Buddhist Society- Board of Investment of Sri Lanka

14/04/2026

ඔබ සැමට සුබ අලුත් අවුරුද්දක් වේවා !

16/03/2026

2026 - ලේ දන් දීමේ වැඩසටහන

ශ්‍රී ලංකා ආයෝජන මණ්ඩලයේ බෞද්ධ සංගමය විසින් 12 වන වරටත් සංවිධානය කරනු ලැබු ලේ දන් දීමේ කඳවුර 2026 මාර්තු 12 වන දින, ලෝක වෙළඳ මධ්‍යස්ථානයේ බටහිර කුලුණේ 8 වන මහලේ පිහිටි ආයෝජන මණ්ඩල ශ්‍රවණාගාරයේදී සාර්ථකව පවත්වන ලදී. මෙම කර්තව්‍ය සාර්ථක කරගැනීම සදහා ලේ දන්දීමට සහභාගී වූ පිංවත් සැමටත්, මෙම අවස්ථාවට සහභාගී වූ මහරගම අපේක්ෂා රෝහලේ වෛද්‍යතුමියන් ඇතුළු සෞඛ්‍ය සේවක මණ්ඩලයටත්, මධ්‍යම ලේ බැංකුවේ, නාරාහේන්පිට ශාඛාවේ සෞඛ්‍ය සේවක මණ්ඩලයටත්, බෞද්ධ සංගමයේ සියලුම සාමාජික මහත්ම මහත්මීන්ටත්, සංවිධාන කටයුතු සදහා සහභාගී වෙමින් නන්අයුරින් සහය වූ සේවක මහත්ම මහත්මීන් සැම දෙනාටත් පුන්‍යානුමෝදනාත්මක ස්තුතිය මෙයින් පුදකර සිටිමු.

09/03/2026

Blood Donation Programme - 12 March 2026

Dear Friends,

You are warmly invited to join our Blood Donation Campaign organized by the Buddhist Society on 12 March 2026.

Your small act of kindness can help save precious lives. ❤️

We kindly invite you to participate and support this noble cause.

Thank you 🙏

30/01/2026

අපේක්ෂා රෝහල සඳහා සිදු කරන ලද පරිත්‍යාගය

අවිස්සාවේල්ල දිස්ත්‍රික් මහ රෝහලේ වාට්ටු අංක 12 පිළිකා ඒකකයේ රෝගී සත්කාර සේවාව සඳහා අවශ්‍යව ඇති පහත සඳහන් වෛද්‍ය උපකරණ ඇතුළු භාණ්ඩ බෞද්ධ සංගමය විසින් සේවක මහත්ම මහත්මීන්ගේද සහභාගීත්වයෙන් 2025.12.22 වන දින අවිස්සාවේල්ල දිස්ක්‍රික් මහ රෝහලේ අධ්‍යක්ෂතුමා ඇතුළු කාර්යය මණ්ඩලය වෙත පරිත්‍යාග කරන ලද බව කාරුණිකව දන්වා සිටිමු.

01. බෙහෙත් ද්‍රව්‍ය ගෙනයාම සඳහා ට්‍රොලි-(Medicine Trolley) - 01

02. රුධිර පීඩනය මැනීමේ උපකරණ - (BP Apparatus) - 05

03. මල්ටි මොනිටර්ස්(Multi Monitor) -( Mindray Model) - 01

04. උෂ්ණත්වය මැනීමේ උපකරණ(Thermometer) - 20

05. සේලයින් ස්ටෑන්ඩ් (Saline Stand) - 05

06. Bladder Syringes - 100

07. දම්රෝ පුටු - 10

08. වැඩිහිටි පැම්පස් - 10

09. බෙඩ් ජැකට් - 10

10. සරොම් - 10

11. චීත්ත - 10

12. සමපෝෂ (500 g) පැකට් - 100

13. හයිලන්ඩ් කිරිපිටි (400 g) පැකට් - 100

14. පරිප්පු (01 kg) පැකට් - 25

15. කඩල (01 kg) පැකට් - 25

16. මයික්‍රොවේව් උඳුනක් - 01

17. ප්ලාස්ටික් පිගන් රාක්කයක් -01

18. Steam Vaporizer - 01

19. ක්‍රියා විරහිතව පැවති මල්ටි මොනිටර්ස් (Multi Monitors) යන්ත්‍ර 02 ක් සඳහා බැටරි සපයා අලුත්වැඩියා කරදීම.

