18/02/2026
Faleminderit Radio Ulqini dhe gazetares Arijona Resulani!
🇦🇱Mbi 470 thirrje për ndihmë brenda vitit: SOS Telefoni Ulqin publikon rezultatet e projektit 12-mujor
Në Ulqin u mbajt sot tryeza e rrumbullakët për prezantimin e rezultateve të projektit "Në të drejta jemi të barabarta", një iniciativë që synon fuqizimin e grave dhe thyerjen e heshtjes ndaj dhunës me bazë gjinore.
Udhëheqësja e SOS Telefonit në Ulqin, zonja Hatixhe Nelaj, e cila prej 25 vitesh qëndron në vijën e parë të kësaj beteje, bëri të ditur shifrat që flasin për një realitet që kërkon vëmendje: 93 gra kanë kërkuar ndihmë dhe mbi 470 thirrje janë regjistruar vetëm gjatë vitit të kaluar.
Nelaj vuri theksin te vështirësitë e grave në zonat rurale dhe atyre me aftësi të kufizuara, të cilat shpesh përballen me izolim të dyfishtë dhe barriera patriarkale.
"Këto shifra nuk janë thjesht statistika. Pas secilës prej tyre fshihet një grua që vendosi të ndërprejë heshtjen. Dhuna nuk është çështje private, por përgjegjësi institucionale dhe ndërgjegje shoqërore," u shpreh Nelaj gjatë fjalimit të saj.
Gjatë projektit 12-mujor, u realizuan 10 punëtori edukative, takime multisektoriale dhe fushata mediatike "Në të drejta jemi të barabarta". Një pikë kyçe e suksesit mbetet bashkëpunimi me Komunën e Ulqinit, e cila siguron mjediset e punës për organizatën, si dhe koordinimi me policinë dhe institucionet e mirëqenies sociale.
Në panelin e sotëm ishin të pranishme edhe Marina Kastrati, drejtoreshë e Qendrës për Punë Sociale, Bilana Zekoviq nga SOS Podgorica, si dhe aktivistja Jelena Mitroviq, të cilat theksuan se roli i institucioneve nuk është vetëm administrativ, por jetik për fatin e grave dhe fëmijëve.
Mesazhi i tryezës ishte i qartë: Ulqini duhet të jetë një komunitet me zero tolerancë ndaj dhunës. SOS Telefoni mbetet adresa e guximit për të gjitha ato gra që vendosin se është koha për të jetuar pa frikë.
Për Radio Ulqin, Arjona Resulani.
