Amicale vun de Beetebuerger Pompjeeën - Cibett

21/08/2026

++ Gëff Jugendpompjee ++

Du hues Loscht op eng spannend Erfarung, en Abléck an d'Welt vun de Rettungsdéngschter ze kréien, an theoreteschen a prakteschen Übunge villes fir d'Liewe léieren an dech an enger flotter Equipe ze entwéckelen? Du wëlls däin éischte Schrëtt maachen, fir mat 16 bei déi "grouss" Pompjeeën ze goen?

Da gëff Jugendpompjee zu Beetebuerg. D'Übungen si Samschdes vun 09h30-11h30 a riichten sech u Kanner a Jugendlech tëscht 8 a 16 Joer.

Intresséiert oder Froen? Da mell dech op [email protected] oder um 49771-6444.

15/08/2026

++ ℹ🇱🇺 Méiglech Gerochsbelästegung duerch Brand an der Belsch ++

Bedéngt duerch de grousse Vegetatiounsbrand an den Hautes Fagnes (B) an der aktueller Wandrichtung besteet iwwert déi nächst Stonnen d'Méiglechkeet vun enger Gerochsbelästegung an och vun Damp an der Loft. Dës steet an direktem Zesummenhang mam Brand an der Belsch a net mat engem Feier zu Lëtzebuerg.

Sollt dëst de Fall sinn, ass et d'Recommandatioun, d'Fënsteren an d'Dieren zouzehalen an d'Belëftung auszeschalten.

++ ℹ🇫🇷 Possibilité d'odeur de fumée suite à incendie en Belgique ++

En raison du feu de végétation actuellement en cours dans les Hautes Fagnes (B) et compte tenu de la direction actuelle du vent, des odeurs de feu ainsi que la présence de fumée dans l’air pourraient être constatées au cours des prochaines heures.
Cette situation est directement liée à l’incendie en Belgique et non à un incendie au Luxembourg.

Si vous constatez une odeur de fumée ou de la fumée dans l’air, il est recommandé de maintenir les fenêtres et les portes fermées et de couper les systèmes de ventilation.

Bettembourg

20/07/2026

17/07/2026

++ Pompjeesquiz 2026 - D'Umeldung ass op ++

Pompjeeën opgepasst: vun elo un ass d'Umeldung fir déi 3. Editioun vum Pompjeesquiz op. Mell elo deng Equipe un a sief Samschdes den 21. November dobäi!

Test däi Wëssen (alleng oder am beschten an der Equipe) mat Froe ronderëm d'Rettungswiese mee och Allgemengwëssen.

Bedéngt duerch d'Thematik riicht sech de Quiz exklusiv un aktiv a fréier Membere vun de Rettungsdéngschter.

Umeldung via:

D'Amicale vun de Beetebuerger Pompjeeën invitéiert op den 3. Pompjeesquiz, Samschdes den 21. November 2026. Mell deng Equipe elo un!

13/07/2026

++ Wiessel bei de Jugendpompjeeën ++

Op den 1. Juli 2026 ass et zu engem Wiessel un der Spëtzt vun der Jugendequipe zu Beetebuerg komm. De Marc Didelot huet no ville Joren säi Posten als Jugendleeder (Chef d'unité Jeunes Pompiers) un d'Tessy Emeringer ofginn.

Nieft sengem Engagement als fräiwëllege Pompjee zu Beetebuerg huet de Marc iwwert déi lescht Jore vill Energie an d'Beetebuerger Jugendpompjeeën investéiert, d'Integratioun an de CGDIS viru gedriwwen an zesumme mat senger Equipe dofir gesuergt, dass Beetebuerg op eng jonk dynamesch Grupp u Jugendlecher ziele kann.

Mir soen dem Marc Merci fir säi Engagement all déi Joren! Dem Tessy wënsche mir eng glécklech Hand op sengem neie Posten.

