جمعية أبي لكفالة اليتيم

07/09/2026

الحمد لله، توصلنا بتفاعل من سيدة تانية تكلفت بباقي المبلغ.

والله كل مرة كنزيدو اسرة من الاسر اللي في لائحة الانتظار ، كنحسو بشعور بالرضى بالفرحة من القلب اننا قدرنا نساعدو ، نعاونو نفرحو ناس ماكانعرفوهومش ، كدعيو لينا بظهر الغيب.هو الرزق كامل من الله و لله، و انا وانت وانت فقط سبب اننا نوصلو هاد الرزق لناس كفما كنقول ديما حنا اللي محتاجينهم ماشي هما اللي محتاجينا.

شكرا مرة اخرى للسيدتين اللي تكفلو بهاد الاسرة، تقبل الله منا ومنكم، و جعلها درعكما الحصن الحصين من كل سوء ومكروه.
امين و صل اللهم وسلم وبارك على حبيبنا ونبينا وشفيعنا محمد صلى الله عليها وسلم

07/09/2026

السلام عليكم اهل الخير
شكرا للسيدة على مساهمتها بمبلغ 1000درهم شهريا لفائدة اسرة (ل.ل) اللهم تقبل منا ومنك و جعلها صدقة مقبولة باذن الله تعالى، وجعلها سترك في الدنيا والاخرة.
نداء للمحسنين لتكملة المبلغ المخصص لاسر ذات طفلين وهو 1500 درهم، لكل من يرغب بالمساهمة ب 500 درهم وبذلك غانكونو بفضل الله ساعدنا هاد الام وخففنا عليها ولو بعض الشيء الثقل اللي حاسا بيه.

كنتمنا هاد النداء يلقا محسنين يتعاطفو مع هاد الام لانها حقيقة في امس الحاجة للمساعدة.

في انتظار رسائلكم.

27/08/2026

السلام عليكم اهل الخير
اول ام غنشاركو معكم الحالة ديالها هي(ل.ل) ام ارملة بعمر 36 سنة، منذ وفاة زوجها وهي تعاني من اجل طفليها بعمل ليوم كامل من 7 صباح براتب زهيد، عسى ان توفر لهم على الاقل اش ياكلو، عايشين في سكن مشترك مع والدين الزوج الله يرحمو، هي على هاد الحال منذ 7 سنوات.

👈👈طفلة في عمر صغير لا تفارق الام وتعاني من مرض اللثة و امكانيات الام لا تسمح حتى بزيارة طبيب مختص، و ابن كتاب انه يسجن في اصلاحية زاد ثقلا على كاهل الام.

بحال هاد الأسر هي بالضبط الفئة اللي كتسعى جمعية أبي لكفالة اليتيم تكون سند ليها.

أسر كتعيش ظروف صعبة، وأمهات أرامل كيتحملو مسؤولية أطفالهم بوحدهم، وكيكافحو كل يوم باش يوفروا لأبنائهم أبسط ضروريات الحياة.
اللي بغا ينخرط معنا في الجمعية أو يحصل على معلومات حول كيفية المساعدة، المرجو التواصل معنا عبر بريد الصفحة.

نسأل الله أن يجعل كل يد تمتد بالخير في ميزان حسنات أصحابها، وأن يفرّج كربة كل محتاج.

19/03/2026

السلام عليكم اهل الخير
نتقدم بالشكر للشركة العامة المغربية للاشغال على مبادرتهم الطيبة والالتفاتة الانسانية لفائدة اسر جمعية ابي لكفالة اليتيم.
توفير 60 قفة يوم 28 من رمضان، تقبل الله منا ومنكم و متعنا و اياكم باجر كفالة يتيم.



يومكم مبارك

15/02/2026

صباح خير وفعل خيرونشر خير رزقني الله واياكم خيري الدارين يارب

بكل حماس، اليوم هو يوم اجر ، هاد الرسالة ليك كنقول ليك كتب اسمك معانا في صانعي فرحة رمضان وماشي اي فرحة ، فرحة يتيم ، واحد من ولادي وولادكم ، بغيتكم كاملين تكونو معانا نفرحو 50 اسرة ، 50 ارملة كتسنا وكتسول كل نهار على محسنين قفة رمضان. بقات لينا فقط يومىن وكلي ثقة غنوصلو وغنقدرو.
عليكم وعلينا صدقة وعلينا ايضا نوصلوها من يستحقها.

