08/09/2026
கல்முனை வடக்கு உப பிரதேச செயலாளரா? அல்லது பிரதேச செயலாளரா?; நீதிமன்றில் அம்பலமான முக்கிய திருப்பம்!
கல்முனையன்ஸ் போரம் அமைப்பினால் மனுதாரர் முபாரிஸ் எம். ஹனீபாவினால் தாக்கல் செய்யப்பட்ட எழுத்தாணை மனு (WRT/645/23) இன்று (07) மேன்முறையீட்டு நீதிமன்றத்தில் விசாரணைக்கு எடுத்துக்கொள்ளப்பட்டது.
இத்துடன், முன்னாள் பாராளுமன்ற உறுப்பினர் தவராசா கலையரசனினால் தாக்கல் செய்யப்பட்ட மற்றொரு எழுத்தாணை மனுவும் (WRT/67/23), ஏ.எம். நஸீரினால் தாக்கல் செய்யப்பட்ட எழுதாணை மனுவும் ((WRT/300/18) இணைக்கப்பட்டு விசாரணைகள் முன்னெடுக்கப்பட்டன.
கலையரசனினால் தாக்கல் செய்யப்பட்ட மனுவிற்கான இடையீட்டு மனுதாரர்களாக முன்னாள் இராஜாங்க அமைச்சர் சட்டத்தரணி எச்.எம்.எம். ஹரீஸ் மற்றும் கல்முனை மாநகர சபையின் முன்னாள் உறுப்பினர் எம்.ஏ. கலீலுர் ரஹ்மான் ஆகியோர் உள்ளனர்.
மனுதாரர் முபாரிஸ் எம். ஹனீபா சார்பில் தாக்கல் செய்யப்பட்ட வழக்கில் சட்டத்தரணி றுடானி ஸாஹிரின் வழிகாட்டலின் கீழ் ஜனாதிபதி சட்டத்தரணி விரான் கோரியா ஆஜராகியிருந்தார்.
முன்னாள் பாராளுமன்ற உறுப்பினர் கலையரசன் அவர்களின் மனுவை ஆதரித்து ஜனாதிபதி சட்டத்தரணி எம்.ஏ. சுமந்திரன் தனது சட்ட வாதங்களை சுமார் ஒரு மணித்தியாலங்களுக்கு மேல் முன்வைத்தார்.
மனுதாரர் முபாரிஸ் எம். ஹனீபா தாக்கல் செய்த மனுவில் கல்முனை வடக்கு உப பிரதேச செயலகத்தில் கடமையாற்றும் ஐந்தாவது பிரதிவாதி "பிரதேச செயலாளர்" அல்ல மாறாக அவர் ஒரு "உப பிரதேச செயலாளர்" (ADS) மட்டுமே என்பதாகும்.
அதனடிப்படையில், ஒரு உப பிரதேச செயலாளர் என்பவர் பிரதேச செயலாளருக்குரிய முழுமையான அதிகாரங்களையும் கடமைகளையும் செயற்படுத்தவோ அல்லது உத்தியோகபூர்வ கடிதத் தலைப்புகள், பதவி முத்திரைகள் மற்றும் ஏனைய அலுவலக ஆவணங்களில் தன்னை "பிரதேச செயலாளர்" எனத் தகுதியுயர்த்திப் பயன்படுத்தவோ முடியாது என்பதை உறுதிப்படுத்தவும், இத்தகைய செயற்பாடுகளைத் தடுக்குமாறு கட்டளையிடக் கோரியும் இந்த எழுத்தாணை மனு தாக்கல் செய்யப்பட்டுள்ளது.
இன்றைய மேன்முறையீட்டு நீதிமன்ற அமர்வில், ஐந்தாவது பிரதிவாதியான கல்முனை வடக்கு உப பிரதேச செயலகத்தின் சார்பில் ஆஜரான சட்டத்தரணியிடம் அவரது தரப்பின் நிலைப்பாட்டைத் தெளிவுபடுத்துமாறு நீதிபதிகள் கேட்டுக்கொண்டனர்.
அதற்குப் பதிலளித்த பிரதிவாதி தரப்புச் சட்டத்தரணி, ஐந்தாவது பிரதிவாதி ஒரு "உப பிரதேச செயலாளர்" மட்டுமே என்பதைத் திறந்த நீதிமன்றத்தில் வெளிப்படையாக ஒப்புக்கொண்டார்.
இதனைத் தொடர்ந்து குறுக்கிட்ட அரசுத் தரப்புச் சட்டத்தரணி, இவ்விடயம் இன்று நீதிமன்றத்தில் தெளிவாக ஒப்புக்கொள்ளப்பட்டுள்ளதுடன், அதுவே அரசின் நிலைப்பாடும் ஆகும் எனக் குறிப்பிட்டார்.
மேலும், சட்டமா அதிபர் திணைக்களத்தால் தயாரிக்கப்பட்டுள்ள சத்தியக்கடதாசியில் ஐந்தாவது பிரதிவாதி ஏன் கையொப்பமிடவில்லை என்பது குறித்தும் அவர் கேள்வி எழுப்பினார்.
கல்முனை வடக்கு உப பிரதேச செயலாளர் ஓர் அரச அதிகாரியாகப் பதவியில் இருப்பினும், சட்டமா அதிபர் திணைக்களம் அவருக்காக ஆஜராகுவதிலிருந்து விளகியிருந்த நிலையில், தனக்கெனத் தனிப்பட்ட (Private) சட்டத்தரணி ஒருவரை நியமித்து வழக்கு நடவடிக்கைகளை முன்னெடுத்து வருவது இங்கு குறிப்பிடத்தக்கது ஆகும்.
இதனைத் தொடர்ந்து, வழக்கின் முழுமையான இறுதி விவாதங்களுக்காக எதிர்வரும் 07.10.2026 மற்றும் 02.11.2026 ஆகிய இரு தினங்கள் ஒதுக்கப்பட்டு, வழக்கு விசாரணை அன்றைய நாளுக்கு ஒத்திவைக்கப்பட்டது.
இன்றைய மேன்முறையீட்டு நீதிமன்ற நடவடிக்கைகளின் வாயிலாக, கல்முனை வடக்கு உப பிரதேச செயலகத்தில் கடமையாற்றுபவர் ஒரு "உப பிரதேச செயலாளர்" மட்டுமே என்பதும், அவர் "பிரதேச செயலாளர்" அல்ல என்பதும் திறந்த நீதிமன்றத்தில் தெளிவாகப் பதிவு செய்யப்பட்டுள்ளமை குறிப்பிடத்தக்கது.
