19/10/2026
नमस्कार, ल्हासो फ्याफुल्ला! 🙏
सम्पूर्ण सहयोगी दाताहरूलाई धेरै–धेरै धन्यवाद। 🙏
रसुवा जिल्लास्थित भोटेकोशी नदीमा आएको विनाशकारी बाढीबाट प्रभावित परिवारका लागि NPO法人 नेपाल तामाङ समाज जापानले दुई चरणमा गरी कुल ¥९४८,१५५ राहत सहयोग प्रदान गरेको छ।
यस राहत अभियानअन्तर्गत केन्द्रीय समिति तथा ७ वटै क्षेत्रीय समितिबाट जम्मा ¥७९८,१५५ सङ्कलन भएको थियो। त्यसमध्ये पहिलो चरणमा ¥६२६,२४० प्रधानमन्त्री दैवी प्रकोप उद्धार कोषमार्फत आर्थिक सहयोग गरिएको थियो।
सङ्कलित रकममध्ये बाँकी रहेको ¥१७१,९१५ मा केन्द्रीय समितिको कोषबाट ¥१५०,००० थप गरी दोस्रो चरणमा जम्मा ¥३२१,९१५ बराबरको नगद राहत वितरण गरिएको छ।
दोस्रो चरणको राहत नेपाल तामाङ घेदुङ र अन्तर्राष्ट्रिय तामाङ परिषद्को समन्वयमा समाजका अध्यक्षज्यूको भौतिक उपस्थितिमा वितरण गरिएको हो। उक्त राहत काठमाडौँको सुन्दरीजल, बीपी चोकस्थित होल्डिङ सेन्टरमा रहेका गत भदौ १० गतेको बाढीबाट प्रभावित ७८ घरपरिवारलाई प्रदान गरिएको छ। राहत पाउनेमध्ये बुबाआमा नभएका ४ जना बालबालिका पनि रहेका छन्।
राहत वितरण कार्यक्रममा अन्तर्राष्ट्रिय तामाङ परिषद्का महासचिव टासी लामा, नेपाल तामाङ घेदुङका उपाध्यक्ष रुप योन्जन तामाङ, दिनेश लो, नेपाल तामाङ समाज जापानका अध्यक्ष गिरबहादुर तामाङ घिसिङ, चर्चित गायक विश्व दोङ, रसुवा घेदुङका अध्यक्ष एसटी लामा, समाजसेवी तेम्रेल तामाङ तथा आमाछोदिङ्मो गाउँपालिकाका वडा जनप्रतिनिधिलगायतको उपस्थिति रहेको थियो।
यस मानवीय अभियानमा समन्वय र सहयोग गर्नुहुने नेपाल तामाङ घेदुङ, अन्तर्राष्ट्रिय तामाङ परिषद्, केन्द्रीय समिति, ७ वटै क्षेत्रीय समिति तथा सम्पूर्ण सहयोगी दाताहरूप्रति हार्दिक आभार तथा धन्यवाद व्यक्त गर्दछौँ। तपाईंहरूको सहयोगले बाढीबाट प्रभावित परिवारलाई राहत पुर्याउन सम्भव भएको हो। 🙏
NPO法人 नेपाल तामाङ समाज जापान
