02/05/2026
ក្រុមការងាររាជរដ្ឋាភិបាលចុះមូលដ្ឋានឃុំព្រះធាតុ បើកវេទិកាសាធារណៈដើម្បីដោះស្រាយបញ្ហាប្រឈមជូនប្រជាពលរដ្ឋ
(ត្បូងឃ្មុំ)៖ នាព្រឹកថ្ងៃទី២ ខែឧសភា ឆ្នាំ២០២៦ ក្រុមការងាររាជរដ្ឋាភិបាលចុះមូលដ្ឋានឃុំព្រះធាតុ បានរៀបចំវេទិកាសាធារណៈស្តីពីការផ្សព្វផ្សាយ និងពិគ្រោះយោបល់ ដើម្បីស្តាប់នូវសំណូមពរ និងដោះស្រាយបញ្ហាប្រឈមនានារបស់ប្រជាពលរដ្ឋក្នុងមូលដ្ឋាន។ វេទិកានេះបានប្រព្រឹត្តទៅក្រោមអធិបតីភាព ឯកឧត្តម ខ្វៃ អាទិត្យា អនុរដ្ឋលេខាធិការ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំព្រះធាតុ។
ពិធីនេះត្រូវបានរៀបចំឡើងនៅបរិវេណវត្តនទីបុព្វតារាម (វត្តថ្មីលើ) ស្ថិតក្នុងឃុំព្រះធាតុ ស្រុកអូររាំងឪ ខេត្តត្បូងឃ្មុំ ដោយមានការអញ្ជើញចូលរួមពី ឯកឧត្តម ឡេង ជីវិន អគ្គនាយកនៃអគ្គនាយកដ្ឋានចំណេះដឹង និងព័ត៌មានបរិស្ថាន, លោក នី សុធី ប្រធានមន្ទីរបរិស្ថានខេត្តត្បូងឃ្មុំ, លោក មេឃុំ, តំណាងរដ្ឋបាលស្រុក, កងកម្លាំងនគរបាល, លោកគ្រូ អ្នកគ្រូ និងបងប្អូនប្រជាពលរដ្ឋសរុបចំនួន ៣៤៥នាក់។
ក្នុងឱកាសនោះ ក្រុមការងារបានទទួលយកនូវសំណើ និងសំណូមពរផ្ទាល់មាត់ពីប្រជាពលរដ្ឋសរុបចំនួន ១០ករណី។ ជាលទ្ធផល ក្រុមការងារបានធ្វើការដោះស្រាយជូនភ្លាមៗចំនួន ៣ករណី ចុះពិនិត្យជាក់ស្តែងចំនួន ៦ករណី និងបានកត់ត្រាសំណើចំនួន ១ករណី ដើម្បីដាក់ជូនថ្នាក់ដឹកនាំពិភាក្សា និងរកដំណោះស្រាយបន្ត។
មានប្រសាសន៍ក្នុងវេទិកានោះ ឯកឧត្តម ខ្វៃ អាទិត្យា បានដាក់ចេញនូវសេចក្តីណែនាំសំខាន់ៗដល់អាជ្ញាធរមូលដ្ឋាន រួមមាន៖
- ការពន្លឿនសេវាសាធារណៈ៖ ត្រូវយកចិត្តទុកដាក់ផ្តល់សេវាជូនប្រជាពលរដ្ឋឱ្យបានឆាប់រហ័ស ខ្ជាប់ខ្ជួន និងប្រកបដោយក្រមសីលធម៌។
- ការអនុវត្តគោលនយោបាយភូមិ-ឃុំមានសុវត្ថិភាព៖ ត្រូវបន្តពង្រឹងសន្តិសុខ សណ្តាប់ធ្នាប់សាធារណៈ និងបង្ក្រាបរាល់បទល្មើសគ្រប់ប្រភេទ ក្នុងមូលដ្ឋានឱ្យបានម៉ឺងម៉ាត់បំផុត។
- ការដោះស្រាយបញ្ហាជាក់ស្តែង៖ អាជ្ញាធរត្រូវបន្តចុះជាប់ជាមួយមូលដ្ឋាន ដើម្បីស្តាប់ទុក្ខលំបាក និងដោះស្រាយរាល់បញ្ហាប្រឈមរបស់ពលរដ្ឋឱ្យបានទាន់ពេលវេលា។
- បន្តចូលរួមយុទ្ធនាការនានា ប្រមូលទុកដាក់សំរាម ឱ្យបានត្រឹមត្រូវ រៀបចំផ្លូវថ្នល់កុំឱ្យមានសំរាម និងសំណល់ប្លាស្ទិក កាត់បន្ថយការប្រើ់ប្រាស់ប្លាស្ទិក ដើម្បីឃុំព្រះធាតុមានភាពស្អាត មានអនាម័យ មានសោភ័ណភាព ប្រជាពលរដ្ឋរស់នៅមានសុខភាពល្អ និងមានជីវភាពល្អប្រសើរ។
វេទិកាសាធារណៈនេះ បានបញ្ចប់ទៅក្រោមបរិយាកាសស្និទ្ធស្នាល និងទទួលបានការអបអរសាទរយ៉ាងខ្លាំងពីសំណាក់ប្រជាពលរដ្ឋ ដែលទទួលបានការយកចិត្តទុកដាក់ ដោះស្រាយបញ្ហាផ្ទាល់ពីសំណាក់ក្រុមការងាររាជរដ្ឋាភិបាល៕
