https://www.facebook.com/108219168829388/

Vononan'ny tanora EKAR Soavina

Home
Madagascar
Antananarivo
Vononan'ny tanora EKAR Soavina

𝗠𝗶𝗮𝗿𝗮𝗵𝗮𝗯𝗮 𝗮𝗻𝗮𝗼, 𝘁𝗼𝗻𝗴𝗮𝘀𝗼𝗮 𝗲𝘁𝗼 𝗮𝗺𝗶𝗻'𝗻𝘆 𝗽𝗲𝗷𝘆

🇲🇬 𝗩𝗢𝗩𝗢𝗡𝗔𝗡'𝗡𝗬 𝗧𝗔𝗡𝗢𝗥𝗔 𝗘𝗞𝗔𝗥 𝗦𝗢𝗔𝗩𝗜𝗡𝗔 🇻🇦

𝗔𝗯𝗼𝗻𝗻𝗲𝘇-𝘃𝗼𝘂𝘀 👍

18/07/2026

ALAHADY FAHA-19 JOLAY 2026

ALAHADY FAHA-16 MANDAVANTAONA — TAONA A

"MAHANDRY ANDRIAMANITRA ARY MAMINDRA FO"

𝗘𝗩𝗔𝗡𝗝𝗘𝗟𝗬 𝗠𝗔𝗦𝗜𝗡𝗔 𝗡𝗢𝗦𝗢𝗥𝗔𝗧𝗔𝗡'𝗜 𝗠𝗱 𝗠𝗔𝗧𝗜𝗢 13, 24-43

Avelao hiara-maniry izy roroa ambara-piavin’ny fijinjana.

Tamin’izany andro izany, i Jesoa nanao fanoharana tamin’ny vahoaka nanao hoe: “Ny Fanjakan’ny lanitra dia mitovy amin’ny lehilahy izay namafy voa tsara tamin’ny taniny; fa raha natory ny olona, dia tonga ny fahavalony, ka namafy voan’ahi-dratsy tamin’ny vary, dia lasa. Nony naniry ny vary ka niteraka, dia nitranga koa ny ahi-dratsy. Dia avy ny mpanompon-dralehilahy nanao hoe: “Tompoko, moa tsy voa tsara va no nafafinao tao amin’ny taninao, ka nahoana no tonga misy ahi-dratsy koa?” Fa hoy ny navaliny hoe: “Ny fahavaloko no nanao izany”. Ka hoy ireo mpanompony taminy: “Tianao va ny handehananay hiava azy?” Hoy izy: “Tsia, fandrao ongotanareo mbamin’ny vary, raha manongotra ny ahi-dratsy ianareo. Avelao hiara-maniry izy roroa ambara-piavin’ny fijinjana; fa raha tonga ny taom-pijinjana, dia holazaiko amin’ny mpijinja hoe: Ongoty aloha ny ahi-dratsy, dia fehezo amboarany mba hodorana, ary angony ho any an-tsopitro ny vary”.

Ary nanao fanoharana hafa taminy koa Izy nanao hoe: “Ny Fanjakan’ny lanitra dia mitovy amin’ny voan-tsinapy izay nalain’ny olona ka nafafiny tany an-tanimboliny. Kely indrindra amin’ny voan-javatra rehetra izy, fa rehefa nitombo kosa, dia lehibe noho ny anana rehetra, ka tonga hazo; dia avy ny voro-manidina mipetraka ao amin’ny rantsany”.Ary nanao fanoharana hafa taminy koa Izy nanao hoe: “Ny Fanjakan’ny lanitra dia mitovy amin’ny lalivay, izay nalain’ny vehivavy anankiray ka nataony tao amin’ny koban-dafarîna intelon’ny famarana mandra-pahazon’ny lalivay azy rehetra”. Fanoharana no nilazan’i Jesoa izany rehetra izany tamin’ny vahoaka, ary Izy tsy niteny taminy afa-tsy tamin’ny fanoharana, mba ho tanteraka ny tenin’ny Mpaminany manao hoe: “Hiloa-bava hilaza fanoharana Aho, ary hanambara zavatra izay miafina hatramin’ny nanaovana izao tontolo izao”.

