20/04/2026
Oggi vogliamo condividere con voi una poesia speciale ✨
Scritta dal nostro caro amico Giovanni Cassitto , storico abitante delle Fontanelle, queste parole raccontano un legame profondo con il luogo, la memoria e la vita vissuta.
‘E Ffuntanelle
Funtanelle, via addò so’ nato,
addò cchiù ‘e quarant’anne
aggio campato.
M’arricordo ca piccerillo
jucavamo cu ’e ritrattielle
pe’ nu pucurillo,
po’ se faceva ‘a guainella,
‘e sette tappe,‘o paccariello,
e a nasconnere …
era tutta na fuiarella.
Quann’anne so’ passate…
me pare ajere …
nun eveme amice, ma frate:
Franchetiello, Giuvanne ‘o micione,
Aitano, Tonino, Totore ‘o brigante
e quacch’ate fanfarrone,
ma nisciuno era nu piatto vacante.
Nun ce steva ‘a scola
dint’ ’e Ffuntanelle
e mangianno pane e pummarola,
saglieveme ‘e scale ‘a Maruccella.
…………………
…………………
Funtanelle, via addò so’ nato,
addò cchiù ‘e quarant’anne
aggio campato.
…………………
…………………
M’arricordo d’ ’o campusanto
e d’ ’a ggente che jeva a prià
p’ave ‘a grazia d’ ’o Spiritusanto
e tante che stevene ‘e casa llà:
donn’Assunta e Peperino
d’ ’e ccarruzzelle,
Giggino d’ ’o vino,
e don Errico d’ ’e ppucurelle,
Mastu Peppe e Tummasina ...
ca s’appiccecavano ogni matina,
‘onna Rosa ‘a vaccara
secca comme ‘na sardina,
e ‘o figlioTotore cu ’a voce abbrucata,
ca cu Totonno ‘o stuorto faceva ammuina
don Vicienzo ‘o parrucchiano,
‘onna Vicenza d’ ’e ccaramelle,
Mario ‘o sacrestano,
e Matalena dint’ ’a fenestella,
‘ncopp’ ’o «ghiubbino»
nce steva don Carmeniello
cu Totore e Gennarino,
ca teneveno paricchie pullastielle
e Tore ‘o spacco
ca faceva pure ‘e stelletelle,
‘nce steva pure Paparacchiò…
‘o figlio ‘e Silviella
…nun era ‘nu chiò cchiò,
ma ‘o cchiù gruosso aucellare d’ ’e Ffuntanelle.
…………………
…………………
Funtanelle, via addò so’ nato,
addò cchiù ‘e quarant’anne
aggio campato,
mo’ nun te cunosco cchiù
si cagnata pure tu …
… si addivintata sulo
‘nu ricordo ‘e giuventù!
Giovanni Cassitto
