11/03/2026
ලෝක ඉතිහාසයේ පළමු පාසල් ක්රිකට් තරගය ලෙස වාර්තා වෙන්නේ, 1805 දී එංගලන්තයේ, Eton College සහ Harrow School අතර පැවති තරගයයි. ශ්රී ලාංකේය ඉතිහාසය තුළ පළමු පාසැල් ක්රිකට් තරගය ලියවෙන්නේ,1880 දී රාජකීය විද්යාලය (එදා Royal Academy) සහ ගල්කිස්ස ශාන්ත තෝමස් විද්යාලය නමිනි. එය, ගාලුමුවදොර පිටියේ දී පැවති අතර පසුව එය, "Big Match, (Battle of the Blues) ලෙස නාමකරණය විය. දෙවැනිව, 1893 දී Dharmaraja vs Kingswood, (Battle of the Maroons - Kandy) ලෙස කන්ද උඩරටට ද තෙවැනිව, 1900 දී ශාන්ත සර්වේෂස් සහ ශාන්ත තෝමස්, (Battle of the Blues) ලෙසින් එය, ඓතිහාසික රෝහණ දේශයේ අගනගරය, මාතරට සම්ප්රාප්ත වූ වග සටහන් කරනුයේ සර්වේෂස් ආදි සිසුවෙකු ලෙසින් වූ අභිමානය ද පෙරදැරිවය .
මා අධ්යාපන අමාත්යවරයාව සිටියදී ශ්රී ලංකාවේ පාසල් සංඛ්යාව 10,041 කි. මේ අතරින්, ලෙදර් ක්රිකට් ක්රීඩා කරනු ලැබූ පාසල් 720 කින් Big Match සංස්කෘතියට ප්රවේශ වී තිබූ පාසල් සංඛ්යාව 120 ට අඩුය.
කිසියම් පාසලක දෙමව්පියන්ගේ සහ ආදි ශිෂ්යයන්ගේ ප්රභූත්වය මනින දර්ශකයක් ලෙස ඇතමුන් වර්ගීකරණය කරන මෙම Big Match සංස්කෘතියට අනුගත වූ නවමු සාමාජිකයන් වන්නේ, රදම්පොළ, ශ්රී සුමංගල මැදි විදුහල සහ පාලටුව, ගුණරතන මැදි විදුහලයි. ඔවුනගේ කුළුඳුල් මහා ගැටුම, පසුගිය ඉරිදා මාතර සනත් ජයසූරිය ක්රීඩාංගණයේ දී පැවැත්වූයේ අභිමානය, විනය සහ ක්රිකට් පෞර්ෂය මනාව ප්රදර්ශනය කරවමිනි. ඔවුන් නම් කළ ආකාරයට, වචනාර්ථයෙන්ම එය "Paramount Clash" එකකි.
ප්රධාන ආරාධිතයා වශයෙන් සහභාගී වීම පසෙක තබා "Paramount Clash" මා හදවත තුළ නිදන් කළ කරුණු රාශියකි. පාසැල් ගමන වසර තුනකට කෙටි වූවද සුමංගලය, මනුෂ්යත්වයේ "අ" යන්න මට ඉගැන්වූ පින්බිමයි. වරෙක. මගේ ආදරණීය පියාණන්, එහි විදුහල්පතිවරයා වෙද්දි මව, එහි ගුරුවරියක වූවාය. කුඩා හෝ ක්රීඩා පිටි නොතිබූ දෙවිදුබිමට ම ක්රීඩාංගන සකස් කිරීම සිදුවූයේ මාගේ දේශපාලන නායකත්වයෙන් වීම නිහතමානි සතුටකි. ඊට අමතරව, මෙය තවත් Big Match එකක් පමණක් නොව ක්රිකට්, සම්මත ප්රභූත්වයට සීමා නොකොට නිර්ප්රභූන් වෙත කැන්දාගෙන යාම සඳහා අතුරණ ලද බුමුතුරුණක් විය. එසේම, ලෙදර් ක්රිකට් ක්රීඩා කිරීම සඳහා ඇවැසි අර්ධ වශයෙන් හෝ ප්රමිතිගත ක්රීඩා පිටි මේ දෙවිදුහලටම නොතිබීමද දෙවිදුහල, එකාවන්ව විස්මිතව ජයගත් අභියෝගයකි. සුමංගල වික්රමසිංහ විදුහල්පතිවරයා ප්රමුඛ, පාලටුව ගුණරතනයට ද චම්පිකා යාපා විදුහල්පතිනිය ප්රමුඛ රදම්පල ශ්රී සුමංගලයට ද දෙවිදුහලේම ඇදුරු මඩුළු, දූ පුතුන්, ආදි සිසුන්, දෙමව්පියන්, අනුග්රාහකයන්, පුහුණුකරුවන්, ඉනූප නිම්සර සහ කාව්ය චානක ප්රමුඛ ක්රිකට් කණ්ඩායම් හි පුතුන් සියලුම දෙනාත් එම ගෞරවයෙහි අවිවාදිත හිමිකරුවන්ය.
එසේම, අවවරප්රසාදිතව ඈත දුර ගමෙන් මතුව ආ මේ පුතුන්ට ධෛර්යය රැගෙන පැමිණි, සරෝජා පොල් රාජ් ඇමතිතුමියට ද පාසල් ක්රිකට් සම්මේලනයේ සභාපති, විරාජිත් කඩවැද්දුව, ශාන්ත සර්වේෂස් විදුහල්පතිතුමා ප්රමුඛ සම්භාවනීයයන්ට ද ඔබ ශීර්ෂ ප්රණාමය කළ මැනවි!
පළමු තරගයේ, පළමු ඉනිමේ ජය ලබා කුසලානය හිමි කරගත් ශ්රී ගුණරතන පුතුන්ට ද පරාජය අභිමුව වුව , ක්රිකට් ගුණය අයාලේ යන්නට නොදී හතරේ සීමාව තුළ රඳවාගත් ශ්රී සුමංගල පුතුන්ට ද ආදරණීය පියකු සේ මම සුභ පතමි.! අප ජීවත්ව නොසිටිය ද "Paramount Clash", 2126 දී ශතකය වාර්තා කරනු දැක්මට ඔබ සැම වාසනාවන්ත වේවා!!
ඩලස් අලහප්පෙරුම මහතාගේ මුහුනු පොතෙන් උපුටාගන්නා ලදී.
central college matara Radampola Sri Sumangala M.M.V St.Servatius College - Matara