Tamin’izay, nony efa nampody ny vahoaka Izy, dia mba nody, ary nanatona Azy ny mpianany nanao hoe: “Lazao anay ny hevitry ny fanoharana ny amin’ny ahi-dratsy”. Ary namaly Izy ka nilaza taminy hoe: “Ny mpamafy ny voa tsara dia ny Zanak’olona; ny tanimbary dia izao tontolo izao; ny voa tsara dia ny zanaky ny Fanjakana; ny ahi-dratsy dia ny zanak’ilay Ratsy; ny fahavalo izay namafy azy, dia ny devoly; ny taom-pijinjana dia ny fahataperan’izao tontolo izao; ary ny mpijinja dia ny Anjely. Tahaka ny anangonana ny ahi-dratsy sy andorana azy amin’ny afo, no hatao raha mby amin’ny fahataperan’izao tontolo izao. Haniraka ny Anjeliny ny Zanak’olona, ary ireo dia hanangona sy hamoaka ny mpanafintohina sy ny mpanao ratsy rehetra hiala amin’ny Fanjakany, ka hanipy azy ao amin’ny memy mirehitra: any no hisy fitomaniana sy fikotroha-nify. Amin’izany kosa ny olo-marina dia hamirapiratra tahaka ny masoandro any amin’ny Fanjakan’ny Rainy. Aoka hihaino izay manan-tsofina hihainoana”.— Izany àry ny tenin’ny Tompo. — Dera anie ho Anao, ry Kristy!

— Izany àry ny tenin’ny Tompo.

— Dera anie ho Anao, ry Kristy!

13/07/2026

𝗔𝘃𝗲𝗹𝗮𝗼 𝗵𝗶𝗮𝗶𝗻𝗮 𝘁𝗼𝗮 𝗮𝗻𝗮𝗼 𝗻𝘆 𝗵𝗮𝗳𝗮, 𝗵𝗶𝗮𝘁𝗿𝗶𝗸𝗮 𝗻𝘆 𝗳𝗶𝗮𝗶𝗻𝗮𝗻𝘆...

©️ Vaomieran'ny Eveka ho an'ny Fifandraisan'ny mpiara-belona - Madagasikara

11/07/2026

ALAHADY FAHA-12 JOLAY 2026

ALAHADY FAHA-15 MANDAVANTAONA — TAONA A

"NOKENDREN'ANDRIAMANITRA HISY VOKATSOA EO AMIN'NY FIAINANTSIKA NY TENINY"

𝗘𝗩𝗔𝗡𝗝𝗘𝗟𝗬 𝗠𝗔𝗦𝗜𝗡𝗔 𝗡𝗢𝗦𝗢𝗥𝗔𝗧𝗔𝗡'𝗜 𝗠𝗱 𝗠𝗔𝗧𝗜𝗢 13, 1 -23

Indro nivoaka hamafy ny mpamafy.

Tamin’izany andro izany, rehefa nivoaka avy tany an-trano i Jesoa, dia nipetraka tao amoron-dranomasina. Ary be ny vahoaka nitangorona teo aminy, ka niditra teo an-tsambo kely Izy, dia nipetraka teo, ary ny olona rehetra kosa teo amoron-drano. Ary nilaza zavatra maro tamin’ireo tamin’ny fanoharana Izy nanao hoe: “Indro nivoaka hamafy ny mpamafy; ary nony namafy izy, ny sasany latsaka teny amoron-dalana, dia tonga ny voro-manidina ka nitsindroka azy; ny sasany latsaka tamin’ny tany be vato sady manify nofo ka nitsimoka vetivety, satria tsy lalina ny nofon-tany; kanjo nony niposaka ny masoandro, dia nalazo izy ka maina, satria tsy latsaka lalina. Ny sasany latsaka tany anaty tsilo, dia nitombo ny tsilo ka nahafaty azy; ary ny sasany latsaka tamin’ny tany tsara, dia namoa: ao ny tonga avo zato heny, ao ny enimpolo ary ao ny telopolo. Izay manan-tsofina hihainoana, aoka izy hihaino”.

