01/10/2026
⭕التريند المصري دا قالب الدنيا حرفيًا دلوقتي.. بس مش في مصر! في الأردن 🇯🇴
الي قدامكم دا شاب مصري اسمه مصطفى وعنده 39 سنة ومقيم وشغال في الأردن من 18 سنة، في يوم إجازته نزل يعوم في خليج العقبة والدنيا كانت هادية وطبيعية لحد ما تفاجئ بقارب جاي ناحيته بسرعة ومش شايف مصطفى، الشاب حاول يتفاداه ويبعد عن طريقه، ولكنه كان سريع جدآ لما أدرك إنه مش هيلحق كرد فعل غريزي غطس تحت كمحاوله نجاة يائسه، ولكن كان فات الأوان والقارب خبط مصطفى وكسر له عظمه..
بس الأصعب من كدا إن مروحة القارب لحقت رجله وتعرض لإصابة بالغة أدت إلى بتر القدم وأسفل الساق فورًا وسقط الجزء المبتور لأسفل البحر.. مصطفى تحامل على الوجع وفضل واعي ونزل بسرعة ورا ساقه عشان يمسكها، بس للأسف خارت قواه ومقدرش يكمل، واللي كانوا في القارب انتشلوه من المية بيصرخ ويبكي وفقد الوعي وودوه المستشفى
وهنا بدأت أول معركة في القصة واللي خلتها تريند..
الدفاع المدني الأردني عرف إن مصطفى كان بيبحث عن ساقه بعد الحادث.. وهنا ابتدت الملحمة البطولية اللي كلها إنسانية ورحمه.. وراحوا بغواصين لمكان الحادث ونزلوا لمدة ساعتين بيدوروا ونجحوا أنهم يلَقوها في قاع البحر بعد ساعتين من البحث، والمفاجأة إنها كانت سليمة! حطوها في آيس بوكس للحفاظ على الأنسجة والأوعية الدموية وبعثوها للمستشفى فورًا
وهنا ظهروا أبطال القصة في مستشفى عبد الهادي بالعاصمة عمّان..
مصطفى كان في إنتظاره فريق طبي متخصص، وطمنوا مصطفى إنهم هيعملوا كل اللازم عشان يسترجعوا رجله تاني.. ودخلوا في سباق مع الوقت في عملية جراحية دقيقة جدًا ابتدت من 11 ليلا لحد 10 الصبح، يعني حوالي 11 ساعة.. 11 ساعة من توصيل عظام وعضلات وأنسجة وأوردة مصطفى ببعض
والمفاجأة..
عملية الزراعة نجحت.. وساق مصطفى رجعت ورجعت معاها فرحته وابتسامته وأمله في الحياة، بعدما كان زعلان على نفسه وفقد الأمل إنه يرجع يمشي ثاني.. وحاليًا بيخضع للرقابة والمراجعة الطبية كل ساعة، والكل بيروح يصور معاه هو والكادر الطبي الأبطال..
والحقيقة إن قصة مصطفى فيها أكتر من بطل..
فيها رجال إنقاذ الدفاع المدني الأردني نزلوا يدوروا في قاع البحر على ساق مبتورة..
وغواصين قضوا حوالي ساعتين في البحث عنها..
وكوادر إسعاف تعاملت مع المصاب والطرف المبتور بسرعة..
وأطباء قرروا يخوضوا واحدة من أصعب العمليات بدل ما يعتبروا إن الأمر انتهى..
سبحان الله.. أوقات ربنا بيكتب للإنسان فرصة تانية للحياة من طرق مستحيل تتخيلها
