11/09/2026
សៀវភៅ Napoleon Hill’s Keys to Positive Thinkings
មាន ១០ជំហាន ដើម្បីបង្កើត PMA ឬ Positive Mental Attitude
ថ្ងៃនេះខ្ញុំបកស្រាយជូនបងប្អូន ជំហានទី៥ និងទី៦
===========================
📍ជំហានទី៥ ទៅកាន់ PMA ៖ “ធ្វើជាមនុស្សរីករាយ”
ពេលអារម្មណ៍រីករាយ ចិត្តរបស់អ្នកអាចគិតគំនិតវិជ្ជមានបាន
ដោយងាយ។ ក្នុងពេលជាមួយគ្នា គំនិតអវិជ្ជមានក៏មិនអាចចូល
មកគ្រប់គ្រងលើចិត្តរបស់អ្នកបានដែរ។ មនុស្សតែងចាប់អារម្មណ៍
លើអ្នក ប្រសិនបើអ្នកជាបុគ្គលរីករាយ ព្រោះនៅក្នុងខ្លួនរបស់អ្នក
មាន PMA ខ្ពស់។
ទាំងនេះគឺជាវិធីខ្លះៗដើម្បីធ្វើខ្លួនឱ្យក្លាយជាមនុស្សរីករាយ៖
-ទីមួយ៖ “ធ្វើសកម្មភាពបែបរីករាយ”។ ពេលអ្នកគិតគំនិតរីក
រាយ អ្នកចាប់ផ្តើមមានអារម្មណ៍រីករាយភ្លាមៗ។ ដូចគ្នា ពេលអ្នក
ធ្វើសកម្មភាពរីករាយ អារម្មណ៍រីករាយក៏កើតឡើងក្នុងពេលនោះ
ផងដែរ។ ដូច្នេះ ចូរញញឹមឱ្យបានច្រើន ធ្វើអាកប្បកិរិយារហ័ស
រហួន និយាយលះៗនិងបែបរួសរាយរាក់ទាក់ ដកដង្ហើមជ្រៅៗ
និងបញ្ចេញមកវិញជាមួយភាពស្រស់ស្រាយ។
-ទីពីរ៖ “មានមោទនភាពចំពោះភាពជោគជ័យដែលអ្នកធ្លាប់មាន”។
ពេលអ្នកបង្ហាញមោទនភាពចំពោះខ្លួនឯង អ្នកកំពុងឱ្យតម្លៃខ្លួន
ឯង កំពុងគោរពខ្លួនឯង និងកំពុងផ្តល់កិតិ្តយសឱ្យខ្លួនឯង។
វាជាអារម្មណ៍ល្អចេញពីខាងក្នុងខ្លួនដែលអ្នកអាចបង្កើតមកបាន
នៅគ្រប់ពេលដែលអ្នកត្រូវការ។ ចូរឧស្សាហ៍រំលឹកភាពជោគជ័យ
ដែលអ្នកធ្លាប់បានសម្រេចក្នុងពេលកន្លងមក ជាពិសេសរំលឹកវា
នៅពេលដែលអ្នកកំពុងបាក់ទឹកចិត្ត។
-ទីបី៖ “បើត្រូវព្រួយបារម្ភ ត្រូវបារម្ភបែបស្ថាបនា”។ អ្នកប្រាកដ
ជានឹងកើតចិត្តព្រួយបារម្ភនៅពេលណាមួយ ទោះបីអ្នកព្យាយាម
គិតវិជ្ជមានក៏ដោយ ប៉ុន្តែវាមិនបង្កបញ្ហានោះទេ ប្រសិនបើអ្នក
អនុវត្តតាមការណែនាំរបស់លោកដុកទ័រ Dr. Maxwell Maltz គឺ
“ព្រួយបារម្ភបែបស្ថាបនា”។ ការព្រួយបារម្ភ គឺជាការរំពឹងគិតថា
នឹងមានរឿងអាក្រក់កើតឡើងនាពេលអនាគត ហើយថ្នាំដើម្បី
ព្យាបាលជំងឺនេះ គឺការរំពឹងលើរឿងល្អៗដែលអាចនឹងកើតឡើង
លើជីវិតរបស់អ្នក។ ទង្វើនេះនឹងធ្វើឱ្យចិត្តអ្នកអាចរក្សាភាពវិជ្ជមាន
បានជានិច្ច។
-ទីបួន៖ “ការគិតវិជ្ជមាន”។ ដូចបានបកស្រាយនៅក្នុងជំហាន
ទីមួយរួចមកហើយ ថាអ្នកជាម្ចាស់លើចិត្តរបស់ខ្លួនឯង ដូច្នេះ
អ្នកអាចកំណត់ឱ្យវាគិតគំនិតដែលវិជ្ជមានច្រើនទៅតាមតម្រូវ
ការរបស់អ្នក ទោះបីអ្នកស្ថិតនៅក្នុងស្ថានភាពបែបណាក៏ដោយ។
ការគិតវិជ្ជមាន អាចធ្វើឱ្យអ្នកមានអារម្មណ៍ល្អ ហើយភាពរីករាយ
អាចកើតឡើងទៅតាមនោះដែរ។ ពេលអ្នកគិតវិជ្ជមាន អ្នក
សប្បាយចិត្ត ពេលអ្នកសប្បាយចិត្ត អ្នកធ្វើអាកប្បកិរិយារីករាយ
ហើយទីបំផុត មនុស្សនឹងមើលមកអ្នក ថាជាមនុស្សរីករាយម្នាក់។
ការអនុវត្តតាមបួនចំណុចនេះ អ្នកនឹងបណ្តុះ PMA នៅក្នុងខ្លួន
បានកាន់តែច្រើន។ ដូច្នេះអ្នកបានសម្រេចជំហានទីប្រាំនេះដោយ
ជោគជ័យ!