Ary nanatona ny mpianany ka nilaza taminy hoe: “Nahoana no fanoharana no itenenanao aminy?” Namaly Izy ka nanao taminy hoe: “Satria ianareo no nomena hahalala ny zava-miafina amin’ny Fanjakan’ny lanitra, fa izy ireo tsy mba nomena izany. Fa izay manana dia homena ka hanam-be izy, ary izay tsy manana kosa, na dia izay ananany aza dia hoesorina aminy. Ary noho izany, dia fanoharana no itenenako aminy: satria mijery izy fa tsy mahita, ary mandre fa tsy mahalala; ka tanteraka aminy ilay fanoharan’i Izaia manao hoe: “Handre amin’ny sofinareo ianareo fa tsy hahalala, ary hijery amin’ny masonareo fa tsy hahita; fa ny fon’ity vahoaka ity efa nihamafy, ny sofiny efa nihadonto, ary ny masony efa nakimpiny, sao mahita ny masony sy mandre ny sofiny, ka hahalala ny fony, dia hibebaka izy ary hositraniko”. Fa ianareo kosa, sambatra ny masonareo fa mahita, ary ny sofinareo fa mandre.

Lazaiko aminareo marina tokoa, fa maro ny mpaminany sy ny olo-marina naniry hahita ny hitanareo fa tsy nahita, ary handre ny renareo fa tsy nandre. Ka henoy àry ny hevitry ny fanoharana amin’ny mpamafy. Raha misy mandre ny tenin’ny Fanjakan’Andriamanitra nefa tsy mahalala, dia avy ilay Ratsy ka manesotra izay nafafy tao am-pony: dia izay no ilay nafafy teny an-dalam-be. Ary ilay nafafy tamin’ny tany be vato no izay nandre ny teny sy nandray azy an-kafaliana miaraka amin’izay, nefa tsy miorina mafy izy ka tsy maharitra ela; fa nony misy fahoriana sy fanenjehana noho ny teny, dia tafintohina miaraka amin’izay izy. Ilay nafafy tany anaty tsilo no izay nandre ny teny, fa ny fiahiana izao fiainana izao sy ny fitaky ny harena, mamono ny teny ao aminy, ka tonga tsy mamoa izy. Fa ilay nafafy tamin’ny tany lonaka kosa no ilay mandre ny teny ka mahalala azy; dia mamoa, ny sasany avo zato heny, ny sasany enimpolo heny, ary ny sasany telopolo heny.

— Izany àry ny tenin’ny Tompo.

— Dera anie ho Anao, ry Kristy!

03/07/2026

ALAHADY FAHA-05 JOLAY 2026

ALAHADY FAHA-14 MANDAVANTAONA — TAONA A

"I JESOA : BE FITIAVANA SY MALEMY FANAHY"

𝗘𝗩𝗔𝗡𝗝𝗘𝗟𝗬 𝗠𝗔𝗦𝗜𝗡𝗔 𝗡𝗢𝗦𝗢𝗥𝗔𝗧𝗔𝗡'𝗜 𝗠𝗱 𝗠𝗔𝗧𝗜𝗢 11, 25-30

Malemy fanahy sy manetry tena ao am-po Aho.

Tamin’izany andro izany i Jesoa niteny nanao hoe: “Misaotra Anao aho, Raiko, Tompon’ny lanitra sy ny tany, fa nanafina ny hevitrao tamin’ny hendry sy ny be saina Ianao, ary nanambara azy tamin’ny tso-po kosa. Eny, misaotra Anao aho, Raiko, fa izany no sitra-ponao. Efa nomen’ny Raiko Ahy ny zavatra rehetra ary tsy misy mahalala ny Zanaka afa-tsy ny Ray; ary tsy misy mahalala ny Ray afa-tsy ny Zanaka sy izay tian’ny Zanaka hanehoana Azy. Mankanesa aty amiko ianareo rehetra izay mitondra fahoriana sy vesaram-pijaliana, fa hanamaivana anareo Aho. Ento ny jiogako, ary mianara amiko, fa malemy fanahy sy manetry tena ao am-po Aho, dia hahita fiadanana ho an’ny fanahinareo ianareo, fa mora entina ny jiogako, ary maivana ny didiko”.

— Izany àry ny tenin’ny Tompo.

— Dera anie ho Anao, ry Kristy!

