03/08/2026
ឯកឧត្ដម ឆាយ វណ្ណា សមាជិកគណៈអចិន្រ្តៃយ៍យុវជនគណបក្សប្រជាជនកម្ពុជាថ្នាក់កណ្ដាល បានអញ្ជើញជាអធិបតីក្នុងពិធីផ្សព្វផ្សាយការអនុវត្តសេចក្ដីណែនាំ ស្ដីពីភារកិច្ចជាអាទិភាពក្នុងឆ្នាំ២០២៦ របស់យុវជនគណបក្សប្រជាជនកម្ពុជាឆ្ពោះទៅការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ និងសំណេះសំណាលជាក្រុមការងារគណបក្សប្រជាជនកម្ពុជាឃុំ និងក្រុមប្រឹក្សាឃុំអដា
ត្បូងឃ្មុំ៖ នារសៀលថ្ងៃទី២ ខែសីហា ឆ្នាំ២០២៦ ឯកឧត្ដម ឆាយ វណ្ណា សមាជិកគណៈកម្មាធិការកណ្ដាលគណបក្សប្រជាជនកម្ពុជា សមាជិកគណៈអចិន្រ្តៃយ៍យុវជនគណបក្សប្រជាជនកម្ពុជាថ្នាក់កណ្ដាល និងជាប្រធានផ្នែកវប្បធម៌ និងសាសនានៃយុវជនគណបក្សប្រជាជនកម្ពុជាថ្នាក់កណ្ដាល បានអញ្ជើញជាអធិបតីក្នុងពិធីផ្សព្វផ្សាយការអនុវត្តសេចក្ដីណែនាំ ស្ដីពីភារកិច្ចជាអាទិភាពក្នុងឆ្នាំ២០២៦ របស់យុវជនគណបក្សប្រជាជនកម្ពុជាឆ្ពោះទៅការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ និងសំណេះសំណាលជាក្រុមការងារគណបក្សប្រជាជនកម្ពុជាឃុំនិងក្រុមប្រឹក្សាឃុំអដា ស្រុកមេមត់ ខេត្តត្បូងឃុំ។
ជាកិច្ចចាប់ផ្ដើម ឯកឧត្តម ឆាយ វណ្ណា ប្រធានអង្គប្រជុំ ក៏បានពាំនាំនូវការផ្តាំផ្ញើសាកសួរសុខទុក្ខរបស់ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្ដេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវនគណបក្សប្រជាជនកម្ពុជាថ្នាក់កណ្ដាល ចំពោះដល់ថ្នាក់ដឹកនាំ សមាជិក សមាជិកាជាក្រុមការងារគណបក្សប្រជាជនកម្ពុជាឃុំសេដា និងក្រុមប្រឹក្សាឃុំអដា ស្រុកមេមត់ ខេត្តត្បូងឃុំផងដែរ។ លើសពីនេះទៀត ឯកឧត្តមប្រធាន ក៏បានសម្តែងនូវការកោតសរសើរ និងវាយតម្លៃចំពោះ ថ្នាក់ដឹកនាំ សមាជិក សមាជិកាជាក្រុមការងារគណបក្សប្រជាជនកម្ពុជាឃុំអដា និងក្រុមប្រឹក្សាឃុំ ដែលពោរពេញដោយសមត្ថភាពជំនាញ មានចំណេះដឹង និងបទពិសោធន៍ការងារក្នុងសង្គម ហើយបានស្មគ្រ័ចិត្តមកជួយការងារយុវជនគណបក្ស និងការងារគណបក្សនៅមូលដ្ឋាន ប្រកបដោយការប្តេជ្ញាចិត្ត ក្នុងការលះបង់ពេលវេលា កម្លាំងកាយចិត្ត ប្រាជ្ញាស្មារតី និងសម្ភារ ថវិកា សំដៅលើកកម្ពស់ស្មារតីភ្ញាក់រលឹក ជំនឿជឿជាក់លើការដឹកនាំរបស់គណបក្សប្រជាជនកម្ពុជា ដើម្បីដណ្តើមប្រៀបខ្លាំង និងប្រៀបឈ្នះ ជូនគណបក្សជារៀងដរាបតទៅ។
ឯកឧត្តមប្រធាន ឆាយ វណ្ណា ក៏បានអំពាវនាវឱ្យ ថ្នាក់ដឹកនាំ សមាជិក សមាជិកាក្រុមការងារគណបក្សប្រជាជនកម្ពុជាឃុំអំពិលតាពក និងក្រុមប្រឹក្សាឃុំអដា ស្រុកមេមត់ ខេត្តត្បូងឃុំទាំងអស់គ្នាត្រូវបំពេញការងារជាមួយគ្នាក្នុងលក្ខណៈជាបងប្អូន ស្មាគៀកស្មា និងសូមចងចាំជានិច្ចនូវបណ្តាំរបស់ សម្ដេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្ដាល គឺការគោរពវិន័យ ការបំពេញភារកិច្ចប្រកបដោយស្មារតីទទួលខុសត្រូវខ្ពស់ ឈរលើគោលការណ៍សាមគ្គី ឯកភាពផ្ទៃក្នុង និងកិច្ចសហប្រតិបត្តិការល្អ ជាពិសេសត្រូវខិតខំរៀនសូត្រ អភិវឌ្ឍសមត្ថភាពជាប់ជាប្រចាំ ព្រមទាំងត្រូវមានសីលធម៌ គុណធម៌ ជាប់ខ្លួនជានិច្ច។ នៅក្នុងឱកាសនេះដែរ ឯកឧត្តមប្រធាន ឆាយ វណ្ណា ក៏បានរំលឹកអំពីគោលការណ៍សំខាន់ៗ របស់គណបក្សដែលបានដាក់ចេញដោយ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដូចជាសិល្បៈនៃការចែករំលែក យុទ្ធសាស្រ្តឈ្នះៗ គោលការណ៍សមូហភាពដឹកនាំ បុគ្គលទទួលខុសត្រូវ ជាពិសេសសមិទ្ធិផលធំៗជាប្រវត្តិសាស្រ្តរបស់គណបក្សប្រជាជនកម្ពុជាក្រោមការដឹកនាំដ៏ឈ្លាសវៃ និងភ្លឺស្វាងរបស់សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា៕