20. අක්‍රියව පැවති ජල පිරිපහදු යන්ත්‍රය අලුත්වැඩියා කරදීම

එමෙන්ම, අවිස්සාවේල්ල දිස්ත්‍රික් රෝහලේ පිළිකා රෝගී වාට්ටුවේ පැවති ඉහත සඳහන් අඩුපාඩු සම්පූර්ණ කරගැනීම සඳහා ඔබ සැම විසින් ලබාදුන් නොමසුරු දායකත්වය ඉතා අගය කොට සලකන අතර, මෙවැනි පුණ්‍ය කටයුතු ඉදිරියටත් කරගෙන යාම සඳහා ශක්තිය හා ධෛර්යය නිරතුරුව ලැබේවායි ආයෝජන මණ්ඩලය බෞද්ධ සංගමය ප්‍රාර්ථනා කර සිටිමු.

එම අවස්ථාවට අදාළ ඡායාරූප මෙහි පහත දක්වා ඇත

01/01/2026

සුබ නව වසරක් වේවා!

24/10/2025

කඨින චීවර පූජා මහෝත්සවය - 2025

අප ජිවිතයේ එක් කලකට පමණක් සිදුකළ හැකි දුර්ලභ පිංකමක් වූ “කඨින චිවර පූජාව” ආයෝජන මණ්ඩලය, බෞද්ධ සංගමය විසින් කැකිරාව, කරඹෑවත්ත, ශ්‍රී අග්‍රබෝධි විහාරස්ථානය මූලික කරගෙන 2025.10. 18 සහ 19 යන දෙදින උත්කර්ෂවත් අන්දමින් සිදු කරන ලදී.

ඔක්තෝම්බර් මස 18 වන දින පස්වරුවේ අටවිසි බෝධි පූජාවක් සිදු කරන ලද අතර, අනතුරුව කඨින චිවරය තැන්පත් කර ඇති නිවසේ ස්වාමීන් වහන්සේ නමකගේ වැඩම වීමෙන් සුමධුර ධර්ම දේශනාවක්ද පවත්වන ලදී. 19 වන දින අළුයම 2.00 ට පමණ කඨින චීවරය රැගත් පෙරහැර අප සේවක මහත්ම මහත්මීන්ගේද සහභාගීත්වයෙන් ගම වටා සංචාරය කිරීමෙන් අනතුරුව උදෑසන 5.30 ට පමණ විහාරස්ථානයට ළඟා විය. අනතුරුව කඨින චීවරය මැසීමේ කටයුතු ආරම්භ කරන ලදී

එදින දහවල් සම්බුද්ධ පූජාවට සමගාමීව චෛත්‍යරාජයාණන් වහන්සේ වෙත කප්රුක් පූජාවක්ද සිදුකරන ලදී. ඉන් පසුව ගම්වාසීන්ගේද සහයෝගය ඇතිව සියළු පිරිකර පූජාවන් සහිතව භික්ෂූන් වහන්සේලා 14 නමක් උදෙසා දහවල් දානය පිරිනමන ලදී. අනතුරුව සකස් කරන ලද කඨින චීවරය සග සතු කොට මහා සංඝරත්නය වෙත පූජා කරන ලදී.

මෙම අවස්ථාවට 400 කට අධික පිරිසක් සහභාගි වූ අතර, ඔවුන් සියළු දෙනා සඳහා දහවල් ආහාරය බෞද්ධ සංගමය මගින් පිරිනමන ලදී.

මෙම කඨින මහා පිංකම සඳහා ආයෝජන මණ්ඩලය ප්‍රධාන කාර්යාලය ඇතුළු කලාප කාර්යාවල සේවක මහත්ම මහත්මීන් ඇතුළු ඔවුන්ගේ පවුල්වල සාමාජික සාමාජිකාවන් පිරිසක්ද සහභාගි විය.

මෙම කඨින පිංකමට සමගාමීව විහාරස්ථානයේ සිදු කළ යුතු ප්‍රතිසංස්කරණ කටයුතු සඳහා ආධාර උපකාර කළ සියලු දෙනාටත්, මෙම කඨින පිංකම සාර්ථකව සිදුකර ගැනීම සඳහා ඇපකැප වූ, ඒ සඳහා සහභාගී වූ සහ පිරිකර ලබාදීමෙන් හා නන් අයුරින් සහයෝගය දැක්වූ ආයෝජන මණ්ඩලය ප්‍රධාන කාර්යාලය ඇතුළු කලාප කාර්යාවල සේවක මහත්ම මහත්මීන් ඇතුළු සියලුම දෙනාටත් මෙම අවස්ථාවේ පුණ්‍යානුමෝදනා සිදුකර පින් අනුමෝදන් කරන ලද අතර, ඔබද සාධු සිතින් පින් අනුමෝදන් වන ලෙස අයෝජන මණ්ඩලයේ, බෞද්ධ සංගමය කෘතඥතාපූර්වකව සිහිපත් කර සිටිමු.

