08/10/2026
نتقدم بشكر لمساحة فضاء التي سمحت لنا مرة اخرى أن نلتقي جميعا، أن نرى بعضنا، أن نقدم لكم العدد التالث، ثم أن نتحذث، أن نختلف، أن نتصادم، أن نطرح الأسئلة ونجيب عنها، أن نتبادل الأفكار حتى نشعر ببعض التغيير بداخلنا، أن نخرج بشعور أننا أخدنا الكلمة وملئنا الفراغ الذي نراه جميعا .
دابا نكملو بالدارجة، اللقاء الأخير لي داز كان أحسن نسخة بالنسبة لينا على مستوى النقاش، الشباب يدافعون عن اراءهم بشجاعة، يأخدون الكلمة، يقاطعون النقاش لطرح فكرة أخرى أو رأي معين، وهادشي لي بغينا، هاد اللقاء هو امتحان لكل الاعضاء باش يهدرو، باش فاش يجي رينيون لجروب ديالو ميحشمش، وحتى على المستوى الشخصي باش أي واحد منا يقدر ياخد الفرصة ويزعم ويتجرأ ويهدر قدام بزاف دراري مكيعرفهمش ويكسر حاجز الحشمة والخجل. للأسف الشباب المغربي معندهمش بزاف الاختيارات باش يتعلم يوقف قدام الناس ويعبر على راسو، ربما تكون ضياء فرصة باش يتجرأ ويهدر على خاطرو، وهدا هو الهدف ديالنا، فالمقابل لابد أن يسود الإحترام وتقدير الاخر والمكان، لإنه كانوا لحظات فالنقاش لي خرجت فيه الأمور عن السيطرة، فالهدف ديالنا هو نتعلموا ناقشوا ونعبرو على أي فكرة بإحترام .
كما جاء فالنقاش أن مفهوم المؤتمر بشكله التقني مزال مدارش، بل مزال خدامين باش نوصلو واحد نهار و نديرو مؤتمر كبير وتحضر فيه الصحافة ونستدعيوا فيه محاميين وشخصيات وازنة فمجالات آخرى، وعلاش لا الجروبات براسهم ممكن يحضروا، كل ما كتب وكل ما قيل مجرد البداية، مشروع ضياء تشتركون فيه جميعا، كلكم جزء منو، ولأن هاد المشروع كيخدمو عليه أفراد قلال بزاف، كيكونوا هفوات سوى فالكتابة من أخطاء إملائية أو حجم الخط و حتى من الطباعة، نعتذر كثيرا على النقائص، را الطموح ديالنا هو الوصول لمنتوج لأقرب للمثالية ولكن هادشي كيتطلب الوقت والجهد، وعدد وراء عدد نحاول تجاوز الأخطاء، وإن شاء الله القادم أفضل .
محتوى النقاش هدرنا فيه على أهمية التاريخ وكيفاش كيتحرك، معروف من تقنيات التأريخ الأولية هوما ضبط الزمان والمكان والحذث، ولذلك الزمان سجل بي 26 سبتمبر 2026 - المكان : ساحة فضاء - الحذث : تقديم العدد التالث، ولكن واش هذا هو التأريخ، طبعا لا، الحذث هو التقديم، ولكن شنو تقال فالتقديم ؟ شكون حضر فالتقديم، شنو نوع الاضافة فهاد التقديم، هاد الأسئلة ممكن نلقاو الإجابة ديالها فتقديم العدد الرابع، ممكن فالعدد الخامس، ممكن من بعد سنوات ... معرفناش، ولكن حركة التاريخ ستجيب على وزن هذا المشروع، ومدى التطور لي بغينا نوصلو ليه، الفانزين ماشي مجرد نسخ ورقية، واللقاءات ماشي مجرد نقاشات دايزة ... ولكن الفكرة أكبر، هو نصنعوا قاعدة من محتوى الأولطرا، نهار شي واحد يبغي يتعرف على هاد العالم، يلقى ضياء ويلقى مشاريع أخرى، بغينا دراري اخرين وياخدو البادرة ويكتبوا، يرسموا، ينتجوا أي حاجة، الوعي الحركي مكيجيش فعام ولا عامين، هو مشروع كبير بدون حدود .
كنعاودو نشكروكم من أعماق القلب على المجية ديالكم، على الوقت ديالكم، على أي مساعدة قدمتوا لهاد المشروع، نتوما راكم صحابنا بدرجة أولى، ونتمناو أننا نكونوا عند حسن الظن ديالكم، حنا كاملين مزال مكملين فهاد الطريق، البطولة بدات نتمنى لجميع المجموعات مسيرة موفقة وأسفار ممتعة مع الفرق ديالكم .
بالنسبة للأصدقاء داخل المغرب وخارجه اللي ماقدروش يحصلو على نسخة ورقية غادي نطلقو قريبا نسخة PDF
