02/04/2026
ලෙබනනයේ උත්සන්න වන ගැටුම් මධ්යයේ ශ්රී ලාංකික සංක්රමණික සේවකයන්ගේ ආරක්ෂාව කෙසේද?
ලෙබනන් අගනුවර සහ ඒ අවට ප්රදේශවලට ඊයේ සහ අද උදෑසන එල්ල වූ ඊශ්රායල ගුවන් ප්රහාර මාලාවකින් පුද්ගලයින් හත් දෙනෙකු මියගොස් තවත්බොහෝ පිරිසක් තුවාල ලබා ඇති බව විදෙස් මාධ්ය වාර්තා කරයි. බීරූට් හි ජනාකීර්ණ සහ වාණිජ ප්රදේශ වෙත ප්රහාර එල්ල වෙමින් පවතින අතර, කලාපීය ගැටුම් උත්සන්න වීම මධ්යයේ මෙම ප්රහාර එල්ල වී ඇති බව වාර්තා වේ.
ලෙබනන් සෞඛ්ය අමාත්යාංශයේ වාර්තාවලට අනුව, එරට දකුණු තදාසන්න ප්රදේශයට මායිම්ව පිහිටි ජ්නා ප්රදේශයට එල්ල වූ ප්රහාරය මෑත කාලීනව වාර්තා වූ විනාශකාරී සිදුවීමක් බවට පත්ව ඇත. එහිදී නවතා තිබූ වාහන පෙළක් ඉලක්ක කරගනිමින් ඊශ්රායල යුද නැව් මගින් දියත් කළ මිසයිල ප්රහාරයකින් පුද්ගලයින් පස් දෙනෙකු ජීවිතක්ෂයට පත්ව 21 දෙනෙකු තුවාල ලබා ඇති අතර, හටගත් දරුණු ගින්න මැඩපැවැත්වීමට ගිනි නිවන භටයන්ට පැය ගණනාවක් දැඩි වෙහෙසක් දැරීමට සිදු වූ බව වාර්තා වේ.
මීට අමතරව, අගනුවරට දකුණින් පිහිටි ඛල්ඩේ දිස්ත්රික්කයේදී වාහනයකට එල්ල වූ ඩ්රෝන හෝ මිසයිල ප්රහාරයකින් තවත් පුද්ගලයන් දෙදෙනෙකු මියගොස් තිදෙනෙකු තුවාල ලබා ඇති අතර, දිගින් දිගටම පවතින හමුදා ක්රියාකාරකම් හේතුවෙන් ජනශූන්ය වී පවතින හඩාත් ප්රදේශයට ද බදාදා උදෑසන තවත් ප්රහාරයක් එල්ල වූ බව වාර්තා වේ.
ඊශ්රායල ආරක්ෂක බලකාය මෙම මෙහෙයුම් තහවුරු කරමින් ප්රකාශ කර ඇත්තේ, ඔවුන් හිස්බුල්ලා සංවිධානයේ ඉහළ පෙළේ සාමාජිකයින් ඉලක්ක කර ගනිමින් මෙම ප්රහාර එල්ල කළ බවයි.
බීරූට් ප්රදේශයේදී හිස්බුල්ලා ජ්යෙෂ්ඨ අණදෙන නිලධාරියෙකු සහ තවත් ජ්යෙෂ්ඨ ත්රස්තවාදී ක්රියාකාරියෙකු ඉලක්ක කර ගනිමින් වෙනම ප්රහාර දෙකක් එල්ල කළ බව හමුදා ප්රකාශකයෙකු පැවසුවද, ඉලක්කගත පුද්ගලයින්ගේ නම් හෙළි කිරීමට හෝ එම ඝාතන සාර්ථක වූයේ දැයි තහවුරු කිරීමට ඔවුන් මෙතෙක් පියවර ගෙන නැත. කෙසේ වෙතත්, මෙම ප්රහාර මගින් හිස්බුල්ලා නායකත්වය අඩපණ කිරීමේ ඊශ්රායල උපායමාර්ගය අඛණ්ඩව ක්රියාත්මක වන බව මැනවින් පෙන්නුම් කරයි.
