23/02/2026
A nòmini de su Diretivu, de s'Assemblea, de totu is sòtzias/us e amigas/us de "Arrepentina e Mutetus" cumpartzeus su dolori de sa famìllia e imprassaus a s'amigu etnomusicòlogu dot.ri Nàtziu Murru po sa dispidida de su nebodeddu Larentzu.
Un'àngelu in prus in su Santu Paradisu!
Cumpartzeus custa arrepentina posta de s'amigu e poeta Antoni Nàtziu Garau.
😢😢😢😢
A S’ANGIULEDDU LARENTZU
Arrepentina arretrogada
S’alimentu po sa vida / favorit su crescimentu,
po sa vida s’alimentu, / cussa vida dd’at firmada.
Malasorti, disgratziada, / presentada a trassa ‘e morti,
disgratziada, malasorti, / a Larentzu nci as pigau!
Ita mali o pecau, / sorti farsa, maladita,
mali o pecau ita / iat fatu sa criadura?
Cosa contras de Natura / su pipiu in d-una losa,
contras de Natura cosa, / malasorti farabuta!
Ma sa vida est sempri alluta, / no est berus chi est finida,
sempri alluta est sa vida / in is pardus de su Celu:
nudda prantu, nudda velu, / sceti ‘e Àngelus su cantu,
nudda velu, nudda prantu, / ca Larentzu est biu ancoras,
innui nascint is auroras / e is innotzentis pascint,
innui is auroras nascint / cun su giogu de is pipius
e de passièntzia arrius / po s’umana esistèntzia,
e arrius de passièntzia / po nosu chi seus innoi!
Un’impràssidu a Nàtziu e a totu sa famìllia!
💔💔💔💔💔💔💔💔💔💔💔💔💔💔💔
