29/03/2026
នៅឯសាលមហោស្រពខេត្តក្រចេះ នាព្រឹកថ្ងៃទី២៧ ខែមីនា ឆ្នាំ២០២៦ លោក យុក សេងឡុង Senglong Youk នាយកប្រតិបត្តិ #អង្គការសម្ព័ន្ធភាពដើម្បីអភិរក្សធនធានជលផល #អង្គការFACT អនុប្រធានអចិន្ត្រៃយ៍ក្រុមប្រឹក្សាភិបាលបណ្តាញអេកូទេសចរណ៍ទន្លេសាប និងជាសហស្ថាបនិកបណ្តាញអេកូទេសចរណ៍តំបន់ទន្លេមេគង្គ បានអញ្ជើញចូលរួម នៅក្នុងសិក្ខាសាលាស្តីពី “ការអភិវឌ្ឍ និងគ្រប់គ្រងទេសចរណ៍” ដើម្បីចូលរួមអបអរសាទរព្រឹត្តិការណ៍ #បុណ្យទន្លេ លើកទី១០ ឆ្នាំ២០២៦ ក្រោមប្រធានបទ «ទន្លេបៃតង បេតិកភណ្ឌវប្បធម៌ និងធម្មជាតិមហាសាល» ក្រោមអធិបតីភាព ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តម វ៉ា ថន អភិបាលនៃគណៈអភិបាលខេត្តក្រចេះ ដែលសិក្ខាសាលានេះ ត្រូវបានសហការរៀបចំឡើងដោយក្រសួងទេសចរណ៍ និងរដ្ឋបាលខេត្តក្រចេះ ក្នុងគោលបំណងដើម្បីចែករំលែកចំណេះដឹង បទពិសោធអំពីចំណុចខ្លាំង ចំណុចខ្វះខាត កាលានុវត្តភាពក្នុងការវិនិយោគ បញ្ហាប្រឈម ទស្សនវិស័យ និងការកំណត់គោលដៅអភិវឌ្ឍក្នុងវិស័យទេសចរណ៍ សំដៅជំរុញកំណើនភ្ញៀវទេសចរជាតិ និងអន្តរជាតិ ឱ្យមកទស្សនាខេត្តក្រចេះ និងខេត្តក្បែរខាងឱ្យកាន់តែច្រើនថែមទៀត។
ជាផ្នែកមួយនៃកម្មវិធីសិក្ខាសាលានេះដែរ លោក យុក សេងឡុង ក៏ត្រូវបានអញ្ជើញឱ្យចូលរួមជាវាគ្មិននៅក្នុងកិច្ចពិភាក្សាប្រធានបទទី១ ស្តីពី”ការអភិវឌ្ឍទេសចរណ៍ប្រកបដោយនិរន្តរភាពតាមដងទន្លេ៖ ការភ្ជាប់ធនធានធម្មជាតិ វប្បធម៌ និងសហគមន៍” ក្រោមការដឹកនាំសម្របសម្រួលកិច្ចពិភាក្សានេះ ដោយ ឯកឧត្តមបណ្ឌិត ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ ប្រធានក្រុមប្រឹក្សាភិបាលបណ្តាញ និងជាស្ថាបនិកបណ្តាញ ។
សិក្ខាសាលាដ៏មានសារៈសំខាន់នេះ មានការអញ្ជើញចូលរួមពីគ្រប់សសរស្តម្ភនៃកិច្ចសហប្រតិបត្តិការទាំង៦ រួមមាន៖ ក្រសួងស្ថាប័នអន្តរវិស័យ តំណាងរដ្ឋបាលរាជធានី-ខេត្ត មន្ទីរទេសចរណ៍ទាំង២៥រាជធានី-ខេត្ត មន្ទីរអង្គភាពជុំវិញខេត្ត មន្ត្រីរាជការ វិស័យឯកជន ដៃគូអភិវឌ្ឍ ប្រតិបត្តិករ សេវាករទេសចរណ៍ ម្ចាស់អាជីវកម្មសមាគមទេសចរណ៍ សមាគមយុវជន សិស្ស និស្សិត អ្នកផលិតមាតិកា Influencers និងអ្នកពាក់ព័ន្ធក្នុងវិស័យទេសចរណ៍ សរុបប្រមាណជាង៥០០នាក់។
ថ្លែងក្នុងពិធីនេះ ឯកឧត្តមរដ្ឋមន្ត្រី បានគូសរំលេចថា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាតេជោ ហ៊ុន សែនអតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា និងការដឹកនាំដ៏ឈ្លាសវៃ ប៉ិនប្រសប់ និងថាមពលរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី កម្ពុជាបន្តរក្សាបាននូវសុខសន្តិភាព ស្ថិរភាពនយោបាយ សណ្តាប់ធ្នាប់សង្គម និងការអភិវឌ្ឍលើគ្រប់វិស័យ ជាពិសេសវិស័យទេសចរណ៍នៅតែបន្តរក្សាភាពធន់ និងជាគោលដៅទេសចរណ៍ប្រកបដោយសុខសុវត្ថិភាព។
