គម្រោង BMZ EYE CLASS

28/09/2026

💻✨ រៀន ICT មិនមែនគ្រាន់តែចេះប្រើបច្ចេកវិទ្យា — ប៉ុន្តែជាការបង្កើតវិធីបង្រៀនថ្មីៗ!

📚 នៅថ្ងៃទី ២៨–២៩ ខែកញ្ញា ឆ្នាំ២០២៦ ក្រុមការងារគម្រោងបានរៀបចំ វគ្គបណ្តុះបណ្តាលស្តីពីការពង្រឹងសមត្ថភាពប្រើប្រាស់ ICT និងបច្ចេកវិទ្យាឌីជីថល សម្រាប់គាំទ្រការបង្រៀន និងការរៀននៅសាលប្រជុំ នៃមន្ទីរអប់រំ យុវជន និងកីឡា ខេត្តកំពង់ឆ្នាំង។

សិក្ខាកាមមិនត្រឹមតែស្តាប់មេរៀនទេ ប៉ុន្តែបាន ស្វែងយល់ សាកល្បង និងអនុវត្តឧបករណ៍ឌីជីថលដែលអាចយកទៅប្រើប្រាស់ក្នុងការងារប្រចាំថ្ងៃ។

🔹 ស្វែងយល់ពីមូលដ្ឋានគ្រឹះកុំព្យូទ័រ Hardware និង Software
🔹 អនុវត្តប្រើប្រាស់ Google Workspace សម្រាប់ការងារបង្រៀន និងគ្រប់គ្រងឯកសារ
🔹 ស្វែងយល់ពី AI ដូចជា ChatGPT និង Gemini និងការប្រើប្រាស់ឱ្យសមស្រប
🔹 អនុវត្ត Google Forms, Sheets, Slides និង Apps Scriptដើម្បីសម្រួលការងារ
🔹 សាកល្បងប្រើ Canva Education សម្រាប់បង្កើតសម្ភារៈសិក្សា និងវីដេអូ
🔹 ពង្រឹងចំណេះដឹងអំពី សុវត្ថិភាពឌីជីថល ដើម្បីការពារគណនី ឯកសារ និងទិន្នន័យផ្ទាល់ខ្លួន។

💡 លោកអ៊ុំ សារ៉េត មន្រ្តីការិយាល័យមធ្យមសិក្សាបានសង្កត់ធ្ងន់ថា "មនុស្សឌីជីថល ជាតម្រូវការមិនខ្វះបាន!​ វីស័យបច្ចេកទេសបាននាំមុខគេ នាពេលបច្ចុប្បន្ននេះ​ ដូច្នេះសូមពង្រឹងសមត្ថភាពដើម្បីអភិវឌ្ឍន៍ការងារ របស់យើង។"

KAPE BMZ/EYE Kampong Chhnang province.

26/09/2026

📚 កិច្ចប្រជុំអង្គការគាំទ្រវិស័យថ្នាក់ខេត្ត P_ ESWG ខេត្តកំពង់ឆ្នាំង លើកទី២ ឆ្នាំ២០២៦

នៅថ្ងៃទី ១៨ ខែកញ្ញា ឆ្នាំ២០២៦ ក្រុមការងារ ESWG ខេត្តកំពង់ឆ្នាំង បានរៀបចំកិច្ចប្រជុំប្រចាំត្រីមាសទី២ នៅការិយាល័យ KAPE ខេត្តកំពង់ឆ្នាំង ដោយមានការចូលរួមពីតំណាង KAPE, SCI, TDSO, KYR, CWPD, SOFDEC និង POE។

🎯 គោលបំណងសំខាន់ៗនៃកិច្ចប្រជុំ

* ពិនិត្យ និងបន្តតាមដានបញ្ហាដែលបានលើកឡើងពីកិច្ចប្រជុំកន្លងមក។
* ចែករំលែកព័ត៌មាន និងបទពិសោធន៍ពីការអនុវត្តកម្មវិធីអប់រំរបស់អង្គការ និងស្ថាប័នពាក់ព័ន្ធ។
* ពិភាក្សាបញ្ហាប្រឈមក្នុងវិស័យអប់រំ និងស្វែងរកដំណោះស្រាយតាមជំនាញ និងការសហការរួមគ្នា។
* ពង្រឹងកិច្ចសហការរវាងអង្គការដៃគូ និងស្ថាប័នរដ្ឋ ដើម្បីគាំទ្រការអភិវឌ្ឍវិស័យអប់រំនៅខេត្តកំពង់ឆ្នាំង។

