24/04/2026
SCHÜTZENDANK BORCAN!
Na burta neva anchedadoman ne à dat na gran scorlada.
Nosc Comandant onorarie, Enrico Dellantonio "Borcan" da Moena, clas '49, à lascià chesta tera per jir ensema ai autres camerac jic tei egn.
Per scaji 25 egn à tegnù l temon de nosc grop, fin da canche ensema a de autres Fascegn i à dezidù che l'era ora de remeter en esser i Scizeres te Fascia.
N om sorì, de gran cher e pien de gaissa, che canche l'era ora l dijea "CHI ELO CHE VEGN" e no "chi elo che va". Semper en pruma linea per desvalives projec e sacotante scomenzadive, per far cognoscer e portar stroz noscia storia, noscia identità e nosc esser tiroleres d'aldidanché.
Su la fin dei egn '80, ensema a de etres Scizeres trentins, l'aea firmà l prum statut de la Federazion di Scizeres del Welschtirol, percheche sessaben che la pruma Compagnia a fèr la rifondazion l'é stat Mezzocorona-Kronmetz del 1983, ma la Schützenkompanie Ladins de Fasha la é stata metuda a register del 1982, pertant Borcan l'é stat l prum Comandant dei Scizeres sot la linea de Salorn, se coscì volon ge dir.
So viver l'era la Compagnia, l'era sie camerac de dut l Tirol.
Ancora ades suzet che canche jon stroz, i Scizeres più de età vegn a domanèr come che stèsc Borcan, e che burt sarà da ades en avant cogner ge dèr chesta neva.
No l'era da se fèr marevea se canche i aea da jir zaolà, l fajea l giro co l'auto ai binèr su, enscinamai sote cèsa, pura che i jisse.
N gran ejempie per nos etres che aon avù la fortuna del cognoscer canche l'era ancora fort e gaert.
Ge saeva bel star anter i joegn de nosc grop, el se godea fin sul scur a ciacole e sessaben, ence a bire.
A zarchièr fora nosc archivie fotografich me è embatù te n marudel de retrac fac dai egn '80 en avant. Pecia l'é la outes che mencèa Borcan, encecheben no più da Comandant.
È troà de chi retrac dalbon da grignèr, ence se l tor jù grignolent con int la mondura no l'era mia sorì. No l'aeva mai nia fora de post, adertura a noi joegn, del 2009, giusta ruè te Compagnia l ne aea cridà percheche la veta che ciola la braes de pel sotite jeneie no la era fata dalvers, ge volea la engropar a na maniera duta sova, acioche na oita fat l grop, l scur de la veta l fosse medemo per dut l grop. Difizile da spiegar a parole, ma canche sarà poderede vegnir a domanèr.
Trop fosse da scriver en cont de chest GRAN Scizer, duc ge volea ben, e ence el, a soa maniera l lo desmostrèa.
Resterà semper te nesc cheres l Prum Comandant di Scizeres de Fascia, fat da sova Compagnia Comandant Onorarie per l gran empegn metù te duc chisc egn.
Stente a jir inant con chest scrit tant l'é senester l fèr.
Per chest mie salut l'é chel che è scrit al scomenz
SCHÜTZENDANK Comandant.
