Здружение за одржлив социо-економски развој „Изгрејсонце“ - Скопје

15/05/2026

Општина Ѓорче Петров и Здружението „Изгрејсонце“ го промовираа проектот „Риконект Скопје“ за локални енергетски заедници

Денеска во амфитеатарот на Општина Ѓорче Петров се одржа промотивен настан на проектот „Риконект Скопје“ (REConnect Skopje), посветен на развојот на локални енергетски заедници и поттикнување на граѓанското учество во енергетската транзиција.

Настанот го отвори градоначалникот на Општина Ѓорче Петров, г. Александар Стојковски, кој го истакна значењето на локалната поддршка во процесите на енергетска транзиција.

„Ова не се само проекти за производство на електрична енергија. Ова е нов модел на соработка, доверба и заедничка одговорност, каде граѓаните, институциите, училиштата и локалните организации заедно произведуваат, користат и споделуваат чиста енергија во корист на целата заедница“, рече градоначалникот Стојковски.

Во дискусиите учествуваа и претставници од здруженијата „Биди зелен“ (Go Green) Go Green - Биди Зелен и „СмартАП“ (SmartUp) SmartUp - Social Innovation Lab , со фокус на интеграцијата на соларната енергија и зелената мобилност во локалната самоуправа.

Настанот ги собра клучните чинители за дискусија околу современите модели за производство и споделување на обновлива енергија која е водена од демократски принципи и локално учество.

Здружението „Изгрејсонце“ го претстави концептот за демократско управување со енергетските ресурси и улогата на граѓаните во локалното производство на енергија.

Беа презентирани потребите од инфраструктура за полнење на електрични возила во општината на иницијатива на „Биди зелен“ и иновативниот модел „Локални задруги за мобилност“ (Community Mobility Cooperatives), за заедничко управување со мобилни ресурси од страна на СмартАП.

Беше истакнато дека Општина Ѓорче Петров е првата сертифицирана општина во Македонија во рамки на „Лајф Луп“ (LIFE LOOP) програмата, што претставува значаен чекор кон одржливи локални практики.

Проектот „REConnect Skopje“ продолжува да работи на создавање инклузивни модели кои ќе им овозможат на граѓаните активно да учествуваат во производството и користењето на чиста енергија.

Иницијативата е дел од поширокиот проект „Подобра кохезија преку развој на енергетски заедници во Западен Балкан“ (Better cohesion through development of energy communities in the Western Balkans) поддржан од Европската Унија преку „Диџи Реџо“ (DG REGIO) и имплементиран од регионот Емилија-Ромања, Италија

10/05/2026

☀️ Од Јурмала до Скопје: енергетската иднина ја градиме заедно со граѓаните!

Од 5 до 7 мај 2026 година, Здружението за одржлив социјален и економски развој „Изгрејсонце“ – Скопје, заедно со Зелена Задруга, учествуваше на 2026 European Energy Community Forum, организиран од REScoop.eu во прекрасната Јурмала, Латвија.

Овој значаен европски форум обедини енергетски заедници, задруги, експерти, организации и партнери од цела Европа, со заедничка цел: енергијата да стане подостапна, поправедна и поблиска до граѓаните.

Како дел од еден „Lighthouse“ проект REConnect Skopje во рамки на иницијативата „Better Cohesion through Development of Energy Communities in the Western Balkans“, поддржана од Регионот Емилија-Ромања, нашето присуство на форумот беше многу повеќе од учество. Бевме таму за да учиме, да споделуваме искуства и да ја зајакнеме визијата за развој на енергетски заедници во Северна Македонија и пошироко во Западен Балкан. 🌍🤝

💡 Нашиот фокус е јасен:
развој на локални енергетски заедници засновани на обновливи извори на енергија, преку мали соларни инсталации кои ќе бидат блиску до граѓаните, во служба на заедницата и насочени кон локални придобивки.

Веруваме дека граѓаните не треба да бидат само потрошувачи на енергија, туку активни учесници во енергетската транзиција — преку информирање, здружување, заедничко вложување и демократско учество во одлучувањето.

