandry ho masina vao mandray andraikitra, fa eny am-pandraisana andraikitra no manamasi-tena'' 🙏🏻

24/01/2026

Aza mieritreritra fa ny taonanao dia afaka manome antoka fa afaka manantena ny ho ela velona ianao. Tsy fantatsika fotsiny hoe hafiriana no hiainantsika ry tanora malala. 🙏

Ny azo antoka kosa dia hoe ho faty ianao indray andro any ary ny fahafatesana ratsy dia mitondra fahoriana mandrakizay.

Noho izany, aza manahy ny amin’ny fotoana sy ny toerana hahafatesanao, fa ataovy izay hihazonanao ny fisakaizanao amin’Andriamanitra mba ho vonona ho amin’ny fahafatesana amin’ny fotoana rehetra. (Md. Joany Bosco)

©️ Miha Jesoa isan’andro

19/01/2026

15/11/2025

🙏 FAMINTINANA NY FAMELABELARANA NANDRITRA NY FIHAONAN'NY RAIAMANDRENY Mngr RAKOTOASIMBOLA Clément Herizo TAMIN'IREO MPINTANTANA PEJY SY VONDRONA MITONONA HO KATOLIKA 🙏

Tontosa soamantsara androany Sabotsy 15 Novambra 2025 tetsy amin'ny Episkopaly Antanimena ny famelabelarana ho fanatsaràna ny fitoriana ny vaovao mahafaly amin'ny alalan'ny FITAOVAM-PIFANDRAISANA AMIN'NY MPIARA-BELONA na ireo FITAOVANA AN-TAMBAJOTRA SERASERA , izay notarihin'ny Raiamandreny Ny Monseigneur RAKOTOASIMBOLA Clément Herizo , Evekan'ny Diosezin'ny Maintirano sady Filohan'ny ny vaomieran'ny fifandraisana amin'ny mpiara-belona eo anivon'ny fivondronam-ben'ny Eveka .

Fihaonana nanasàny ireo administrateur sy modérateur mintantana Pejy ( Page ) sy Vondrona ( Groupe ) mitonona ho katolika rehetra sy ireo misehatra amin'ny fitoriana ny vaovao mahafaly an-tserasera rehetra .

FAMINTINANA NY FAMELABELARANA :

- Manana ny lanjany tokoa ary tsy azo hiodivirana ny fandrosoana sy ny fampiasana ireo karazana tambajotra sosialy amin'izao vanim-potoana hiainan-tsika izao .

- Ny fizaràna vaovao ankehitriny dia mivoatra satria afaka misitraka izany avy hatrany na amin'ny fotoana inona na amin'ny toerana aiza isika mianakavy .
Afaka mampiray sy mampiombona anaty fotoana fohy ny fitaovan-tserasera ( indrindra ny tambajotra sosialy ) . Tanjaky ny fifandraisana maoderina izany .

- Afaka miombona afaliana sy miombona alahelo ny mpiara-belona noho ny tanjaky ny tambajotra sosialy.

- NY EGLIZY KATOLIKA dia tsy misalasala , ary mamporisika antsika aza mba hampiasa azy ( tambajotra sosialy ) ireny ho zary fitaovana ho fitoriana ny vaovao mahafaly sy handalinana ny finoana , ary indrindra ho fijoroana ho vavolombelon'ny finoana .

👉 IREO MILA TANDREMANA

- Mila mitandrina ny Pejy na Vondrona mitonona ho katolika rehetra amin'ny fampianarana sy fampitàna vaovao satria miteny amin'ny anaran'ny EGLIZY KATOLIKA ka raha sanatria misy ny fahadisoana na vaovao tsy marim-pototra dia ny EGLIZY mihitsy no lasa mizàka ny fahadisoana avy amin'ny mpintantana ireny Pejy sy Vondrona ireny fa tsy ireo mpintantana ilay Pejy na ilay Vondrona mitonona ho katolika velively .

- Tokony hisy hatrany ny loharano marim-pototra nihavian'ilay vaovao raha toa mizara vaovao mahakasika ny fiainan'ny Eglizy Masina Katolika .

- SARY ATAO AMIN'NY RANTY : Ny sary ofisialy manambara ilay hetsika no tsara indrindra hanehoana ny ranty atao rehefa mamoaka ranty , ary ny famoahana sary mety hanohina olona iray ( tsy nahazoana ny fankatoavany ) ihany koa dia mila tandremana fatratra .

- Mila tandremana ny ranty atao mba tsy hiteraka fifankahalana sy fampisarahana eo amin'ny piara-belona ( eny mety na ny samy mpino katolika aza mety hisara-bazana raha tsy mitandrina amin'ny ranty atao )

- Tokony hajaina ny zon'ny hafa nahazoana ilay vaovao na fampianarana , ka ny fizaràna ilay vaovao ( partage ) no tena hilàna ny fifanampian-tsika , ohatra ireny hafatry ny fivondronam-ben'ny Eveka ireny .

