15/09/2026
សមាគមនារីកម្ពុជា ដើម្បីសន្តិភាព និងអភិវឌ្ឍន៍ (CWPD) សហការជាមួយ រដ្ឋបាលខណ្ឌទួលគោក រាជធានីភ្នំពេញ បានរៀបចំពិធីសំណេះសំណាល និងប្រគល់ បណ្ណមូលនិធិសមធម៌សុខាភិបាល (ម.ស.ស) ចំនួន ៥០ នាក់ ជូនដល់បងប្អូនស្ត្រីដែលកំពុងបម្រើការនៅសេវាកម្សាន្តទេសចរណ៍ក្នុងសេដ្ឋកិច្ចក្រៅប្រព័ន្ធ។
📅 ថ្ងៃទី១៤ ខែកញ្ញា ឆ្នាំ២០២៦ វេលាម៉ោង ២:៣០ រសៀល
នៅសាលប្រជុំជាន់ទី៣ រដ្ឋបាលខណ្ឌទួលគោកបានរៀបចំ ពិធីសំណេះសំណាល និងប្រគល់
បណ្ណមូលនិធិសមធម៌សុខាភិបាល (ម.ស.ស) ចំនួន ៥០ នាក់ ជូនដល់ស្ត្រីធ្វើការនៅសេវា ទេសចរណ៍ក្នុងសេដ្ឋកិច្ចក្រៅប្រព័ន្ធ។ ពិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ជា ពិសី អភិបាល នៃគណៈអភិបាលខណ្ឌទួលគោក ដោយមានការអញ្ជើញចូលរួមពី លោកជំទាវ មៀច សុធារី អគ្គលេខាធិការនៃសមាគមនារីកម្ពុជា ដើម្បីសន្តិភាព និងអភិវឌ្ឍន៍ (CWPD) និង លោកស្រី វេជ្ជបណ្ឌិត សៀង សុវត្ថិទេវី អនុប្រធានមន្ទីរសុខាភិបាល នៃរដ្ឋបាលរាជធានីភ្នំពេញ ព្រមទាំងតំណាងអាជ្ញាធរ និងភាគីពាក់ព័ន្ធ។
ក្នុងឱកាសនេះ លោកជំទាវ មៀច សុធារី បានជម្រាបជូនអំពីសាវតារបស់សមាគមនារី និងការអនុវត្តគម្រោងបង្ការ និងទប់ស្កាត់ការរីករាលដាលនៃមេរោគអេដស៍/ជំងឺអេដស៍ ក្នុងចំណោមស្ត្រីធ្វើការនៅសេវាកម្សាន្ត និងដៃគូ ដែលទទួលបានការគាំទ្រថវិកាពី មូលនិធិសកល (Global Fund) តាមរយៈ អង្គការខាណា (KHANA)។ គម្រោងកំពុងអនុវត្តនៅរាជធានី-ខេត្តចំនួន ១១ រួមមាន ភ្នំពេញ កណ្ដាល ព្រៃវែង កែប កំពត កោះកុង តាកែវ កំពង់ស្ពឺ ព្រះសីហនុ កំពង់ចាម និងត្បូងឃ្មុំ ដោយមានក្រុមគោលដៅគ្របដណ្ដប់សរុប ៣២,៤៦៧ នាក់។
សម្រាប់រាជធានីភ្នំពេញ គម្រោងមានក្រុមគោលគ្រប់ដណ្តប់សរុបចំនួន ២៣,១៥៩ នាក់ មានគ្រឹះស្ថានសេវាកម្សាន្តចំនួន ៧៣២ គ្រឹះស្ថាន។ ដោយឡែក ខណ្ឌទួលគោកមានក្រុមគោលដៅចំនួន ២,៩០១ នាក់ និងគ្រឹះស្ថានសេវាកម្សាន្តចំនួន ៩៩ គ្រឹះស្ថាន ដែលសមាគមនារីកំពុងផ្តល់ការគាំទ្រ (គិតត្រឹមត្រីមាសទី២ ឆ្នាំ២០២៦)។