ឯកឧត្តមរដ្ឋមន្ត្រី បានគូសរំលេចបន្ថែមថា ក្នុងឆ្នាំ២០២៥ កន្លងទៅ កម្ពុជាបានទទួលទេសចរអន្តរជាតិសរុប ៥,៥៧លាននាក់ ជាមួយទេសចរជាតិប្រមាណ ២៥,១៦លាននាក់ កើនឡើង ១១,៧% និងចំណូលទេសចរអន្តរជាតិ ៣,៨៧៨ លានដុល្លារអាម៉េរិក កើនឡើង ៦,៦%។
ក្នុងន័យនេះ ដើម្បីរួមចំណែកអភិវឌ្ឍវិស័យទេសចរណ៍ប្រកបដោយចីរភាព ភាពធន់ និងបរិយាបន្ន ឯកឧត្តមរដ្ឋមន្ត្រីបានស្នើឱ្យគ្រប់ភាគីពាក់ព័ន្ធទាំងថ្នាក់ជាតិ និងថ្នាក់ក្រោមជាតិ រួមគ្នាលើកកម្ពស់ការផ្សព្វផ្សាយទេសចរណ៍ ឱ្យបានកាន់តែទូលំទូលាយថែមទៀត ស្របតាមទិសស្លោក “ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍” ដែលបានដាក់ចេញដោយសម្តេចតេជោ ហ៊ុន សែន “ទេសចរណ៍រីកលូតលាស់ក្នុងសន្តិភាព” ដែលបានដាក់ចេញដោយសម្តេចបវរធិបតីនាយករដ្ឋមន្ត្រី និង “បុគ្គលម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់” ដែលបានដាក់ចេញដោយមហាគ្រួសារវិស័យទេសចរណ៍។
តួយ៉ាង ឯកឧត្តមរដ្ឋមន្ត្រី មានប្រសាសន៍បន្តថា សិក្ខាសាលានាព្រឹកដ៏សែនមនោរម្យនេះ ត្រូវបានរៀបចំឡើង ដើម្បីលើកកម្ពស់សមត្ថភាព និងចំណេះដឹងរបស់ភាគីពាក់ព័ន្ធ ក្នុងវិស័យទេសចរណ៍ ពោលគឺផ្តោតសំខាន់លើការបង្កើនគុណភាពសេវាកម្មទេសចរណ៍ ការអភិរក្សធនធានធម្មជាតិ និងវប្បធម៌ ព្រមទាំងការគ្រប់គ្រងគោលដៅទេសចរណ៍ឱ្យមានប្រសិទ្ធភាព និងចីរភាពនៅខេត្តក្រចេះ។
ជាមួយគ្នានេះ ឯកឧត្តមរដ្ឋមន្រ្តី អំពាវនាវ ឱ្យរដ្ឋបាលរាជធានី ខេត្ត និងគ្រប់ភាគីពាក់ព័ន្ធទាំងអស់ យកចិត្តទុកដាក់លើការអត្ថាធិប្បាយនិទានរឿង (Story telling) នៃសក្តានុពលទេសចរណ៍នីមួយៗ (តំបន់សក្តានុពលទេសចរណ៍, ម្ហូបអាហារ, ជំនឿ, ទំនៀមទំលាប់,...) ឱ្យមានភាពទាក់ទាញអារម្មណ៍ និងរស់រវើក ធ្វើឱ្យភ្ញៀវទេសចរ ចង់មកទស្សនាកម្សាន្ត, ចង់ស្គាល់, ចង់ឃើញ, ចង់ភ្លក្ស, ចង់សាកល្បងបទពិសោធន, ចង់ស្នាក់នៅកាន់តែយូរ, និង ចង់មកទស្សនាម្តងទៀត»។
នៅក្នុងដំណើរការប្រព្រឹត្តទៅនៃសិក្ខាសាលាស្តីពី “ការអភិវឌ្ឍ និងគ្រប់គ្រងទេសចរណ៍” ក្រសួងទេសចរណ៍ និងរដ្ឋបាលខេត្តក្រចេះ បានរៀបចំវេទិកាពិភាក្សាលើប្រធានបទចំនួន ២ ក្នុងនោះវេទិកាពិភាក្សាប្រធានបទទី១ ស្តីពី”ការអភិវឌ្ឍទេសចរណ៍ប្រកបដោយនិរន្តរភាពតាមដងទន្លេ៖ ការភ្ជាប់ធនធានធម្មជាតិ វប្បធម៌ និងសហគមន៍” និងវេទិកាពិភាក្សាប្រធានបទទី២ ស្តីពី“ការអភិវឌ្ឍខ្សែទស្សនកិច្ចទេសចរណ៍ភូមិភាគឦសាន”។
រូបភាព&ខ្លឹមសារអត្ថបទបន្ថែម៖ ក្រសួងទេសចរណ៍