كنتسنا تبرعاتكم، واقول لي ولكم ماقل مال من صدقة.

إي استفسار راسلونا على بريد الصفحة

13/02/2026

السلام عليكم اهل الخير
جمعة جميلة مباركة علينا و عليكم

مدة هادي نقاطعت اخبارنا ومنشوراتنا على الصفحة لكن فعل الخير كان ولازال دائما مستمر، غنشارك معاكم في هاد المنشور المستجدات الى غاية اليوم :

- اضافة 11 اسرة، 17 يتيم للائحة المستفيدين من جمعية ابي لكفالة اليتيم
- تنظيم نسخة جديدة من "برد هين" لفائدة منطقة بين الويدان بتنسيق مع جمعيات محلية
- توفير مستلزمات الدخول المدرسي لفائدة اطفال الجمعية
- تخصيص حصة توجيهية لفائدة اطفال الجمعية المتمدرسين بالمستويات الاعدادي والثانوي

وكل يوم كنتوصلو بطلبات مساعدة من امهات ارامل ، دورنا اننا نحاولو نوصلو صوت معاناتهم لكل فاعل خير ومحسن مهتم بتكفل بيتيم.

نرجوكم شاركو معنا اجر المساهمة او على الاقل ساعدونا نوصلو صوتنا للناس المحسنين ، مازال اسر وامهات في لائحة انتظار طويلة، ام لرضيع، اولاطفال عمرهم اقل من 15 سنة ،كلهم كعيشو ظروف اجتماعية صعبة وهشة بكل ماتحمل الكلمة من معنى .

تقبل الله منا ومنكم

26/03/2025

السلام عليكم اهل الخير
الحمد لله الذي بلغنا رمضان، اللهم تقبل منا الصيام والقيام والصدقات.
الحمد لله،رمضان هاد السنة وككل سنة، كان مناسبة اننا نوصلو صدقاتكم وزكاتكم للناس اللي محتاجينها، شكرا لكل مساهم ومحسن كيعتبر جمعية ابي لكفالة اليتيم اليد الامينة اللي كتوصل اماناتكم للناس اللي كيستحقوها.

قدرنا الحمد لله نوفرو ما يقارب 50 قفة اللي وزعناها في بداية الشهر الفضيل، عمل يتطلب مجهود بين نجمعو المساهمات، نوفرو القفة، نتاصلو بالامهات، نوصلو ليهم هاد البركة.... لكن كل تعب يهون فاش المهمة كتسالي، وكنتاكدو بانه كل اسرة توصلت بالامانة ديالها وبأنه والحمد لله كنا قد المسؤولية.

===>حنا مستمرين في فعل الخير، في كفالة يتيم، مازال كتسناونا اسر عندهم وليدات صغار 3 سنوات، 10 سنوات، 5 سنوات ... مازالين في لائحة الانتظار،في حالة اجتماعية هشة، كنتمنا انه هاد النداء يوصل لقلوبكم وتساعدونا باش نتكفلو بهاد الوليدات ، كل التبرعات مرحب بها

ولا ننس : ما قل مال من صدقة

تقبل الله منا ومنكم

05/01/2025

04/01/2025

"Un grand merci aux Lyciens de Lyautey pour leur collaboration, leur générosité et leur douce présence aujourd'hui au sein de notre local de l'Association ABI de Bienfaisance. Merci infiniment pour le sourire qu'ils ont illuminé sur le visage des mamans.
Leur engagement est une véritable preuve d'amour, de fraternité et d'humanité.
Nous espérons vivement vous retrouver lors de prochaines actions toujours en soutien aux orphelins."

04/01/2025

السلام عليكم اهل الخير
بدينا نستقبلو المساهمات ومازال كتسناو ف اكبر عدد من الناس اللي تعاونا في هاد فعل الخير
في انتظار مساهماتكم