01/07/2026
📌 ගුරු අරගලය පාවා දුන්නේ කවුද?
අද වනවිට ගුරු සේවයේ ලක්ෂයකට අධික පිරිසකට උසස්වීම් සහ වැටුප් වර්ධක ලබාගැනීමේ අවස්ථාව අහිමි කර ඇත. එමෙන්ම සමස්ත ගුරු ප්‍රජාවටම තමන්ට හිමි වැටුපෙන් 2/3ක විෂමතාවයක් නිසා අවප්‍රමාණය වූ වැටුපකින් සැනසීමට සිදුවී තිබේ. ඉන් ඔබ්බට දරුවන් ශික්ෂණය කිරීමේදී සිදුවන ගැටලුවලදී දණ්ඩ නීති සංග්‍රහය ඉදිරියේ වින්දිතයන් බවට ද පත් කර තිබේ.
දීර්ඝ කාලීන අරගලයකින් පසු දිනාගත් ගුරුසේවා ව්‍යවස්ථාව අනුව ගුරුවරුන්ට හිමි වැටුපේ විෂමතාව ඉවත් කිරීම සඳහා වසර තිහකට ආසන්න කාලයක් තිස්සේ අප සටන් කර තිබේ. ඒ හා සමානම කාලයක් ගුරුවරුන්ගේ උසස් වීම් හා වැටුප් වර්ධක සඳහා විද්‍යාත්මක ක්‍රමවේදයක් දිනා ගැනීම වෙනුවෙන් අරගල කිරීමට සිදුවිය.
2024 ජුලි මාසයේ කොළඹට කැඳවූ 13,000කට වැඩි පිරිසක් සහභාගී වූ උද්ඝෝෂණයේදී අපගේ ඉල්ලීම් ජයග්‍රහණය කිරීම සඳහා ඓතිහාසික අවස්ථාවක් උදාවිය. එහෙත් ඉදිරියට පැමිණීමට නියමිත මැතිවරණ ජයග්‍රහණය වෙනුවෙන් එම සටන පාවා දෙනු ලැබීය. අනාගතයේ තමන් පිහිටවන ජනතාවාදී ආණ්ඩුවකින් සියලු ඉල්ලීම් ලබාදෙන බවට ලංකා ගුරුසේවා සංගමයේ මහින්ද ජයසිංහ ප්‍රසිද්ධියේ පොරොන්දු විය. ඔහුගේ වචන විශ්වාස කළ කේවට්ට ගුරු සංගම්වල පාවාදීම හමුවේ සටන විසිර ගියේය.
දැන් එම ඊනියා ජනතාවාදී ආණ්ඩුවට වසර එකහමාරකට වඩා කාලයක් රට ආණ්ඩුකරණය කර තිබේ. කලින් කලට ආණ්ඩු විසින් පොදුවේ රාජ්‍ය සේවකයින්ගේ වැටුප් වැඩි කිරීම් කරනු ලැබුව ද, එහි ගුරුවරුන්ගේ වැටුප් ඉල්ලීම හෝ ගුරු වෘත්තිය ගුණාත්මකභාවය වර්ධනය කිරීම වෙනුවෙන් අප කළ ඉල්ලීම්වලට සම්බන්ධතාවයක් හෝ අනුකූලතාවයක් නොවීය.
ගුරුසේවා ව්‍යවස්ථාවට අනුව ගුරුවරුන්ගේ උසස් වීම් සහ වැටුප් වර්ධක වෙනුවෙන් ආවරණය කළ යුතු මොඩියුල 21ක් දක්වා ඇතත් මොඩියුල ඉගැන්වීමේ ක්‍රමවේද බිඳ වැටී ඇත. දැන් වසර එකහමාරක් තිස්සේ මේ සඳහා නියමිත ක්‍රමවේදයක් සැකසීමට ආණ්ඩුව අසමත්වීමත් සමග සිය උසස් වීම හා වැටුප් වර්ධකය අහිමි කර ගනිමින් විශ්‍රාම යෑමට දැවැන්ත ගුරු පිරිසකට සිදුවී තිබේ.
පාසල් 10,047ක ලක්ෂ 43ක් පමණ වන දරුවන් වෙනුවෙන් 230,000ක් ගුරුවරුන් විද්‍යාත්මක පදනමකින් තුලනය කිරීම ආණ්ඩුව අතහැර දමා තිබේ. පාසල්වල දරුවන් ශික්ෂණය කිරීමේදී ඇතිවන දණ්ඩන නීති හා මානව හිමිකම් බිඳ වැටීම් වෙනුවට අධ්‍යාපනික බලපෑම් කිරීමේ විෂයානුබද්ධ පුහුණුවක් ගුරුවරයාට ලබාදී නැත. ගුරුවරයා නීතිය ඉදිරියේ වින්දිතයෙක් බවට පත්ව තිබේ. ඊට ප්‍රතිචාර ලෙස ගුරුවරුන් ශික්ෂණ ක්‍රියාවලිය පන්ති කාමරයේ විෂය ඉගැන්වීමට සීමාකිරීමට පෙළඹීමෙන් පාසල් පද්ධතිය වේගයෙන් බිඳ වැටෙමින් තිබේ.
ආණ්ඩුව හඳුන්වා දී තිබෙන ඊනියා අධ්‍යාපන ප්‍රතිසංස්කරණ හරහා ඉගෙනුම් ඉගැන්වීම් ක්‍රියාවලිය වඩ වඩාත් දුෂ්කර කර තිබේ. ආර්ථිකමය හැකියාවන් සහිත පිරිසකට අධ්‍යාපනය සීමාවෙමින් දරුවන් අධ්‍යාපනයෙන් පිටමන් කරමින් තිබේ. ලංකා ගුරු සේවය වෘත්තීය සේවාවක් බවට පත්කිරීම සඳහා සියලු ගුරුවරුන් පුහුණු උපාධිධාරීන් බවට පත් කිරීමත්, සේවයේ යෙදී සිටින ගුරුවරුන්ට නියමිත සේවා කාලයකට පසු වෘත්තීය සේවා ගුණාත්මකභාවය යාවත්කාලීන කිරීම සඳහා නේවාසික පුහුණු ආරම්භ කිරීමත්, ගුරුසේවයට බඳවා ගැනීම සඳහා විශ්වවිද්‍යාල අධ්‍යාපන පීඨ හරහා අධ්‍යාපනවේදී උපාධි ප්‍රධානයන් පුළුල් කිරීමත් අපගේ ප්‍රධාන ඉල්ලීම් විය.
එහෙත් ආණ්ඩුව වසර හතරක් තිස්සේ විශ්වවිද්‍යාල අධ්‍යාපනවේදී උපාධිධාරින් ගුරු සේවාවට බඳවාගෙන නැත. ඒ වෙනුවට පෞද්ගලික අධ්‍යාපන ආයතනවල උපාධි ලබාදීම නියාමනය කිරීම සඳහා නීති සැකසීමට ප්‍රමුඛතාවය දී තිබේ. ගුරුවරුන්ගේ පූර්ණ ආශිර්වාදයෙන් ඔවුන්ගේ කරමතින් බලයට පැමිණි ආණ්ඩුව ඉතා වේගයෙන් රටේ අධ්‍යාපනයත්, ගුරුවරුන්ගේ වෘත්තීය ඉල්ලීමත් පාවා දී තිබේ.
අයිතිය පුවත්පත