තවදුරටත් මෙවැනි මාහැඟි පුණ්‍යකර්මයන් සිදුකිරීමට ශක්තිය හා ධෛර්ය ඔබ සියළු දෙනාටම ලැබේවායි ශ්‍රී ලංකා ආයෝජන මණ්ඩලය, බෞද්ධ සංගමය බැති සිතින් ප්‍රාර්ථනා කරමු.

03/10/2025

කඨින චීවර පූජාව - 2025

ශ්‍රී ලංකා ආයෝජන මණ්ඩලයේ බෞද්ධ සංගමය විසින් වස් කාලය නිමිති කොටගෙන සිදු කරනු ලබන වාර්ෂික කඨින පිංකම වර කැකිරාව, කරඹෑවත්ත, ශ්‍රී අග්‍රබෝධි විහාරස්ථානය කේන්ද්‍ර කරගෙන සිදු කිරීමට කටයුතු සම්පාදනය කර ඇත.

කඨින චීවරය 2025.09.26 වන දින ශ්‍රි ලංකා ආයෝජන මණ්ඩලය වෙත වැඩම කර එහි 27 වන මහලේ තැන්පත් කරන ලද අතර, බොහෝ දෙනෙක් පැමිණ කඨින චීවරය වැඳ පුදා ගැනීම සිදු කරන ලදී. තවද අයෝජන මණ්ඩලයේ සේවක මහත්ම මහත්මීන් විසින් එදින දහවල් බුද්ධ පූජාව සහ සවස ගිලන්පස පූජාව සිදු කරන ලද අතර, 29 වන දින උදෑසන බුද්ධ පූජාව සහ වෑංජන 32 ක් සහිත දහවල් බුද්ධ පූජාවද සිදු කරන ලදී.

කඨින චීවරය 2025.09.29 වන පස්වරුවේ ආපසු කැකිරාව බලා වැඩම කරවන ලද අතර, කැකිරාව අදාළ නිවසේ කඨින චීවරය තැන්පත් කිරීමෙන් අනතුරුව පහත දැක්වෙන අයුරින් පුද පූජාවන් සිදු කරන ලදී.

30/07/2025

කඨින චීවර පූජාව - 2025

ශ්‍රී ලංකා ආයෝජන මණ්ඩලයේ බෞද්ධ සංගමය විසින් වස් කාලය නිමිති කොටගෙන සිදු කරනු ලබන වාර්ෂික කඨින පිංකම වර කැකිරාව, කරඹෑවත්ත, ශ්‍රී අග්‍රබෝධි විහාරස්ථානය කේන්ද්‍ර කරගෙන සිදු කිරීමට කටයුතු සම්පාදනය කර ඇත. කැකිරාව, කරඹෑවත්ත, ශ්‍රී අග්‍රබෝධි විහාරස්ථානය කැකිරාව නගරයේ සිට මරදන්කඩවල මාර්ගයේ කි.මී. 03 ක පමණ දුරින් ප්‍රධාන මාර්ගය ආසන්නයේ පිහිටා ඇත. දැනට මෙම විහාරස්ථානයේ ස්වාමීන් වහන්සේලා දෙනමක් වැඩ වසන අතර, වසර කිහිපයක සිට මෙම විහාරස්තානයේ කඨින පිංකමක් සිදුකර නොමැති බවද දැනගන්නට ලැබී ඇත.

කඨින පිංකමේ මූලික අංගය වශයෙන්, 2025.07.10 වන ඇසල පොහෝ දින පස්වරුවේ ශ්‍රී ලංකා ආයෝජන මණ්ඩලයේ බෞද්ධ සංගමයේ සාමාජිකයින් විසින් ශ්‍රී අග්‍රබෝධි විහාරස්ථානයේ භික්ෂුන් වහන්සේලා වෙත වැසි සළු පූජාව සිදුකර, වස් ආරාධනය කරන ලදී. මෙම අවස්ථාවට විහාරස්ථ දායක සභාවේ මහත්ම මහත්මින්, සිල් සමාදන් වූ පිංවතුන් ඇතුළු පිරිසක්ද සහභාගි විය.

එම අවස්ථාවේදී ගන්නා ලද ඡායාරූප සහ කඨින පිංකමට සමගාමීව විහාරස්ථානයේ සිදු කළ යුතු ප්‍රතිසංස්කරණ කටයුතු පිළිබඳ දැක්වෙන ඡායාරූපද මේ සමග ඔබ වෙත ඉදිරිපත් කරමු.