13/07/2026

++ Erhéichte Risiko vu Vegetatiounsbränn ++

Mat den unhalend héijen Temperaturen an der domat verbonnener Drëchent ass de Risiko vu Vegetatiounsbränn aktuell op engem ganz héije Niveau. Heiduerch kënne scho kleng Brandquellen zu engem gréissere Vegetatiounsbrand féieren.

Dofir ass et wichteg, opzepassen, fir eventuell Bränn ze vermeiden!

- Maacht kee Feier am Fräien! Wann dir a kontrolléierte Beräicher grillt, denkt dru Waasser oder e Feierläscher prett ze hunn.
- Geheit keng Zi******en oder Äsche vum Grill an d'Natur.
- Geheit keng Glasfläschen an d'Natur.
- Stellt är Gefierer net an d'Wiss oder op Felder

Fir dass d'Rettungsdéngschter séier op hier Plaz kommen, ass et wichteg, dass dir just op virgesinne Plaze parkt an net op Bëschweeër oder Accès'en an d'Bëscher.

Wann et zu engem Feier kënnt ass et wichteg, direkt den 112 unzeruffen!

18/06/2026

++ Avis de chaleur - vigilance orange ++

Vun e Freideg un an iwwert déi nächst Deeg gëllt eng Alerte Orange wéinst grousser Hëtzt. D'Temperature klammen iwwer 30°C a riskéieren och nuets net ënner 20°C ze falen.

Och wann héich Temperaturen am Summer normal sinn, esou sinn dës awer eng Belaaschtung fir de Kierper. Grad en vue vun de villen Evenementer de Weekend a ronderëm Nationalfeierdag, ass et dofir de Rappel, opzepassen:

- Drénkt genuch Waasser (min. 1,5L)
- Haalt iech net ze vill an der Sonn op an evitéiert kierperlech ustrengend Aktivitéiten.
- Denkt un eng Kapp-Bedeckung, wann dir dobausse sidd.
- Kuckt no eeleren oder vulnerabele Leit. Bleift a Kontakt mat hinnen a suergt dofir, dass si reegelméisseg a genuch drénken.
- Evitéiert all Aktivitéiten, déi zu engem Brand féiere kënnen.

Loosst op kee Fall Kanner oder Déieren am Auto, dëst ka schonn no e puer Minutte liewensgeféierlech ginn. Kuckt, dass dir Waasser am Auto hutt, am Fall vun engem längere Stau.

Am Noutfall gëllt et den 112 unzeruffen.

Den CIS Bettembourg ass am Austausch mat der Gemeng Beetebuerg, fir d'Sécherheet och um Virowend Nationalfeierdag ze garantéieren.

15/06/2026

E Samschdeg huet d’Amicale vun de Beetebuerger Pompjeeën op hiert Summerfest invitéiert.

14/06/2026

++ Aweiung vu restauréiertem Pompjeeswon ++

A Präsenz vun ënnert anerem dem Buergermeeschter Jean Marie Jans, dem Chef de Zone Christopher Schuh, Vertrieder vum Schäffen- a Gemengerot esou wéi dem Paschtouer Edmond Ries ass gëschter um Summerfest de restauréierte Won vun de Beetebuerger Pompjeeën ageweit ginn.

De Won, deen d’Pompjeeën 1950 fir hire 50. Anniversaire kritt hunn, ass iwwert déi lescht Méint opwänneg restauréiert ginn. Och wann d’Aarbechten net ganz ofgeschloss sinn, esou ass dësen awer e Samschdeg dem Publik virgestallt ginn.

Ewéi d’Traditioun et zu Beetebuerg wëll ass d’Gefier vum Paschtouer geseent ginn. Och den neie Fändel, deen d’Pompjeeën 2025 fir hiren 125. Anniversaire kritt hunn ass hei geseent ginn.

Uschléissend ass nach d’Beschrëftung vum Won dévoiléiert ginn. Esou wéi dat 1950 nach de Fall war, ass dës Beschrëftung nach mam Pinsel opgedroe ginn, dëst vum Kënschtler Nico Langehegermann.

Als Ofschloss huet d’Gemeng nach op e Patt invitéiert, befir d’Leit de Won bewonnere konnten.