Sos giornalistas chi iscrient in sardu, in gadduresu, in tataresu, tabarchinu e catalanu non sunt pagos, gasi e totu comente iscritores, poetas, istudiosos e totu sos chi impreant custas limbas pro iscrière. Custa est sa torrada bona de su reconnoschimentu de sa
limba sarda e de sas àteras faeddadas in Sardigna cun leges de s'Istadu e de sa Regione. No est de badas si s'ammentat chi custas leges,
chi podent èssere megioradas in sas normas et in sas siendas publicas dedicadas, esistint pro more de una
pelea polìtica e culturale chi at tentu s'epitzentru suo in giornales iscritos pro sa prima bia in sardu. Si sunt tando formadas professionalidades de giornalistas in limba sarda chi sunt semper creschende de nùmeru in sos mèdios iscritos e faeddados. Custos giornalistas tenent sos matessi bisòngios de sos àteros giornalistas chi iscrient e faeddant in italianu; ischint fàghere custu puru, ma tenent bisòngios in prus ca depent traballare cun una limba in prus, mancari oe in
die siat posta in conditziones de minoria e minoridade. Est bennida, tando, s'ora de s'organizare totu paris pro otènnere reconoschimentos e amparos cunformes a sa professionalidade insoro e a s'isvilupu chi su giornalismu in sardu e in sas àteras limbas de Sardigna depet àere e e at a tènnere in in su vennidore. Sos giornalistas professionistas, dischentes e publicistas, chi iscrient e faghent informatzione in sardu, in gadduresu, in catalanu de s'Aligheras, in tataresu e in tabarchinu chi cherent leare parte in su fràigu de
s'Assòtziu de sa comunicatzione in sas limbas de Sardigna (ACILS) sunt cumbidados a s'iscrìere e siat in su grupu "Promòtores Assòtziu de sa comunicatzione in sas limbas de Sardigna-ACILS " e siat in sa pazina ( Assòtziu giornalistas in limba sarda) chi apògiat s'initziativa