ជាមួយគ្នានេះ សមាគមនារីបានចូលរួមសម្របសម្រួល និងគាំទ្របងប្អូនស្ត្រីក្នុងការទទួលបានបណ្ណ ម.ស.ស ដោយបានស្រង់បញ្ជីឈ្មោះស្ត្រីជួបការលំបាកស្នើសុំបណ្ណសរុប ២៩២ នាក់ ហើយជាលទ្ធផល មានស្ត្រីចំនួន ២៨៣ នាក់ ទទួលបានបណ្ណត្រូវតាមលក្ខខណ្ឌនៅក្នុងខណ្ឌចំនួន ៩ នៃរាជធានីភ្នំពេញ។ ក្នុងនោះ ខណ្ឌទួលគោក ស្ត្រីទទួលបានបណ្ណមានចំនួន ៥០ នាក់ ។
🎤 ក្នុងមតិផ្តាំផ្ញើ ឯកឧត្តម ជា ពិសី បានសម្តែងការយកចិត្តទុកដាក់ចំពោះសុខុមាលភាព និងសុខភាពរបស់បងប្អូនស្ត្រីដែលកំពុងបម្រើការនៅសេវាកម្សាន្តទាំងអស់ ។ ឯកឧត្តមបានលើកឡើងថា សុខភាពគឺជាមូលដ្ឋានសំខាន់សម្រាប់ការរស់នៅ និងការប្រកបការងារ ហើយបានលើកទឹកចិត្តឱ្យបងប្អូនស្ត្រីប្រើប្រាស់បណ្ណមូលនិធិសមធម៌សុខាភិបាល(ម.ស.ស) នៅពេលមានតម្រូវការថែទាំសុខភាព តាមមណ្ឌលសុខភាព និងមន្ទីរពេទ្យរដ្ឋ ដែលនៅជិតបំផុត។
ឯកឧត្តមក៏បានបញ្ជាក់ថា ការប្រើប្រាស់បណ្ណគាំពារសង្គម អាចជួយ កាត់បន្ថយបន្ទុកចំណាយក្នុងគ្រួសារ និងជួយឱ្យប្រជាពលរដ្ឋទទួលបានសេវាថែទាំសុខភាពប្រកបដោយសុវត្ថិភាព និងសមធម៌ ដោយគ្មានការរើសអើង។
ឯកឧត្តមក៏បានសម្តែងការចាប់អារម្មណ៍ និងគាំទ្រចំពោះការអនុវត្តគម្រោងរបស់ CWPD ក្នុងការផ្សព្វផ្សាយ និងអប់រំអំពីការបង្ការ និងទប់ស្កាត់ការរីករាលដាលនៃមេរោគអេដស៍/ជំងឺអេដស៍ ក្នុងចំណោមស្ត្រីធ្វើការនៅសេវាកម្សាន្ត និងដៃគូ នៅរាជធានីភ្នំពេញ ព្រមទាំងបានបញ្ជាក់ពីការបន្តខិតខំប្រឹងប្រែង ដើម្បីលើកកម្ពស់សុខុមាលភាពរបស់បងប្អូនស្ត្រី។
🙏 សមាគមនារីកម្ពុជា ដើម្បីសន្តិភាព និងអភិវឌ្ឍន៍ (CWPD) សូមថ្លែងអំណរគុណយ៉ាងជ្រាលជ្រៅជូនចំពោះ រដ្ឋបាលខណ្ឌទួលគោក អាជ្ញាធរជាតិប្រយុទ្ធនឹងជំងឺអេដស៍ មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ សាលារាជធានីភ្នំពេញ មន្ទីរសុខាភិបាល នៃរដ្ឋបាលរាជធានីភ្នំពេញ អាជ្ញាធរខណ្ឌ-សង្កាត់ ម្ចាស់គ្រឹះស្ថានសេវាកម្សាន្ត និងអង្គការដៃគូពាក់ព័ន្ធនានា ដែលបានផ្តល់ការគាំទ្រ និងសហការយ៉ាងសកម្មក្នុងការអនុវត្តសកម្មភាពគម្រោងកន្លងមក ប្រកបដោយភាពជោគជ័យ។