📍ជំហានទី៦ ទៅកាន់ PMA ៖ “ទម្លាប់ចេះអត់ឱន”
“ការមិនចេះអត់ឱន” គឺជាសត្រូវរបស់ PMA។ ពេលអ្នកធ្វើខុស
ហើយអ្នកមិនអត់ឱនឱ្យខ្លួនឯង ភាពអវិជ្ជមានគ្រប់ប្រភេទបង្ហាញ
ខ្លួននៅខណៈដែលអ្នកស្តីបន្ទោសខ្លួនឯងនោះ។ ពេលអ្នកមិន
អត់ឱនឱ្យមនុស្សណាម្នាក់ដែលប្រព្រឹត្តិកំហុស ភាពអវិជ្ជមានក៏
បង្ហាញខ្លួននៅក្នុងចិត្តរបស់អ្នក។
“ការផ្តល់អភ័យទោស” ត្រូវបានគេរកឃើញថា ជាថ្នាំព្យាបាល
ផ្លូវចិត្តមួយដ៏អស្ចារ្យ។ វាមិនមែនមានន័យថា អ្នកភ្លេចពីកំហុស
នោះទេ តែវាគ្រាន់តែមានន័យថា អ្នករំដោះចិត្តពីវា ហើយបន្ត
ដំណើរទៅមុខទៀត។
ការចេះអត់ឱន គឺជាទម្រង់មួយនៃការផ្តល់អភ័យទោស។ ពេល
អ្នកមានទម្លាប់អត់ឱន ចិត្តរបស់អ្នកមានភាពទូលំទូលាយ ទាំង
ចំពោះខ្លួនឯងផង និងចំពោះអ្នកដទៃផង។ អ្នកទទួលស្គាល់
មនុស្សទៅតាមធម្មជាតិរបស់ពួកគេ មិនមែនតាមចិត្តដែលអ្នក
ចង់បានឡើយ ហើយតាមរយៈការទទួលស្គាល់នេះ អ្នកក៏ទទួល
ស្គាល់ធម្មជាតិរបស់អ្នកដូចគ្នា។
ការចេះអត់ឱន ធ្វើឱ្យអ្នកចេះមើលអ្នកដទៃក្នុងផ្លូវល្អ។ អ្នកមាន
សេចក្តីស្រឡាញ់ សេចក្តីមេត្តា និងភាពស្និទ្ធស្នាលជាអ្នកដទៃ។
ការចេះអត់ឱន អាចបង្កើតបរិស្ថាន (ទាំងផ្នែកចិត្តនិងរាងកាយ)
ដ៏ល្អសម្រាប់ការលូតលាស់របស់ PMA។
អ្នកចាំបាច់អនុវត្តសេចក្តីអត់ឱននេះឱ្យបានជារឿយៗ រហូតដល់
វាក្លាយជាទម្លាប់។ ពេលវាក្លាយជាផ្នែកមួយនៃជីវិតរបស់អ្នក វា
នឹងកើតឡើងដោយស្វ័យប្រវត្តិ។
ពេលនេះអ្នកបានរៀនចប់ជំហានទី៦ ហើយថ្ងៃស្អែកអ្នកនឹងរៀន
ពីរជំហានទៀត ដើម្បីបណ្តុះ PMA នៅក្នុងខ្លួន៕
-ដោ នីដា
(ថ្ងៃស្អែកយើងនឹងរៀនពីជំហានទី៧ និងទី៨)
