21/04/2026
#ឧដុង្គ គឺជាអតីតរាជធានីចាស់របស់ខ្មែរ (១៦២០-១៨៦៣) រាជធានីនេះចាប់កកើតក្នុងរជ្ជកាលព្រះជ័យជេដ្ឋាទី២(បុត្រាព្រះស្រីសុរិយោពណ៌) ក្នុងសម័យនោះដោយមានការវាយប្រហារជាច្រើនលើកពីសៀម ព្រះបាទស្រីសុរិយោពណ៌ ក៏ចងសម្ព័ន្ធមិត្តជាមួយស្តេចអាណ្ណាម ហើយក៏ភ្ជាប់ចំណងមេត្រីភាពជាសាច់ឈាមនិងគ្នា ដោយផ្សំផ្គំបុត្រីស្តេចអាណ្ណាមជាអគ្គមហេសីឲ្យព្រះបាទជ័យជេដ្ឋាទី២ ក្នុងគោលបំណងឲ្យស្តេចអាណ្ណាមជួយទប់ទល់ការពារទឹកដីពីការឈ្លានពានរបស់សៀម។ ប៉ុន្តែទង្វើនេះហាក់បីដូចជាកាំបិតចិតដងឯង ធ្វើឲ្យប្រទេសទាំងមូលធ្លាក់ក្នុងឥទ្ធិពលអំណាចស្តេចអាណ្ណាមទៅវិញ។ ស្ថានភាពប្រទេសស្ថិតក្រោមការប្រទាញប្រទង់អំណាចនៃប្រទេសសៀម និងយួន រហូតដល់រជ្ជកាលព្រះបាទអង្គដួង ។ ដោយមើលឃើញគ្រោះអាក្រក់នេះហើយទើប ព្រះបាទអង្គដួងបានលួចសរសេរលិខិតទៅស្តេចណាប៉ូឡេអុងបារាំងតាមរយៈបេសកជនបារាំងមួយរូប ដើម្បីសុំឲ្យបារាំងមកការពារខ្មែរ ប៉ុន្តែជាអកុសលសំបុត្រនោះបានធ្លាក់ទៅដៃស្តេចសៀមធ្វើឲ្យសៀមដឹងមុន បណ្តាលឲ្យផែនការនោះ បរាជ័យ។ រហូតដល់រាជព្រះបាទនរោត្តមទើបបារាំងចូលមកគ្រប់គ្រងឥណ្ឌូចិនតែម្តង។
ថ្មីៗនេះក្រសួងវប្បធម៌និងវិចិត្រសិល្បៈបានជួសជុលព្រះវិហារដ៏ចំណាស់មួយលើខ្នងភ្នំឧត្តុងហើយប្រែក្លាយព្រះវិហារនោះជាសារមន្ទីរសម័យកាលឧត្តុង ដែលក្នុងសារមន្ទីរនោះមានដាក់តាំងវត្ថុនានាមានបដិមា និងការូសេរ៉ាមិកផ្កាចាន់ដែលធ្វើឡើងក្នុងសម័យកាលនោះ។
(រូបភាពរបស់លោក Andy Brouwer)