10/07/2025

තැවුණු සිත් නිවී පහන්වන පින්බර ඇසළ පුර පසළොස්වක පෝය දිනයක් වේවා!!!
==================================
සිදුහත් බෝසතාණන් වහන්සේ පස්මහ බැළුම් බැලීමෙන් අනතුරුව මිනිස් ලොව උපදින්නට මහ මායා දේවියගේ කුස පිළිසිඳගත්තේ ඇසල පෝය දිනකයි.

සිදුහත් බෝසතාණන් වහන්සේ ගිහිගෙය කලකිරී මහාභිනිෂ්ක්රඅමණය කරන්නේත්, රාහුල කුමරුගේ උපත සිදු වන්නේත් ඇසළ පුන් පෝ දිනකයි. එමෙන්ම මාරයා විසින් සිදුහත් බෝසතුන්ගේ ගිහිගෙය හැරයාම වළකා දින හතකින් සක්විති රජකම ලැබෙන බව පවසන්නේද මෙදිනයි

ගිහිගෙය හැරගොස් වසර හයකට පසුව ලොව්තුරා බුද්ධත්වයට පත්ව බරණැස ඉසිපතන මිගදායේදී ප්‍රතම වරට පස්වග තවුසන් උදෙසා ධම්ම චක්ක පවත්තන සූත්‍රය දේශනා කොට වදාළේද ඇසල පොහොය දිනයකයි.

තීර්ථකයන්ගේ මානය බිඳ, දමනය කරනු වස් ගෞතම බුදුරජාණන් වහන්සේ ගන්ධබ්බ රුක් මූලයේදී මහා පෙළහර පෑම ඇසල පෝ දිනයක සිදුවිය.

විහාරස්ථාන වල වැඩ වසන භික්ෂූන් වහන්සේලා වස් විසීම ආරම්භ කරන්නේද (පෙර වස් විසීම) ඇසල පොහෝ දිනටයි.

ගණ්ඩම්බ රුක්මුල්හිදී තිර්ථකයන් ගේ මානය මර්දනය කරනු පිණිස යමාමහ පෙළහර දැක්වූයේත් ඇසළ පුණු පොහෝ දිනයක ය. එසේ ප්‍රාතිහාර්ය දක්වා සත්වැනි වස ගත කිරීමට තව්තිසා දෙව්ලොවට වැඩම කොට වස් එළඹ මාතෘ දිව්‍ය රාජයා ප්‍රධාන දෙවියනට විජම් බණ වදාළේත් ඇසළ පුණු පොහෝ දිනයක දීය.

සම්බුද්ධ පරිනිර්වාණයෙන් තුන් මසකින් තෘතීය ශ්‍රාවක මහා කාශ්‍යප මහ රහතන් වහන්සේ ප්‍රධාන පන්සියයක් මහරහතන් වහන්සේලා විසින් අජාසත් රජුගේ දායකත්වය හා ආරක්ෂාව සංවිධානත්වය ඇති ව රජගහ නුවර වේහාර පර්වතයෙහි ධර්ම මණ්ඩපයෙහි දී ප්‍රථම ධර්ම සංගීතිය පැවැත්වීම සඳහා රජගහ නුවරට වැඩම කොට වස් එළැඹ මූලික කටයුතු ආරම්භ කරන ලද්දේත් ඇසළ පුණු පොහෝදිනයක ය

බු. ව. 236 වැන්නෙහි උපබුදු මිහිඳු මහරහත් මාහිමියන් ප්‍රධාන මහා සංඝයා විසින් සම්මත කළ සීමාව තුළ ප්‍රථම ඛණ්ඩ සීමාව සම්මත කරන ලද්දේත් ඇසළ පුණු පොහෝ දිනයක ය.

බු. ව. 236 වැන්නෙහි අරිෂ්ඨ කුමරුන් ප්‍රධාන සිංහලයන් සපනස් දෙනා ගේ මහණ උපසම්පදාව තුම්බුරු සීමා මාලකයෙහි දී සිදුවූයේත් ඇසළ පුණු පොහෝ දිනයක ය.

බු.ව. 236 වැන්නෙහි දෙවන පෑතිස් නිරිඳුන් විසින් කණ්ටක චෙතිය වටා කර වූ අටසැට ලෙන් පූජාව හා දෙසැටක් රහතන් වහන්සේලා ගේ ලංකාවෙහි ප්‍රථම වස්සූප ගමනය (පළමු වස් එළඹීම) සිදුවූයේ ඇසළ පුණු පොහෝ දිනයක ය.