🧩 Предизвикот што го адресираме е реален:
како да се изгради доверба во заедничкото сопствеништво, како да се создадат одржливи модели на управување и како енергетските заедници да станат практичен, стабилен и корисен модел и во средини каде што приходите се ограничени, а довербата во здружувањето сè уште треба да се гради.

Во Јурмала дискутиравме токму за овие прашања:

🔸 Како да се поврзат стручноста, транспарентноста и демократското одлучување?
🔸 Кои модели најдобро ги мотивираат граѓаните за долгорочно учество?
🔸 Како енергетските заедници да обезбедат реални придобивки за локалното население?
🔸 Како да се развие финансиски одржлив модел кој ќе биде достапен и применлив во нашиот контекст?

🚀 Се враќаме од Латвија со нова енергија, нови идеи и уште посилна посветеност.

Во изминатиот период веќе ги мапиравме клучните локални чинители, одржавме информативни средби со општини и претставници на граѓанскиот сектор и работиме на поставување на правните и организациските темели за развој на енергетски заедници кај нас.

Форумот во Јурмала ни овозможи да размениме искуства со европски партнери, да учиме од успешни модели и да ја зајакнеме соработката со партнерите од WB5 регионот.

Нашата порака е едноставна:
☀️ сонцето е заеднички ресурс — време е неговата енергија да работи за сите нас.

#изгрејсонце

25/04/2026

Враќање на довербата и улогата на граѓанското општество во развој и заштита на демократијата и интересите на граѓаните, се неопходни и важни чекори особено во услови на општествена поларизација и оттуѓеност предизвикани од новите технологии кои не се доволно регулирани.

Заврши четвртото издание на Европската зелена академија во Брисел каде во изминатите два дена се разговараше за зеленото движење и неговата улога во создавање граѓанска отпорност, но и одговор на заканите кои ги носи неконтролираната примена на вештачката интелигенција и поделбите кои ги создаваат алгоритмите на социјалните мрежи.

Но, решенијата треба да произлезат и од самите граѓани кои најдобро знаат со какви проблеми се соочуваат водени преку принципите на одржливост, демократичност и заедништво.

Зелената европска академија е во организација на Европската зелена фондација - GEF - Green European Foundation

24/04/2026

Може ли и како да се изгради отпорност кон авторитарните тенденции преку заедничките вредности, кои ги обединуваат граѓаните, активистите и зелените движења, но и да се понудат решенија за актуелните геополитички неизвесности и енергетската криза која е на повидок.

Започна Зелена академија во Брисел во организација на Зелената европска фондација GEF - Green European Foundation

Во наредните денови ќе се разговара за решенија кои може да се применат на европско ниво за зголемување на отпорноста од технолошката супермација и опасностите од алгоритмите и злоупотребата на вештачката интелигенција, одбраната на демократијата, и заканите врз граѓанското општество, меѓу другите теми

10/12/2024

Клаудија Мановска е во трет циклус на студии и во рамките на истражувањето потребно е да реализира Анкета со родители. Темата е поврзана со образование за одржлив развој во раното детство. За таа цел, таа би ве замолила да одвоите време и да ги одговорите прашањата.

Линк до Анкетата:

https://docs.google.com/forms/d/1eZDD0z9A9gR9MouGL_xenDZi0bb3jdYc8aii6y6ys7U/edit?usp=drivesdk

Здружението за социо економски развој Изгрејсонце секогаш излегува Во пресрет на сите
оние кои се занимаваат со научно истражувачка дејност и на оние кои што го
надградуваат своето знаење. Така и овој пат го споделуваме прашалникот на Клаудија
Мановска за научни цели на докторската дисертација за испитување на Вашите ставови
и мислења во однос на Образованието за одржлив развој. Ве молиме внимателно и
искрено да одговорите на поставените прашања.
Здружението за социо економски развој ИЗГРЕЈСОНЦЕ се оградува од било какви ставови и
мислења од спроведениот прашалник, и истиот на ниеден начин не ги одразуваат
позициите и ставовите на ,, Изгрејсонце”.

Почитувани, Со овој прашалник, сакаме да ги испитаме Вашите ставови и мислења во однос на Образованието за одржлив развој. Вашите одговори ќе бидат употребени искл....