💡 ប្រធានបទសំខាន់ៗដែលបានពិភាក្សា
កិច្ចប្រជុំបានពិភាក្សាអំពីការគាំទ្រសិស្សដែលមានការរៀនយឺត ការប្រើប្រាស់ ICT និង AI សម្រាប់ការបង្រៀន និងរៀន ការគ្រប់គ្រងសំណល់នៅតាមសាលារៀន ការអប់រំបរិយាបន្ន និងការគាំទ្របណ្តុះបណ្តាលវិជ្ជាជីវៈ។ ជាមួយគ្នានេះ ក៏បានពិភាក្សាអំពីការអភិវឌ្ឍសាលារៀនឱ្យមានភាពធន់នឹងការប្រែប្រួលអាកាសធាតុ និងការអភិវឌ្ឍសាលារៀនបៃតង។

🤝 ការចែករំលែកកម្មវិធីរបស់អង្គការដៃគូ

ក្នុងកិច្ចប្រជុំ អង្គការដៃគូបានចែករំលែកអំពីកម្មវិធី និងការអនុវត្តគម្រោងនៅតាមសាលាគោលដៅ និងតំបន់នានាក្នុងខេត្តកំពង់ឆ្នាំង រួមមានការពង្រឹងការបង្រៀនភាសាអង់គ្លេស ការគាំទ្រគ្រូតាមរយៈការណែនាំ និងការបណ្តុះបណ្តាលវិជ្ជាជីវៈ ព្រមទាំងការអភិវឌ្ឍ និងថែទាំកុមារតូច និងកម្មវិធីអាហារូបត្ថម្ភនៅសហគមន៍។

🌱 សារសំខាន់ពីកិច្ចប្រជុំ

សមាជិក ESWG បានបង្ហាញការប្តេជ្ញាបន្ត ធ្វើការរួមគ្នា ចែករំលែកបទពិសោធន៍ និងសហការជាមួយស្ថាប័នរដ្ឋ ដើម្បីដោះស្រាយបញ្ហាប្រឈម និងពង្រឹងគុណភាពការងារអប់រំនៅថ្នាក់ខេត្ត។ កិច្ចប្រជុំក៏បានឯកភាពលើការបន្តតាមដានការងារ និងពង្រឹងការចូលរួមរបស់សមាជិកឱ្យកាន់តែមានប្រសិទ្ធភាព។

📌 កិច្ចប្រជុំបន្ទាប់ គ្រោងនឹងរៀបចំនៅខែធ្នូ ឆ្នាំ២០២៦។

KAPE CLASS, BMZ/EYE kampong Chhnang province.

24/09/2026

ការប្រជុំ ជាមួយ អ្នកពាក់ព័ន្ធ ដូចជា លោកប្រធាន ការិយាល័យ នាយក គ្រូ. គគស និងក្រុមប្រឹក្សាឃុំ ដើម្បី រៀបចំកែលំអ បណ្ណាល័យ សតវត្ស ទី ២១ នៅសាលាបឋមសិក្សាកំពង់រោទិ៍ ស្រុកកំពង់រោទ៍ ខេត្តស្វាយរៀង។

24/09/2026

🏫 សាលារៀនកាន់តែប្រសើរ ចាប់ផ្តើមពីការចូលរួមរបស់យើងទាំងអស់គ្នា!

នៅថ្ងៃទី ២២–២៣ ខែកញ្ញា ឆ្នាំ២០២៦ គម្រោង BMZ/EYE បានរៀបចំវគ្គបណ្តុះបណ្តាល ពង្រឹងសមត្ថភាពគណៈកម្មការគ្រប់គ្រងសាលារៀន (SMC) ដើម្បីពង្រឹងការយល់ដឹង និងការអនុវត្តតួនាទីរបស់ SMC ក្នុងការគាំទ្រសាលារៀន និងលើកកម្ពស់គុណភាពអប់រំ។

📍 ការបណ្តុះបណ្តាលបានរៀបចំនៅ ៣ទីតាំង
🔹 ថ្ងៃទី ២២ កញ្ញា៖ សាលប្រជុំវិទ្យាល័យហ៊ុន សែនទឹកផុស។
🔹 ថ្ងៃទី ២៣ កញ្ញា៖ សាលប្រជុំសាលាបឋមសិក្សាគំរូក្រុង សម្រាប់អ្នកចូលរួមមកពីស្រុករលាប្អៀរ។
🔹 ការិយាល័យអប់រំ យុវជន និងកីឡា នៃរដ្ឋបាល ស្រុកបរិបូណ៌ សម្រាប់អ្នកចូលរួមក្នុងតំបន់បរិបូណ៌។

👥 អ្នកចូលរួមសរុប ៩៨នាក់ ក្នុងនោះស្ត្រី ៦៨នាក់ ដែលបានចូលរួមយ៉ាងសកម្មក្នុងការរៀនសូត្រ ពិភាក្សា និងចែករំលែកបទពិសោធន៍។

