21/09/2026
អបអរសាទរ ទិវាសន្តិភាពអន្តរជាតិ ២១កញ្ញា..!
កាយរឹទិ្ធជាតិកម្ពុជាគាំទ្រការអប់រំសម្រាប់កុមារមានតម្រូវការពិសេស..!
នាព្រឹកថ្ងៃទី២១ ខែកញ្ញា ឆ្នាំ២០២៦ ឯកឧត្តម សេរី ជំនះ រដ្ឋលេខាធិការ ក្រសួអប់រំ យុវជន និងកីឡា និងជាអនុប្រធានកាយរឹទិ្ធជាតិកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ ពិធីបើកសិក្ខាសាលាបណ្តុះបណ្តាលស្តីពីការអប់រំផ្លូវចិត្ត និងគ្រប់គ្រងអារម្មណ៍សម្រាប់បុគ្គលិកអប់រំ និងមេដឹកនាំកាយរឹទ្ធិ នៃកងឯកភាពវិទ្យាស្ថានជាតិអប់រំពិសេស រាជធានីភ្នំពេញ។
នាយកដ្ឋានសហប្រតិបត្តិការកាយរឹទិ្ធ និងវិទ្យាស្ថានជាតិអប់រំពិសេស បានសហការជាមួយអង្គការអប់រំជីវិតនៅកម្ពុជា (ELIC) ដើម្បីរៀបចំសិក្ខាសាលាបណ្តុះបណ្តាលស្តីពីការអប់រំផ្លូវចិត្ត និងគ្រប់គ្រងអារម្មណ៍សម្រាប់បុគ្គលិកអប់រំ និងមេដឹកនាំកាយរឹទ្ធិ នៃកងឯកភាពវិទ្យាស្ថានជាតិអប់រំពិសេស ចំនួន ៥០រូប ដែលមានគ្រូឧទ្ទេស ជាអ្នកឯកទេសអប់រំពិសេស ៣រូប មកពីប្រទេសម៉ាឡេស៊ី រួមមាន៖ ១. Dato' Dr Lai Fong Hwa, ២.Datin Indranee Liew, ៣. Ms Silviana Bonadei។
សិក្ខាសាលានេះមានរយៈពេល ៣ថ្ងៃ ចាប់ពីថ្ងៃទី២១ ដល់ថ្ងៃទី២៣ ខែកញ្ញា ដោយមេរៀនសិក្សាផ្តោតលើជំនាញ ដូចជា៖ ១.ការគ្រប់គ្រងឥរិយាបថ, ២.ការសិក្សាតម្រូវការសង្គមនិងគ្រប់គ្រងអារម្មណ៍, ៣.ADHD/ADD (Attention-Deficit/Hyperactivity Disorder), ៤.ជំងឺអូទីសឹម, ៥.ការអនុវត្តវិធីសាស្រ្តបង្រៀនបែបបរិយាបន្ន, ៦.ការទំនាក់ទំនងវិជ្ជមានជាមួយអ្នកសិក្សានិងក្រុមគ្រួសារ, និង៧.ការរៀបចំផែនបង្រៀនជាលក្ខណៈបុគ្គល។
នៅក្នុងឱកាសនោះ ឯកឧត្តមរដ្ឋលេខាធិការ បានលើកឡើងថា៖
១-បញ្ហាសុខភាពផ្លូវចិត្តមិនមែនជាបញ្ហារបស់ប្រទេសក្រីក្រ ឬប្រទេសអ្នកមានតែម្ខាងនោះទេ។ វាជាបញ្ហាសកល ដែលកើតមាននៅគ្រប់សង្គម និងគ្រប់កម្រិតនៃការអភិវឌ្ឍ។ បើតាមរបាយការណ៍របស់ WHO នៅឆ្នាំ២០២១ មានមនុស្សប្រហែល ១ ក្នុង ៧ នាក់ នៅទូទាំងពិភពលោករស់នៅជាមួយបញ្ហាសុខភាពផ្លូវចិត្ត ហើយស្ទើរពាក់កណ្តាលនៃបញ្ហាទាំងនេះចាប់ផ្តើមមុនអាយុ ១៨ឆ្នាំ។ បញ្ហានេះកើតមាននៅគ្រប់ប្រទេស និងកាន់តែគួរឱ្យយកចិត្តទុកដាក់ក្នុងបរិបទសង្គ្រាម ជម្លោះ វិបត្តិមនុស្សធម៌ គ្រោះមហន្តរាយ ការភៀសខ្លួន និងការខ្វះសេវាគាំទ្រ។