- Ho an'ireo Pejy sy Vondrona mitonona ho katolika rehetra mamoaka fampianarana amin'ny endriny samihafa dia tokony hanaraka ny etika Kristianina katolika ( fotom-pisainana Kristianina katolika ) ka tsy hanaratsy ny finoan'ny hafa fa ny an'ny tena no toriana amin'ireo mpino katolika manaraka ny Pejy na Vondrona , ary hajaina ny finoan'ny hafa satria izay no fotom-pisainana takiana amintsika .

- Ho an'ireo Pejy na Vondrona mitonona ho katolika mitondra ny anarana Paroasy ... Distrika ... Vikaria ... Diosezy kosa dia tsara ny hisian'ny fifampiresahana amin'ireo Raiamandreny mpihahy ( Pretra Aumônier ) amin'ireo sehatra isan-tsokajiny ireo alohan'ny hananganana ilay Pejy na Vondrona satria tokony ho fantatr'izy ireo ary tokony hahazoana ny fankatoavany ny fisian'izany .

- Tsy natao hanasongadinana tena na fiainana manokana ho an'olona iray ny Pejy na Vondrona mitonona ho katolika , fa amin'ny maha fitaovana eken'ny Eglizy ho fitaovana pastoraly hitoriana ny vaovao mahafaly azy dia ireo fotom-pampianaran'ny Eglizy sy ireo vaovaon'ny Eglizy hahazoana loharano marim-pototra hatrany no tokony ho zaraina aminy ( efa hafa mihitsy ny resaka fijoroana vavolombelona mitory finoana ) .

- IREO AMBARA HO FISEHOAN'I MASINA MARIA :

Nambaran'ny fampianarana avy amin'ny Raiamandreny ihany koa ny tokony hitandremana amin'ny fizaràna vaovao mahakasika ireo ambara ho fisehoan'i Masina Maria tatsy sy teroa teto Madagasikara satria mbola tsy nahazo fankatoavana avy amin'ny Eglizy ny fahamarinan'izy ireny hatreto ka ilaina fitandremana ny fizaràna azy .

🙏 Ireo no isan'ny famintinana voaray nandritra famelabelarana sy fanatsaràna ny fitoriana ny vaovao mahafaly an-tserasera sy tambajotra sosialy avy amin'ny Raiamandreny , dia i Monseigneur RAKOTOASIMBOLA Clément Herizo Filohan'ny Vaomieran'ny fifandraisana amin'ny mpiara-belona androany koa mirary soa antsika , ary antenaina fa hitondra fanatsaràna ho an'ny adidy masina sahanina amin'ny fitoriana ny fanjankan'Andriamanitra .

- Araka ny toromariky ny Raiamandreny moa tany am-pamaranana ny famelabelarana dia noraisina ny anarana sy ny mombamomba an-tambajotra ireo rehetra tonga nanatrika mba ahafahana mamondrona anaty Vondrona iray ireo administrateur sy modérateur mintantana Pejy na Vondrona mitonona ho katolika rehetra mba ahafahana ihany koa mahazo vaovao sy fanatsaràna.

MIRARY NY FIADANAN'I KRISTY HO AMINTSIKA 🙏

14/11/2025

OLOMASINA MPIARO NY JMJ MADA XI TOAMASINA

Manana Olomasina 5 isika nosafidiana ho mpiaro ny JMJ Mada XI any Toamasina, dia i 𝙈𝙖𝙨𝙞𝙣𝙖 𝙈𝙖𝙧𝙞𝙖 Mpanjakavavin'ny fiadanana, 𝙈𝙙 𝙅𝙤𝙨𝙚𝙛𝙖 izay mpiaro ny Diosezin'ny Toamasina, 𝙈𝙙 𝙅𝙤𝙖𝙣𝙮 𝙋𝙖𝙤𝙡𝙮 𝙛𝙖𝙝𝙖-𝙄𝙄 ilay Papa namorona ny JMJ ary i 𝙈𝙙 𝘾𝙖𝙧𝙡𝙤 𝘼𝙘𝙪𝙩𝙞𝙨 sy i 𝙈𝙙 𝙋𝙞𝙚𝙧 𝙂𝙞𝙤𝙧𝙜𝙞𝙤 𝙁𝙧𝙖𝙨𝙨𝙖𝙩𝙞 izay Olomasina tanora ohatra ho antsika, nasandratra ho Olomasina tao Roma tamin'ny volana Septambra lasa teo tamin'ny Eokaristia notarihin'ny Papa Leon XIV.

Miara-mivavaka amin'izy ireo isika hahatontosa amin'ny antsakany sy andavany ny JMJ izay kasaintsika atao eto amin'ny nosintsika.

08/11/2025

🥹❤🙏🏻

“Aza arianao aho amin'ny andron'ny fahanterako; ary aza ilaozana rehefa mihena ny heriko.”

(Sal 71, 9)🙏