29/06/2026

𝗣𝗲̀𝗿𝗲 𝗣𝗲𝗱𝗿𝗼 𝗣𝗮𝗯𝗹𝗼 𝗢𝗽𝗲𝗸𝗮

Amin'ity Alatsinainy 29 Jona ity, mankalaza ny faha-78 taonany i Père Pedro Opeka, pretra malaza amin'ny asa lehibe sy ny ezaka ataony eto Madagasikara.

Pretra misionera eto Madagasikara izy, ary efa 30 taona mahery no nirotsahany tamin'ny ady amin'ny fahantrana. Noho ny asa miavaka vitany dia nomen'ny Filoha frantsay Emmanuel Macron azy ny mari-boninahitra ambony frantsay Légion d'honneur.

Efa ho 37 taona izay no nahatongavany teto amin'ny Nosy Madagasikara. Hatramin'izay dia nanokana ny fiainany hanampiana ny mponina izy, indrindra ireo ankizy, mba hahafahan'izy ireo manana fiainana sy hoavy tsaratsara kokoa.

27/06/2026

ALAHADY FAHA-28 JONA 2026

ALAHADY FAHA-13 MANDAVANTAONA — TAONA A

"NY SOA ATAO, LEVENAM-BOLA"

𝗘𝗩𝗔𝗡𝗝𝗘𝗟𝗬 𝗠𝗔𝗦𝗜𝗡𝗔 𝗡𝗢𝗦𝗢𝗥𝗔𝗧𝗔𝗡'𝗜 𝗠𝗱 𝗠𝗔𝗧𝗜𝗢 10, 37-42

Izay tsy mitondra ny hazofijaliany dia tsy mendrika Ahy. Izay mandray anareo mandray Ahy.

Tamin’izany andro izany, i Jesoa nanao tamin’ny mpianany hoe: “Izay tia ny rainy sy ny reniny mihoatra noho Izaho, dia tsy mendrika Ahy; ary izay tia ny zanany lahy na ny zanany vavy mihoatra noho Izaho, dia tsy mendrika Ahy. Ary izay tsy mitondra ny hazofijaliany ka tsy manaraka Ahy, dia tsy mendrika Ahy. Izay mamonjy ny ainy no hahavery azy, fa izay hahafoy ny ainy noho ny amiko kosa no hahavonjy azy. Izay mandray anareo, mandray Ahy; ary izay mandray Ahy, dia mandray Izay naniraka Ahy. Izay mandray ny mpaminany noho izy mpaminany, dia hahazo valisoan’ny mpaminany; ary izay mandray olo-marina noho izy olo-marina, dia hahazo valisoan’ny olo-marina; ary na iza na iza hanome rano mangatsiaka na dia eran’ny kapoaka monja aza hosotroin’ny anankiray amin’ireo madinika indrindra ireo, noho izy mpianatro, dia lazaiko marina aminareo fa tsy ho very valisoa izy.”

— Izany àry ny tenin’ny Tompo.

— Dera anie ho Anao, ry Kristy!

20/06/2026

ALAHADY FAHA 21 JONA 2026 - ALAHADY FAHA 12 MANDAVANTAONA - A

"𝐌𝐀𝐇𝐀𝐓𝐎𝐊𝐘 𝐀𝐍𝐃𝐑𝐈𝐀𝐌𝐀𝐍𝐈𝐓𝐑𝐀 𝐊𝐀 𝐑𝐄𝐒𝐄𝐎 𝐍𝐘 𝐓𝐀𝐇𝐎𝐓𝐑𝐀"

𝗘𝗩𝗔𝗡𝗝𝗘𝗟𝗬 𝗠𝗔𝗦𝗜𝗡𝗔 𝗡𝗢𝗦𝗢𝗥𝗔𝗧𝗔𝗡'𝗜 𝗠𝗱 𝗠𝗔𝗧𝗜𝗢 10, 26-33

Aza matahotra izay mamono ny vatana.

