16/09/2026
ප්‍රජාශක්ති සහන සේවා බලකාය – “එක්ව ශක්තිමත්” ව්‍යාපෘතියේ තවත් අදියරක්
වවුනියාව දිස්ත්‍රික්කයේ පෙරියකුලම් ප්‍රදේශයේ පවතින දැඩි වියළි කාලගුණික තත්ත්වය හේතුවෙන් ජනතාවට සහ ඔවුන්ගේ සතුන්ට දැඩි ජල හිඟයකට මුහුණ දීමට සිදුව තිබේ. ප්‍රදේශයේ ජනතාවගේ ප්‍රධාන ජීවනෝපාය මාර්ගයක් වන කිරි ගව පාලනය මත පවුල් රැසක් යැපෙන බැවින්, මෙම ජල හිඟය සතුන්ගේ පැවැත්මට මෙන්ම ඔවුන්ගේ ආදායම් සහ ජීවනෝපාය ආරක්ෂාවටද දැඩි බලපෑමක් එල්ල කරයි.
මෙම ගැටලුව ප්‍රජාව විසින්ම හඳුනාගෙන තිබූ අතර, ඔවුන් ප්‍රදේශීය මට්ටමේ සහයෝගය සහ පවතින සම්පත් භාවිත කරමින් මූලික සහන කටයුතු ආරම්භ කර තිබුණි. ගොවීන් විසින් වැව් පතුල්වල එකතු වන සීමිත ජලය සතුන්ට ලබාදීමට කටයුතු කළ අතර, තවත් ප්‍රජා කණ්ඩායම් කුඩා බේසම් සහ වෙනත් භාජනවලට ජලය එකතු කරමින් සතුන්ගේ දෛනික ජල අවශ්‍යතාව සපුරාලීමට උත්සාහ කළහ. කෙසේ වෙතත්, මෙම තාවකාලික ක්‍රම දිගුකාලීනව ප්‍රමාණවත් නොවීය.
එල් නීනෝ තත්ත්වය හා ඒ ආශ්‍රිත දැඩි වියළි කාලගුණික තත්ත්වය හේතුවෙන් ජල මූලාශ්‍ර සිඳී යාමත් සමඟ, කිරි ගවයන් 170ක් ඇතුළු සතුන් සඳහා පානීය ජලය සපයා ගැනීම ප්‍රජාවට තවදුරටත් අභියෝගයක් විය. ඒ අනුව, ප්‍රජාව විසින් හඳුනාගත් මෙම අවශ්‍යතාවයට තිරසාර විසඳුමක් ලබාදීම සඳහා බාහිර සහයෝගයක් අවශ්‍ය විය.
මෙවැනි අවස්ථාවලදී ප්‍රජාව විසින්ම ආරම්භ කරන සහන කටයුතු ශක්තිමත් කිරීමේ අරමුණින් RED ආයතනය විසින් 2026 සැප්තැම්බර් මාසයේදී “එක්ව ශක්තිමත්” ව්‍යාපෘතිය මගින් ප්‍රජාශක්ති සහන සේවා බලකායේ ප්‍රජා කණ්ඩායමේ ඉල්ලීම මත පෙරියකුලම් ප්‍රදේශයේ ජල හිඟයට විසඳුමක් ලබාදීම සඳහා සහයෝගය ලබාදෙන ලදී.
ඒ අනුව, ප්‍රදේශයේ ස්ථාන කිහිපයක කුඩා සිමෙන්ති ජල ටැංකි 10ක් පමණ ඉදිකිරීමට අවශ්‍ය මූල්‍ය හා අනෙකුත් පහසුකම් සපයන ලදී. මෙම ටැංකි කිරි ගවයන්ට පමණක් නොව, වියළි කාලගුණික තත්ත්වය හේතුවෙන් ජලය සොයා පැමිණෙන අනෙකුත් සතුන්ටද භාවිත කළ හැකි පරිදි සකස් කර ඇත. එමෙන්ම, සතුන්ගේ ජීවිත ආරක්ෂා කිරීමේ වැදගත්කම පිළිබඳවද ප්‍රජාව දැනුවත් කරන ලදී.
මෙම මැදිහත්වීම හරහා නැවත පදිංචි කරන ලද පවුල් 50කට ආසන්න සංඛ්‍යාවකට සෘජුව හා වක්‍රව ප්‍රතිලාභ සැලසෙනු ඇතැයි අපේක්ෂා කෙරේ. විශේෂයෙන්ම, ගව පාලනය මත යැපෙන පවුල්වල සතුන්ගේ පැවැත්ම ආරක්ෂා කිරීම සහ ඔවුන්ගේ ජීවනෝපාය අඛණ්ඩව පවත්වාගෙන යාම සඳහා මෙය වැදගත් දායකත්වයක් සපයයි.
මෙය හුදෙක් ජල ටැංකි ඉදිකිරීමක් පමණක් නොව, බාහිර සහයෝගයක් ලැබෙන තෙක් බලා නොසිට, ප්‍රජාව විසින්ම ආරම්භ කළ සහන කටයුතු ප්‍රජාව සමඟ එක්ව තවදුරටත් ශක්තිමත් කිරීමකි.
ප්‍රජාව ආරම්භ කරන විට, අපි එක්ව එය ශක්තිමත් කරමු.
“එක්ව ශක්තිමත්” – ප්‍රජාව සමඟ, ප්‍රජාව වෙනුවෙන්.
පහත දැක්වෙන්නේ ප්‍රජාශක්ති සහන සේවා බලකායේ ප්‍රජා කණ්ඩායම විසින් RED ආයතනයේ මූල්‍ය සහයෝගය සහ ප්‍රදේශීය ප්‍රජා සහභාගීත්වය මත ඉදිකරන ලද ජල ටැංකි කිහිපයකි.