💡 រៀនពីគ្នា ចែករំលែកជាមួយគ្នា និងអនុវត្តនៅសាលារបស់ខ្លួន

វគ្គបណ្តុះបណ្តាលមិនមែនមានតែការស្តាប់ទ្រឹស្តីនោះទេ។ អ្នកចូលរួមបានចែករំលែក បទពិសោធន៍ល្អៗ មេរៀនដែលទទួលបាន និងវិធីសាស្ត្រដែលធ្លាប់អនុវត្តបានជោគជ័យ នៅតាមសាលារបស់ខ្លួន។

តាមរយៈការពិភាក្សា និងការអនុវត្តជាក្រុម អ្នកចូលរួមបានពង្រឹងការយល់ដឹងអំពី៖

✅ តួនាទី និងការទទួលខុសត្រូវរបស់ SMC
✅ ការចូលរួមក្នុងការរៀបចំផែនការ និងការអភិវឌ្ឍសាលារៀន
✅ ការគ្រប់គ្រង និងប្រើប្រាស់ធនធានប្រកបដោយតម្លាភាព
✅ ការស្វែងរកធនធាន និងការរៃអង្គាសថវិកាសម្រាប់សាលារៀន
✅ ការយល់ដឹង និងការបង្ការការក្លែងបន្លំ ដើម្បីពង្រឹងគណនេយ្យភាព
✅ ការធ្វើការជាក្រុម និងការសហការរវាងសាលារៀន និងសហគមន៍

📝 ពីការរៀន ទៅការអនុវត្ត

វគ្គបណ្តុះបណ្តាលបានបញ្ចប់ជោគជ័យ អ្នកចូលរួមបានបង្ហាញការយល់ដឹងកាន់តែច្បាស់អំពីតួនាទី និងការទទួលខុសត្រូវរបស់ SMC ព្រមទាំងកំណត់ចំណុចដែលត្រូវបន្តពង្រឹង ដើម្បីគាំទ្រការកែលម្អសាលារៀនក្នុងរយៈពេលវែង។

🎤 ក្នុងឱកាសនេះ លោក សូ ចំរើន ប្រធានការិយាល័យអប់រំ យុវជន និងកីឡានៃរដ្ឋាបាលស្រុកបរិបូណ៌ បានលើកឡើងតាមរយៈគម្រោងអង្គការខេប បានជួយវិស័យអប់រំ កុមារតូច និងបឋមសិក្សាមានការរីកចម្រើនជាបន្តបន្ទាប់។

លោកក៏បានសង្កត់ធ្ងន់ថា ចំណេះដឹង និងបទពិសោធន៍មិនគួរឈប់នៅត្រឹមសាលាគោលដៅទេ។ សាលាគោលដៅអាចចែករំលែកបទពិសោធន៍ល្អទៅសាលាមិនមែនគោលដៅ តាមរយៈកិច្ចប្រជុំក្រុមសាលា កិច្ចប្រជុំនាយកសាលា និងវេទិកាផ្សេងៗ ដើម្បីឱ្យសាលាទាំងអស់អាចរៀនពីគ្នា និងអនុវត្តវិធីសាស្ត្រដែលសមស្របទៅតាមបរិបទរបស់ខ្លួន។

🌱 SMC មិនមែនគ្រាន់តែជាគណៈកម្មការមួយនៅក្នុងសាលារៀនទេ។ SMC គឺជាដៃគូសំខាន់ក្នុងការភ្ជាប់សាលារៀន គ្រួសារ និងសហគមន៍ ដើម្បីរួមគ្នាគាំទ្រការរៀនសូត្រ និងការអភិវឌ្ឍសាលារៀន។

🤝 ចូលរួមកាន់តែច្រើន — សហការកាន់តែរឹងមាំ — សាលារៀនកាន់តែរីកចម្រើន — សិស្សកាន់តែមានឱកាសរៀនបានល្អ៕

KAPE BMZ/EYE kampong Chhnang province.

17/09/2026

01/09/2026

🌟 ពីការរៀនក្នុងថ្នាក់ ទៅការបង្កើតស្នាដៃជាក់ស្តែង! 🌱🔬💡

Project Work Fair បានក្លាយជាវេទិកាដ៏មានអត្ថន័យមួយសម្រាប់សិស្សានុសិស្សនៃសាលាបឋមសិក្សាគោលដៅចំនួន ៧ រួមមាន ស្វាយជ្រុំ ក្រាំងលាវ មាសជុំ ចំបក់រង្សី ល្បើករង្សី សុភណ្ឌ័គិរី និងព្រះទ្វារ បង្ហាញពីអ្វីដែលពួកគេបានរៀន ស្រាវជ្រាវ អនុវត្ត និងបង្កើតឡើងដោយខ្លួនឯង។ ក្រោមការគាំទ្របច្ចេកទេស និងថវិកា​នៃគម្រោង CLASS 🎓✨

