Street Souls Asbl

22/08/2026

❤️ Impressioune vum véierten Dag 🐾❤️

Haut war schonn eise leschten Dag am Déierenasyl – an och dësen Dag war nach eemol voll verplangt.

Als Éischt hu mir eng Fleegeplaz besicht, fir en Hond kennenzeléieren, deen do momentan a Fleeg ass.
Den Ozzy ass e super Hond a mir hoffen vun Häerzen dass hien séier seng eege Famill fënnt.
Duerno si mir d’Kitty an de Shelter siche gaang an hunn hatt op eng aner Fleegeplaz bruecht, well bei him de Verdacht besteet, dass hatt epileptesch Krise mecht. Do kann hatt elo gutt observéiert ginn, a seng Behandlung kann optimal agestallt ginn.

Natierlech hu mir eis och haut nees vill Zäit fir d’Déieren am Asyl geholl: mir si mat hinnen un der Léngt erausgaangen, hunn nei Fotoen a Videoe gemaach an si virgestallt. 🐶📸 Mir hunn och eng ganz Rei Neizougäng kennegeléiert an observéiert, wéi si mat Mënschen an aneren Hënn interagéieren. All dës Informatioune si wichteg, fir hinnen déi beschtméiglech Chance op eng passend Adoptioun ze ginn.

Haut Äddi ze soen ass eis immens schwéier gefall. 💔 Mir hunn déi vill Déieren an dëse puer Deeg an d’Häerz geschloss a sinn traureg, datt eis Rees elo eriwwer ass. Mee et ass keen Äddi fir ëmmer: am Oktober si mir erëm do! ❤️

Mir hoffen aus ganzem Häerz, datt duerch dës Rees vill vun den Hënn entdeckt goufen an datt si geschwënn hiert Doheem zu Lëtzebuerg fannen. 🏡🐾

Dofir eis grouss Bitte un Iech: Deelt eis Posts weider! All Share hëlleft, datt dës Déiere gesi ginn – a vläicht erreecht hire Post genee déi Persoun, bei där hiert neit Liewe ufänkt. ❤️

22/08/2026

21/08/2026

❤️🐾 Impressioune vum drëtten Dag 🐾❤️

Och eisen drëtten Dag war nees voller Momenter, déi eis beréiert hunn an déi mir esou séier net vergiesse wäerten. ❤️

Haut ass eng nei Mudder an de Shelter komm. Déi aarm Maus gouf einfach matzen an der Stad ausgesat an hirem Schicksal iwwerlooss. 💔
Mir hunn him den Numm Emma ginn. An och wann dem Emma seng Geschicht traureg ugefaangen huet, hoffe mir vun Häerzen, datt hatt elo um Ufank vun engem vill méi schéine Kapitel steet. 🐾❤️

D’Emma huet haut schonn di éischt Impfung kritt an ass domat an ongeféier engem Mount prett fir ze reesen. Elo feelt hirm just nach dat Allerwichtegst: eng Famill. 🏡❤️
Mënschen, déi him eng Chance ginn, him weisen, wéi et ass, gär gehat ze ginn, an him endlech dat Doheem schenken, dat hatt esou verdéngt huet.

Mir hunn eis haut och nees ganz bewosst Zäit fir déi Hënn geholl, déi leider vill ze dacks iwwersi ginn. Déi, laanscht déi d’Leit ëmmer nees ginn. Déi waarden. Dag fir Dag. 💔
Mir si mat hinnen erausgaangen, hu Fotoen a Videoe gemaach a probéieren, hinnen esou déi Visibilitéit ze ginn, déi si verdéngen. 📸🐶
Well vläicht brauch et just déi eng Foto, dee klenge Video oder ee Share, fir datt endlech dee richtege Mënsch si gesäit.

Ausserdeem ware mir haut mat enger Kaz beim Veterinär. Si leid u Kazeschnapp a muss elo behandelt ginn. 🐱❤️‍🩹 Och si kritt déi Betreiung an Opmierksamkeet, déi si elo esou dringend brauch.

Duerno si mir nach op eng Fleegeplaz gefuer, wou mir weider Hënn kennegeléiert hunn, déi all op dat selwecht waarden: hir eege Famill. Hiert eegent Doheem. Hir Chance op en neit Liewen. 🏡🐾

All eenzelent vun dësen Déieren huet seng eege Geschicht.
All eenzelent huet seng eege Narben, seng eegen Hoffnungen an säin eegene Charakter.
An all eenzelent vun hinne verdéngt et, gesinn, gär gehat an net vergiess ze ginn. ❤️

Dofir hu mir haut eng ganz grouss Bitte un Iech: Deelt dëse Post. 🙏❤️
Deelt och eis Live-Videoe vun deene leschten Deeg. Erzielt anere Leit vun dësen Déieren.

Well mat all Share erreeche mir méi Mënschen. A vläicht ass genee ënnert hinnen déi eng Persoun oder déi eng Famill, op déi ee vun dësen Déiere schonn esou laang waart.

Fir eis ass et vläicht just ee Klick.
Fir si kann et d’Chance vun hirem Liewe sinn. 🥺🐾

Deelen hëlleft.
Deelen mécht si siichtbar.
An heiansdo kann een eenzege Share e ganzt Liewe veränneren. 🐾❤️