බු. ව. 382 දී දුටුගැමුණු රජතුමා විසින් රුවන්වැලි සෑ රඳුන් තනන්නට මඟුල් ගල් තැබීම උත්සවශ්‍රීයෙන් සිදුකරන ලද්දේත් ඇසළ පුණු පොහෝ දිනයක ය. එසේම උතුරු සළ නැකතින් මහ සෑයෙහි ධාතු නිදානය අනේකප්‍රකාර ප්‍රාතිහාර්යය මැද සිදුවූයේ ඇසළ පුණු පොහෝ දිනයක ය.

බු. ව. 847 දී කිත්සිරි මෙවන් රජු දවස කළිඟු රටින් හේමමාලා කුමරිය හා දන්ත කුමරුන් විසින් ගෙනෙන ලද දළදා වහන්සේ ප්‍රදර්ශනය කරමින් වර්ෂයක් පාසා සිදු කර ගෙන එනු ලබන දළදා පෙරහැරේ ආරම්භය සිදුවූයේත් ඇසළ පුණු පොහෝ දිනයක ය.

විශේෂයෙන් ලාංකික ජනයාගෙන් වැඳුම් පිදුම් ලබන නාථ ස්කන්ධ කුමාර පත්තිනි ආදී දෙවියන් උදෙසා පුද පූජා පවත්වා දේව වරප්‍රසාද ලබාගෙන ශ්‍රී සමෘද්ධිය අයත් කර ගනු පිණිස ඈත අතීතයේ සිට ම මහනුවර, ශ්‍රී ජයවර්ධනපුර, අලුත් නුවර, නවගමුව, දෙවුන්දර, රත්නපුරය, කතරගම ආදී නගර ග්‍රාමයන් හි පිහිටි දේවස්ථානයන් හි වාර්ෂික වශයෙන් පැවැත්වෙන දේව පූජා පෙරහර සිදුකරන දිනය නිසාත් ආගමික වශයෙන් මෙන් ම ඓතිහාසික අංශයෙන් ද ශ්‍රේෂ්ඨ දිනයක් වශයෙන් මේ දවස සැලකිය හැකි ය.

13/06/2025

10/06/2025

සම්බුදු දහමින් ලක් දෙරණ ආලෝකමත් වූ පොසොන් පෝය දිනය අදයි🙏

ලංකාද්වීපයට බුදු දහම දායාද කරමින් අනුබුදු මිහිඳු මා හිමියන්ගේ ලංකාගමනය සිදු වූ උතුම් පොසොන් පුර පසළොස්වක පොහොය දිනය අදට යෙදී තිබේ.

ඒ අනුව මිහිඳු මහ රහතන් වහන්සේ ප්‍රමුඛ ඉට්ඨිය, උත්ථිය, සම්බල, බද්දසාල යන රහතන් වහන්සේලාත් සුමන සාමණේරයන් වහන්සේත් භණ්ඩුක උපාසකවරයාත් බුදු රජාණන් වහන්සේගේ නිර්මල බුදු දහම රැගෙන අනුරාධපුර මිහින්තලා පව්වට වැඩම කරවීම අද වැනි දිනක සිදුවූ බව ඉතිහාසයේ සඳහන් වේ.

ශ්‍රී ලංකාද්වීපයේ ප්‍රථම මහණ උපසම්පදාව සිදු කිරීම හා බුදු බව ලබා රුවන් ගෙයි වැඩ හිඳිමින් ධර්මය මෙනෙහි කළ බුදුරදුන්ගේ ශරීරයෙන් සවනක් ඝණ රැස් විහිදීම යන අසිරිමත් සිදුවීම අද වැනි දිනක සිදුව ඇත.

දේවානම්පියතිස්ස රජු සමඟ 40000 ක් පමණ පිරිස චුල්ලහත්ථිපදෝපම සූත්‍රය අසා තෙරුවන් සරණ යෑම, සුමන සාමණේරයන් වහන්සේගේ ආරාධනයෙන් මිස්සක පව්ව අබියසට පැමිණි දෙවියන්ට මහින්ද මහ රහතන් වහන්සේ විසින් සමචිත්ත පරියාය සූත්‍රය දේශනා කිරීම ආදිය පොසොන් පොහොයේ වැදගත්කම් ලෙස ද පෙන්වා දිය හැකිය.

නිවන කරා යෙමු වන පිංබර පොසොන් පෝය දිනයක් වේවා!🙏