ពិព័រណ៍នេះមិនមែនគ្រាន់តែជាការតាំងបង្ហាញស្នាដៃរបស់សិស្សនោះទេ ប៉ុន្តែជាឱកាសសម្រាប់សិស្សក្នុងការបង្ហាញ ចំណេះដឹង សមត្ថភាព ភាពច្នៃប្រឌិត និងទំនុកចិត្ត តាមរយៈការរៀនដោយអនុវត្តជាក់ស្តែង។

🔎 តាមរយៈការធ្វើគម្រោង សិស្សបានរៀន៖
💡 គិត និងបង្កើតគំនិតថ្មីៗ
🔬 ស្រាវជ្រាវ និងស្វែងរកចំណេះដឹង
🛠️ អនុវត្តចំណេះដឹងទៅជាស្នាដៃ
🤝 ធ្វើការជាក្រុម និងចែករំលែកទំនួលខុសត្រូវ
🧠 ដោះស្រាយបញ្ហាតាមស្ថានភាពជាក់ស្តែង
🎤 បង្ហាញ និងពន្យល់ស្នាដៃរបស់ខ្លួនដោយទំនុកចិត្ត

🌱 អ្វីដែលគួរឱ្យកត់សម្គាល់ គឺសិស្សមិនត្រឹមតែជាអ្នកទទួលចំណេះដឹងពីគ្រូប៉ុណ្ណោះទេ ប៉ុន្តែពួកគេក៏ក្លាយជាអ្នក ស្វែងរក សាកល្បង បង្កើត និងចែករំលែកចំណេះដឹង ផងដែរ។

🤝 ការរៀបចំ Project Work Fair ក៏ជួយពង្រឹងទំនាក់ទំនងរវាង សាលារៀន លោកគ្រូ អ្នកគ្រូ សិស្ស អាណាព្យាបាល និងសហគមន៍។ តាមរយៈការមកទស្សនា និងស្វែងយល់ពីស្នាដៃរបស់កូនៗ អាណាព្យាបាល និងសហគមន៍អាចមើលឃើញដោយផ្ទាល់នូវការរីកចម្រើន និងសមត្ថភាពរបស់សិស្ស។

👨‍👩‍👧‍👦 ការអប់រំមិនមែនជាការទទួលខុសត្រូវរបស់សាលាតែម្នាក់ឯងទេ។ ការចូលរួមរបស់អាណាព្យាបាល និងសហគមន៍ គឺជាកម្លាំងសំខាន់ក្នុងការជំរុញឱ្យកុមារស្រឡាញ់ការរៀន មានទំនុកចិត្ត និងអភិវឌ្ឍសមត្ថភាពរបស់ខ្លួន។

🚀 ជាពិសេស ការរៀនតាមគម្រោងបានផ្តល់ឱកាសឱ្យសិស្សអភិវឌ្ឍ ជំនាញសតវត្សទី២១ ដូចជា ការគិតវិភាគ ការច្នៃប្រឌិត ការទំនាក់ទំនង ការសហការ និងការដោះស្រាយបញ្ហា ដែលមានសារៈសំខាន់សម្រាប់ការសិក្សា និងជីវិតនាពេលអនាគត។

✨ ស្នាដៃដែលបានបង្ហាញនៅថ្ងៃនេះ គឺជាលទ្ធផលនៃការខិតខំប្រឹងប្រែងរបស់សិស្ស ការណែនាំរបស់លោកគ្រូ អ្នកគ្រូ និងការគាំទ្រពីអាណាព្យាបាល សាលារៀន និងសហគមន៍។

🌱 យើងជឿថា៖ កុមារដែលបានរៀនដោយអនុវត្តនៅថ្ងៃនេះ នឹងក្លាយជាយុវជនដែលមានសមត្ថភាពក្នុងការបង្កើតការផ្លាស់ប្តូរនៅថ្ងៃអនាគត។

👏 សូមអបអរសាទរដល់សិស្សានុសិស្សទាំងអស់ ដែលបានខិតខំប្រឹងប្រែងបង្កើត និងបង្ហាញស្នាដៃរបស់ខ្លួន!

🙏 សូមថ្លែងអំណរគុណដល់ លោកគ្រូ អ្នកគ្រូ អាណាព្យាបាល សហគមន៍ ថ្នាក់ដឹកនាំសាលា និងបានចូលរួមគាំទ្រ និងបង្កើតឱកាសសិក្សាដ៏មានអត្ថន័យសម្រាប់សិស្ស។

KAPE CLASS, kampong Chhnang province.