Tamin’izany andro izany, i Jesoa nilaza tamin’ny Apôstôly hoe: “Aza matahotra ny olona ianareo, fa tsy misy takona izay tsy haseho, na miafina izay tsy ho fantatra. Izay lazaiko aminareo ao amin’ny maizina dia ambarao eo amin’ny mazava; ary izay bitsibitsihina amin’ny sofinareo, torio eny ambony tafon-trano; ary aza matahotra izay mamono ny vatana, fa tsy mahay mamono ny fanahy, fa aleo matahotra izay mahay mamarina ny vatana sy ny fanahy any amin’ny afobe. Moa tsy varifitoventy monja va no vidin’ny fody roa. Kanefa na ireny aza tsy hisy latsaka amin’ny tany iray akory, raha tsy avelan’ny Rainareo. Na ny volon-dohanareo aza dia efa voaisa avokoa. Koa aza matahotra fa mihoa-bidy lavitra noho ny fody maro ianareo. Ary amin’izany, izay rehetra hanaiky Ahy eo anatrehan’ny olona, dia hoekeko kosa izy eo anatrehan’ny Raiko izay any an-danitra; ary izay handà Ahy eo anatrehan’ny olona, dia holaviko kosa izy eo anatrehan’ny Raiko izay any an-danitra”.

— Izany àry ny tenin’ny Tompo.

— Dera anie ho Anao ry Kristy!

17/06/2026

𝗠𝗴𝗿 𝗠𝗮𝗺𝗶𝗮𝗿𝗶𝘀𝗼𝗮 𝗠𝗼𝗱𝗲𝘀𝘁𝗲 𝗥𝗔𝗡𝗗𝗥𝗜𝗔𝗡𝗜𝗙𝗔𝗛𝗔𝗡𝗔𝗡𝗔

Teraka tamin’ny taona 1967 tao Fiakarana-Ambohitrimanjaka i Mgr Mamiarisoa Modeste Randrianifahanana. Izy no faralahin’ny zanaka 14 mianadahy. Nohamasinina ho pretra tamin’ny taona 1997 izy.
Nandritra ny fotoam-panompoany dia efa nitana andraikitra maro izy: mpitantsoratra ara-panahy (aumônier), rektoran’ny seminera, misionera nandritra ny folo taona mahery tany La Réunion, ary mpanabe tao Antsirabe. Tamin’ny taona 2023 kosa dia notendrena ho Vikera Jeneralin’ny Arsidiosezin’Antananarivo izy. Ny lalana nodiaviny, izay mampifandray ny fiorenana lalina amin’ny zava-misy eto an-toerana sy ny fisokafana amin’ny sehatra iraisam-pirenena, dia manaporofo ny fahatokiany sy ny fanoloran-tenany amin’ny fanompoana ny Eglizy.

Amin’ny maha Eveka Mpanampy azy, i Mgr Randrianifahanana dia hanampy ny Arsevekan’Antananarivo amin’ny andraikitra pastoraly sy fitantanana sahaniny. Anisan’ny asa hiandraiketany ny fanamafisana ny fisiany eny amin’ny paroasy, ny fanatanterahana ny sakramenta, indrindra ny Fankaherezana, ary ny fandrindrana ireo sampan-draharaha pastoraly maro samihafa.
Ao anatin’ny Arsidiosezin’Antananarivo, izay midadasika sy be mponina ary miatrika fanamby ara-tsosialy sy ara-panahy lehibe, dia mikendry ny hanamafy ny fifandraisana akaiky amin’ny vahoakan’Andriamanitra sy hanatsara ny fitantanana ny Eglizy ny iraka ampanaovina azy.

Tsara marihina fa amin’ny maha Eveka Mpanampy azy dia tsy misolo toerana ny Arseveka i Mgr Randrianifahanana, fa manampy azy amin’ny fanatanterahana ny andraikiny. Izany dia mariky ny fitokisana asehon’i Roma amin’ny fahavitrihan’ny Eglizy Katolika malagasy, indrindra ny Eglizy eto Antananarivo, izay miroso amim-panantenana manoloana ny ho avy.

📝 Loharano: midi-madagasikara.mg⁠

Address

Antananarivo

Website

facebook.com

Alerts

Be the first to know and let us send you an email when Vononan'ny tanora EKAR Soavina posts news and promotions. Your email address will not be used for any other purpose, and you can unsubscribe at any time.

Want your organization to be the top-listed Non Profit Organization in Antananarivo?