២-ខ្ញុំជឿថា មនុស្សគ្រប់រូបសុទ្ធតែធ្លាប់ជួបប្រទះភាពតានតឹង ឬសម្ពាធផ្លូវអារម្មណ៍ នៅដំណាក់កាលណាមួយនៃជីវិត។ អ្វីដែលសំខាន់ គឺការរៀនស្គាល់អារម្មណ៍របស់ខ្លួន និងស្វែងរកវិធីដែលមានសុវត្ថិភាព និងសមស្រប ដើម្បីគ្រប់គ្រងអារម្មណ៍ទាំងនោះ។ ខ្ញុំសូមចែករំលែកបទពិសោធផ្ទាល់ខ្លួនបន្តិច។ សម្រាប់ខ្ញុំ វិធីសាមញ្ញមួយដែលជួយឱ្យខ្ញុំសម្រាកចិត្ត និងធូរស្រាលពីភាពតានតឹង គឺ «ការនៅជាមួយទឹក»។ មិនថាជាការងូតទឹក ការហែលទឹក ឬគ្រាន់តែចំណាយពេលនៅក្បែរទឹក និងធម្មជាតិទេ សកម្មភាពសាមញ្ញទាំងនេះតែងជួយឱ្យខ្ញុំមានអារម្មណ៍ស្ងប់ ស្រស់ស្រាយ និងមានតុល្យភាពផ្លូវអារម្មណ៍កាន់តែប្រសើរ។
ឯកឧត្តមរដ្ឋលេខាធិការ បានផ្តល់អនុសាសន៍ដល់សិក្ខាកាមទាំងអស់ នូវទស្សនៈគន្លឹះចំនួន ៣ សម្រាប់ជាមូលដ្ឋាននៃការរៀនសូត្រ និងការពិភាក្សាក្នុងសិក្ខាសាលានេះ៖
ទី១. សុខភាពផ្លូវចិត្ត និងការរៀនសូត្រ ត្រូវដើរទន្ទឹមគ្នា៖ កុមារដែលមានអារម្មណ៍សុវត្ថិភាព ទទួលបានការគោរព ការយល់ចិត្ត និងការគាំទ្រ មានលក្ខខណ្ឌល្អប្រសើរក្នុងការរៀន ចូលរួម បង្កើតទំនាក់ទំនង និងអភិវឌ្ឍសក្តានុពលរបស់ខ្លួន។ ដូច្នេះ ការយកចិត្តទុកដាក់លើសុខភាពផ្លូវចិត្ត គួរត្រូវបានបញ្ចូលទៅក្នុងការងារអប់រំ និងការដឹកនាំយុវជនប្រចាំថ្ងៃ។
ទី២. ការគ្រប់គ្រងអារម្មណ៍ គឺជាបំណិនជីវិតសម្រាប់មនុស្សគ្រប់រូប៖ ការចេះស្គាល់អារម្មណ៍របស់ខ្លួន ចេះគ្រប់គ្រងការឆ្លើយតប ចេះយល់ពីអារម្មណ៍អ្នកដទៃ និងចេះដោះស្រាយភាពខ្វែងគំនិតដោយសន្តិវិធី គឺជាបំណិនដែលត្រូវការមិនត្រឹមតែកុមារ និងយុវជនប៉ុណ្ណោះទេ ប៉ុន្តែយើងជាអ្នកអប់រំ និងមេដឹកនាំក៏ត្រូវការដូចគ្នា។
ទី៣. ការបង្ការអំពើហិង្សា ត្រូវចាប់ផ្តើមពីការកសាងបរិយាកាសវិជ្ជមាន មុនពេលបញ្ហាកើតឡើង៖ ការបង្ការអំពើហិង្សា មិនគួរចាប់ផ្តើមនៅពេលមានហេតុការណ៍កើតឡើងរួចហើយនោះទេ។ វាត្រូវចាប់ផ្តើមពីការបង្កើតវប្បធម៌នៃការគោរពគ្នា ការមិនរើសអើង ការស្តាប់គ្នា ការយល់ចិត្ត ការប្រើពាក្យសមរម្យ ការគ្រប់គ្រងអារម្មណ៍ និងការដោះស្រាយបញ្ហាដោយសន្តិវិធី។
#កម្មវិធីអ្នកនាំសារសន្តិភាព
២១ កញ្ញា ២០២៦ | រាជធានីភ្នំពេញ