බීරූට් හි පවතින තත්ත්වය වේගයෙන් ව්යාප්ත වන පුළුල් කලාපීය ගැටුමක කොටසක් වන අතර, අද දිනය තුළ දකුණු ලෙබනනයේ ෂාමා සහ බේට් ලිෆ් ප්රදේශ ආසන්නයේ දරුණු භූමි ගැටුම් වාර්තා විය. එහිදී ඊශ්රායල ආරක්ෂක බලකාය ටයර් නගරය දෙසට ඉදිරියට ඒමට උත්සාහ කරන අතරතුර, ඉරානයේ වානේ කර්මාන්තශාලා වෙත ඊශ්රායල සහ එක්සත් ජනපද ප්රහාර එල්ල වූ බවට ද වාර්තා විය.
මීට අමතරව යේමනයේ හූති සටන්කාමීන් ඊශ්රායලය ඉලක්ක කර මිසයිල ප්රහාර දියත් කිරීමත් සමඟ කලාපීය නොසන්සුන්තාව තවදුරටත් උත්සන්න වී ඇත. මෙම යුද්ධය හේතුවෙන් මේ වන විට පුද්ගලයින් 1,200 කට වැඩි පිරිසක් මියගොස් මිලියන 1.2 කට අධික පිරිසක් අවතැන් වී ඇති අතර, තදාසන්න ප්රදේශවල වැසියන් ආරක්ෂාව පතා උතුරු ප්රදේශවලට පලා යාම නිසා දැවැන්ත මානුෂීය අර්බුදයක් නිර්මාණය වී ඇති බව විදෙස් මාධ්ය වාර්තා කරයි.
ලෙබනනයේ වත්මන් ආරක්ෂක තත්ත්වය හමුවේ එහි වෙසෙන ශ්රී ලාංකිකයන් පිළිබඳව ශ්රී ලංකා විදේශ සේවා නියුක්ති කාර්යාංශය සහ බීරූට් හි ශ්රී ලංකා තානාපති කාර්යාලය නිරන්තර අවධානයෙන් පසුවන අතර, මේ වන විට ප්රහාර එල්ල වූ ප්රදේශවල සිටි ශ්රී ලාංකිකයන් බහුතරයක් ආරක්ෂිත ස්ථාන කරා යොමු වී ඇති බව වාර්තා වේ.
කිසිදු ශ්රී ලාංකිකයෙකුට මෙතෙක් බරපතල අනතුරක් හෝ ජීවිත හානියක් සිදු වී නොමැති අතර, යුද ගැටුම් පවතින ප්රදේශවල සේවය කළ පිරිස් සඳහා තානාපති කාර්යාලය සහ ලෙබනන් රජය මැදිහත් වී පල්ලි ඇතුළු පොදු ස්ථානවල ආරක්ෂිත මධ්යස්ථාන සහ සහන කඳවුරු සපයා ඇත.
වීසා බලපත්ර ගැටලු නොමැති, මෙරටට පැමිණීමට අපේක්ෂා කරන පිරිස් සඳහා රජය පහසුකම් සැලසීමට පියවර ගත්තද ගුවන් ගමන් අවලංගු වීම් හේතුවෙන් එම ක්රියාවලියට යම් බාධා එල්ල වී තිබේ. එබැවින්, ලෙබනනයේ සිටින සියලුම ශ්රී ලාංකිකයන්ට අනවශ්ය ගමන් බිමන්වලින් වැළකී තානාපති කාර්යාලය සමඟ නිරන්තර සම්බන්ධතාව පවත්වා ගන්නා ලෙස උපදෙස් දී ඇති අතර, හදිසි අවස්ථාවකදී සම්බන්ධ කර ගැනීම සඳහා විශේෂ දුරකථන අංක සහ WhatsApp පහසුකම් ද හඳුන්වා දී ඇත.
